03 Apr 2016
الهويه المصريه و اليسار المصري المتعفن – (الجزء الثالث )
———————————————————
أصدقاؤنا أصدقاء صفحة كلام في الصميم ….. اعذرونا … اتأخرنا عليكم في تكملة سلسلة مقالات اليسار المصري و محاولة هدم الشخصيه الوطنيه المصريه ……. و حنكمل النهارده كلامنا عن اكذوبه ما يطلق عليه اليسار المصري و افكاره …. و اكاذيبه و سمومه اللى بيبثها في المجتمع المصري …. و نواصل هدم التابوهات اللى بيستخدمها للضحك على عقول شبابنا قبل ما ندخل في صلب الموضوع و نأصل و نشرح و نفند افكارهم و نشأتهم التاريخيه و تطورها حتي قدروا انهم يتوغلوا و يكونوا لوبي فاعل على الارض ليتحكموا في وسائل الاعلام و الفن و الميديا لينجحوا في اختراق عقول شبابنا….. و يسيرون بين الشباب زي شخصيه النداهه …. اللى بتمنيهم باحلام وهميه من ان الغرب متحضر و عنده قيم لنشر قيم غريبه عن مجتمعنا لهدمه.
و زي ما هدمنا في المقال السابق تابوه الغرب المتحضر و رؤيته للمرأه …. و هدمنا اكذوبة اننا شعب همجي متحرش … و انهم هم اللى شعب متحرش و و ملعوب في اساسه الحضاري …. ده لو كان عنده اصل حضاري اصلا …. النهارده هنتكلم على اكذوبة الغرب المتحضر بتاع حقوق الانسان و الديمقراطيه …. و حثبت ليكم ان الغرب هم اكثر كيانات على وجه الكره الارضيه ديكتاوريه و ان مفيش حاجه يعرفوها اسمها ديمقراطيه و لا حريه ابداع و لا حقوق مواطنين و لا ان كل واحد بياخد حقه بالقانون و ان الناس هناك ماشية في الشوارع ماسكه بلالين و الكلام الخايب اللى بيضحكوا بيه على عقول الشباب بتاعنا عشان يأصلوا للفوضي الخلاقه اللى كانوا بيوعدونا بيها 🙂 🙂
شوف يا سيدي …. المجتمع الغربي مفيهوش حاجه اسمها حريات و لا حقوق انسان و الكلام الفاضي ده …. القصه هناك بتتلخص في الاتي …. فيه اطار محدد من المجتمع و القانون …. حضرتك ملكش الحق و لا الحريه انك تقرب من حدود الاطار ده …. و لا حتي عندك حريه التعبير انك تناقش حدود الاطار ده او تتسائل مين اللى حدد الاطار ده او انك تحاول بس تفكر انك تضع بعض التغيرات عليه و لو حتي ببوست على الفيس بوك على صفحتك الشخصيه في الفيس بوك او تويتر …. لانك لو فكرت بس تقرب من الاطار ده حتتنفخ و محدش حيسأل فيك اصلا .
فمثلا لو انت معترض على اسس الاطار ده بحجه انك مواطن و ليك حريه الرأي او تجرأت و فكرت انك بس تحاول تعترض او تواجه من يقومون بحراسه النظام ده من رجال امن او رجال قانون او مؤسسات دوله … ففي اللحظه دي بتتسحب عنك كل الحقوق …. و تبقي خارج عن القانون …. و اللى بيبقي خارج عن القانون في الغرب …. ملهوش ديه … تتجاب من قفاك و تتسحل و تضرب بالنار في الشارع في عز النهار و قدام عدسات الكاميرات … و محدش يقدر يفتح بقه بقوه القانون …. 🙂 🙂 …. و متستغربش لاستسلام المواطنين الغربيين للسحل و الضرب و وضع الحذاء على دماغك …. لان ببساطه ….. تهمة مقاومة السلطات لوحدها بتتعدي السجن عشر سنوات …. فلما يجي يسحل و يضرب … لازم تخضع تماما و لا تعطي اي سبب لاتهامك بمقامة رجل الامن اثناء القبض عليك .
