21 Aug 2015
المصريين بيتغيروا
——————–
النهاردة بعيد عن السياسة عايز اقول ان المصريين فعلا بيتغيروا .. وانه برغم الوعى الطبيعى الموجود والمغروس فى وجدان المصريين من زمان واللى بيعكس ثقافة وحضارة 7000 سنة .. لكن واضح ان حملات التوعية بدأت تجيب نتيجة .. وان ال 5 سنين اللى فاتوا ساهموا بشكل كبير فى زيادة مستوى الوعى بعد الردة اللى شافها نتيجة الحرب النفسية المكثفة اللى تم ممارستها علينا بداية من 2005 ووصولا لخروج المصريين فى 25 يناير 2011 .. !!
الصورة اللى فى المقال دى انتشرت انتشار محدود خلال الاسبوع اللى فات على الفيسبوك .. وخلاصة القصة ان دوول مجموعة فنانين حضروا جنازة الفنان الراحل نور الشريف .. ودى صلاة الجنازة .. وانه بمجرد ما الامام كبر التكبيرة الثانية ، قام الفنانين دوول ركعوا على اعتبار انهم مش عارفين ان صلاة الجنازة بدون ركوع او سجود .. وان هم دوول واجهة المجتمع الجاهلين بالدين .. وهم دول اللى الناس بتعتبرهم مثل أعلى .. وكلام كتير من النوع ده !! 😊
طبعا الادمن اللى نزل الصورة دى وعمل البوست ، اكيد عمل كدة طمعا فى شوية لايكات .. وكان متوقع تفاعل كبير فى نفس اتجاه كلام البوست .. لكن الشئ الجميل انه حصل العكس 😊😊 ..
تعليقات كتيرة بدأت تتهكم على الادمن وعلى البوست .. وناس كتيرة بدأت تسأله عن مصدر الكلام ده .. واللى يقول له انت ايش عرفك .. و هو انت كنت حضرت صلاة الجنازة .. واللى يقوله مش جايز دى صلاة الظهر اللى الناس صلتها قبل صلاة الجنازة … وحاجات كتير بالشكل ده .. وغير طبعا اللى دخل وقال له الفاظ من اللى الرقابة مش مصرحة بيها 😃😃
طبعا مش قادر اقول لكم مقدار السعادة اللى شعرت بيها وانا بأقرأ التعليقات ، بسبب احساسى ان الناس فعلا اتغيرت .. وماعادوش خلاص بياخدوا اى خبر كدة على علاته غير لما يحققوا فيه ويتأكدوا من مصدره !! .. ولأن الموضوع من وجهة نظرنا كان مثير جدا للانتباه فعلشان كدة قررنا اننا نشاركم القصة .. بغض النظر عن مدى اهمية الموضوع من وجهة نظر البعض .. لكن احنا شايفين انه فيه مؤشر إيجابى مهم جدا 😊
طبعا اكيد فيه ناس انزلقت فى الفخ .. وعلقت تعليقات سلبية .. وطبعا اللجان الإليكترونية الاخوانية واللى مش اخوان بس بيحترموهم تعاملوا مع الخبر ده بالأسلوب اللازم .. وممكن يكون اللى عمل الخبر ده اصلا هم اللجان الاليكترونية الاخوانية لتشويه صورة المجتمع واللعب مرة أخرى على وتر الدين على اعتبار ان الدين راح خلاص بعد ما مرسيهم اتعزل .. لكن خاب سعيهم المرة دى 😊😉
المصريين بيتغيروا .. والاحساس والوعى الايجابى بيتزايد .. وياريت يحصل تغيير كمان فى المؤشر الايجابى لمستوى اداء المصريين فى العمل وعلى كافة مستويات الأداء العملى والاجتماعى ..
صدقونى لسة فيه أمل 😊😊