و ارساء النظام ده في الغرب بيعتمد على الردع …. فمثلا لما تخش على لجنه او ظابط في الشارع طلب منك انك تقف و لم تمتثل و تبين بمنتهي الوضوح و الخضوع انك خاضع تماما للاوامر … فعادي جدا انه يضربك بالنار …. او انه يسحلك بحجه القبض عليك …. او كنت في مظاهره انتهي وقتها او رجلك نزلت من على الرصيف ….. فالامن بيتعمد انه يقبض عليك و يحط جزمته على دماغك بمنتهي العنف و … و بيتعمد ان يتم ذلك امام الكاميرات لردع المجتمع و القانون بيحميه … لانك في الحاله دي خارج عن القانون … و اللى يخرج عن القانون ملهوش حقوق …. و سيبكم من الافلام الاجنبي اللى بتشوفوها لما يجوا يقبضوا على وحد يقوم يقرا عليه حقوقه … الكلام ده لما بتكون خاضع تماما للقانون … لكن لو اتهورت و بصيت بس مجرد نظرة تحدي …. الله يرحمك.
اما حريه الابداع فهي محدده بالقانون و بقوه دعم المجتمع فيه …. فمثلا في معظم البلاد الغربيه لو شككت بس في محرقة اليهود …. حضرتك حتتحاكم و تتحط في السجن …. و محدش يقدر يطلع يدافع عنك و يقول دي حرية تعبير 🙂 🙂
و اللى قدر ليه و عاش بره حيعرف برده ان عندهم برده وسايط في الشغل …. بس هم مش بيسموها كوسه … لكن بيسموها (networking )
و علاقات عامه و اتصلات قويه … و حيعرف برده ان كل الشركات و الكيانات العملاقه هي بيزنس عائلي .
اما كذبة الديمقراطيه و حكم الشعب نفسه بنفسه … فدي اكبر نصبايه في التاريخ … و اللى يصدقها يبقي تعبان …. ليه ؟؟؟؟
اقولك ….. حضرتك بتروح تنتخب بكل حريه و تختار بين مرشحين تم اختيارهم ليك … و حضرتك لما تقف على دماغك مش حتعرف تقدم المرشح اللى نفسك فيه … يعني الغرب هو اللى ابتدع عصر اللمون مش احنا 🙂 🙂
اللى بيترشح ده … لازم ليه تمويلات ضخمه و دعايه و اعلان و تركيز اعلامي عليه عشان يوصل للناس …. و الادوات دي كلها مسيطر عليها تماما من النظم الغربيه … و محدش يقدر يعدي من الفلتر ده نهائيا …. و للتاريخ …. الوحيد اللى عدي من الفلتر ده و قدر انه يوصل للناس و يتخطي كل الحواجز دي … هو شخص واحد كان عنده قضيه …. و مشروع وطني … و لكن لانه دخل في المحظور … و نجاح تجربته كانت حتبقي سابقه خطيره … فتم تصفيته جسديا …. عن مارتن لوثر كينج اتحدث .
حتي جون كيندي …. لما تجرأ و تحدث في خطابه الشهير عن ضرورة مقاومه الحاكم الفعلي للنظم الغربيه … لم يمر شهر واحد و تم تصفيته جسديا .
الغرب يكلمك عن المثل و القيم و الانسانيه …. و حتي اليوم يوجد بنايات محظور على السود استخدامها في وجود البيض ….
الغرب يكلمك عن المثل و القيم و لم ينتفض لمقتل مئات الالاف في سوريا ذبحا و اغتصاب عشرا الالاف من الاطفال و النساء و لكن تنتفض 100 جمعيه حقوقيه غربيه و تجمع ملايين الدولارات في 24 ساعه لانقاذ قطه في مدينة حمص تم تصويرها مصابه …. و يتطوع العشرات ليسافروا الى سوريا و يعودا بالقطه الى اوروبا … و تقام الاحتفالات بنصر الانسانيه الكاذبه.
احنا مش بنقول ان احنا عندنا جنه …. و لكن بنقول ….. ان الغرب اللى اليسارجيه طالعين بيه السما … عنده تقدم تكنولوجي
هايل …. لكن معندوش حضاره و لا عنده اخلاق … و لا لحضرتك اي قيمه عنده …
و دي أمثله صغيره جدا لبعض المواقف في البلاد الغربيه اللى هى واحات الديمقراطيه المزعومه اللى بيضحكوا بيها على الشباب اللى عندنا و لا يستطيع احد مجرد انتقادها عندهم : –
امريكا:-
——–
- الواشنطن بوست :- في عام 2015 ….. مقتل اكثر 1150 مواطن معظمهم من السود معظمهم عزل و مواطنين مدنيين مسالمين بالرصاص الحي بحوادث عنصريه مشينه على يد الشرطه المدنيه في شوارع الولايات المتحده … و لم يحاسب شرطي ابيض واحد حتي الان بالرغم من ان معظم الحوادث دي مصوره صوت و صوره و منتشره على النت.
- قتل طفل لا يتعدي 4 سنوات برصاص امن البيت الابيض بعد تخطيه حدود الخط الاحمر حاملا لعبته البلاستيكيه على شكل مسدس … لتقوم قائمة الاعلام و الجمعيات الحقوقيه هناك بصب جام غضبها على ام الطفل و اتهامها بقتله لاهمالها … لانها سابت ابنها يعدي الخط الاحمر و لم تقم بمنعه … و لم يتم انتقاد الحرس اللى قتل طفل صغير بأي كلمه.
- حبس (جوستن كارتر) مراهق امريكي 8 سنوات لمجرد كتابة تعليق على بوست فى الفيسبوك يقول فيه ( اكرهكم كلكم و ساقوم بقتلكم) .
فرنسا:-
———–
- اعتقال الكاتب الساخر الفكاهي ديودونيه لمجرد نشر بوست على صفحته الشخصيه على الفيس بوك يقول فيه “لحظة سحرية شبيهة بالانفجار العظيم. أنا شارلي كوليبال ” … و ايقاف برنامجه الفضائي .
- الحكم على رجل فرنسي شهرين لمجرد انه اهدي ابن اخته تيشرت مكتوب عليه ” انا قنبله ” و غرامه 4000 يورو … و حبس والد الطفل اللى قبل الهديه 🙂 🙂 …. شهرا و غرامه 2000 يورو 🙂 🙂
بريطانيا :-
———–
- في عام 2011 و عندما بدأت اعمل الشغب بحرق لندن …. سنت انجلترا قوانين استثنائيه بطرد كل الاسر الذي ينتمي اليها المشتبه بهم من بيوتهم و القاؤهم في العراء و طردهم من نظم التامين الاجتماعي اذا لم يقوم الاب بتسليم ابنه بنفسه الى الشرطه ….. و في غضون ايام قليله كان كل آباء المطلوبين رايحيين يسلموا ولادهم للشرطه. 🙂 🙂
- حبس مراهقه تبلغ 17 عام بسبب مجرد تعليق ساخر عن موت مراهق اخر على الفيس بوك و توعدت الشرطه البريطانيه باقصي درجات الحزم ضد تكرار ظاهرة العنف اللفظي على صفحات التواصل الاجتماعي.
- حبس ناشط سياسي بريطاني أربعة سنوات بسبب تعليق على الفيس بوك على خبر وفاة شرطي لمجرد قوله ( كان يوما رائعا ) و حبس زوجته سنتين لمجرد انها عملت لايك على البوست 🙂 🙂
- السجن 4 اعوام على ناشطين مراهقين قاما بنشر دعوات للتجمع و التظاهر و القيام باعمال شغب على الفيس بوك
- حبس طالب (لايم ستايسي) 56 يوم و غرامه 150 يورو و الخدمه العامة المجانيه لمدة سنتين بسبب ارساله تغريده بها لفظ مسىء الى لاعب الكره فابرس مومبا.
- فاز لاعب الكريكيت النيوزلندي السابق، كريس كيرنز، في مارس قبل الماضي بدعوى قضائية مقامة ضد الرئيس السابق لدوري الدرجة الأولى الهندي، لاليت مودي و تغريمه 500 الف جنيه استرليني بسبب تغريده مسيئه على ” تويتر”.
روسيا :-
———
- الرئيس الروسي يصدر قانونا بفرض غرامات لتداول الالفاظ البذيئه في الاعمال الفنيه و مطارده نفس الالفاظ على مواقع التواصل الاجتماعي.
- سن قانون بالمسئوليه المدنيه لاقارب الارهابى حتي الدرجه الثالثه في التعويضات الماديه … يعني الارهابي لما يفجر مكان او يقوم بتخريب منشئات عامه او ممتلكات خاصه …. فهو و عيلته و اللى مخلفينه 🙂 🙂 بـ يتم الحجز على ممتلكاتهم و يقوموا مجتمعين بـ تعويض الدوله و الافراد عن كل ما تم تخريبه …. و في غضون شهر واحد … كان كل واحد ليه ابن عم او خال شاكك بس في تصرفاته كان متبري منه و مبلغ عنه ….. و بالقانون ده تم القضاء على الارهاب في روسيا في شهور قليله …. أه ….. كله الا الفلوس 🙂 🙂
اسرائيل :-
———
- حبس (غسّان منيّر) لمجرد بوست على الفيس ينتقد فيه تجنيد الفلسطينيين المسيحيين في الجيش الاسرائيلي.
تركيا :-
———
- حبس صحفي معارض 10 سنوات بسبب تغريده بها حرف واحد ك و هي كنايه عن معارضته لرجب طيب اردغان.
- اغلاق عدد من الجرائد و اعتقال عدد كبيره من الصحفيين لمجرد انتقاد الحاج اردوغان و نشر تفاصيل فساد حكومته في هذه الصحف.
و فيه امثله كتييييييييير جدا و متكرره كل يوم ….. بتقول لحضرتك … ان الحضاره عندك انت … و الاصل عندك انت …. مجتمعك اصيل …. و اللى بيحاول يستخف دمه عليك و يقولك مجتمعك فاشل و يتريق علي وطنه و ثوابتها بحجه الانتقاد … هو في الاصل انسان مريض و فاشل … و بيشوف الدنيا بعنيه المريضه …. لانه ببساطه لو كان عايش بالخارج … حيمشي جنب الحيط … و لو فكر بس يعمل 1% من اللى بيعمله في بلده بره … المجتمع حيلفظه و القانون حيرميه في السجن .
لكن سخريه القدر انك تلاقيه قاعد يشتم في وطنه و يستخف دمه عليه و يكلمك على كمع الحريات و الزولم الممنهج 🙂 🙂
و نقول كمان … احنا مش مع العنف و لا بندعوا او نبرر او نحمي التجاوزات … لكن بنقول ان لما حد يقول مطالب عايشه في خياله في العالم الافتراضي …. يقولنا بتطبق فين … لان حضرتك مش مصدق انك في حريه مش موجوده في حته في العالم …. و تكاد تنتقل من فوضي الحريه … الى حريه الفوضي
احنا عندنا مشاكل كتير …. و المواطن الصالح المحترم … هو اللى يشد بايده و يقوى بيها وطنه و يبنيها و يحل مشاكلها ….
تحياتنا