01 Sep 2016
الهويه المصريه و اليسار المصري المتعفن – (الجزء الرابع )
أكذوبة ….. نفسنا نتعلم من التجربه الكوريه
———————————————————
أصدقاؤنا اصدقاء صفحة كلام في الصميم ….. من فترة كبيره بدأنا نكتب مجموعه مقالات عن تأصيل الاساس الواهي اللى بيبنى عليه الكثير من الفاشلين و المرضي النفسيين اصحاب العقد النفسيه من النوشتاء و اصحاب الافكار الدخيله على مجتمعنا …… بيسموا نفسهم نوشتاء و حكوكيين و يساريين ….. و الافكار دي اللى بيفسطوا بيها و بيبنوا كل مناقشاتهم عليها و بيضحكوا على الشباب بيها….. و بيحاولوا باستماته التسفيه و التحقير من الهويه الوطنيه المصريه الاصيله و محاولة طمسها بأي شكل …..
و لك ان تتخيل ان كل افكارهم و افعالهم لا تمت الى الايدولوجيه اليساريه بشىء لانهم مع الاشتراكيه و في نفس الوقت كل تمويلات جمعياتهم و نشاطاتهم و تدريباتهم بياخدوها من كيانات غربيه راس ماليه امبرياليه ….. و مع انهم يساريين الا انهم كانوا اكتر الداعمين أيام هوجة يناير و ما بعدها لتمكين التيار الديني اليميني سياسيه و كانوا بيدعموهم في الشارع ….. و تلاقيهم يقولولك احنا ناصريين و مع التجربه الناصريه … و في نفس الوقت هم ضد سيطرة الدوله على اى مجال ….. و هم مع القوميه العربيه و لكن ضد تحديث الجيش او اى علاقات عسكريه مع الدول العربيه ….. و برده بيبكوا على عبد الناصر و تلاقيهم بينشروا قد ايه مصر كانت عظيمه ايام الملكيه …. و كل واحد فيهم كان بيجعر بعلوا صوته ويقول امتي نعمر سيناء و نفسنا الدوله تعمل مشاريع قوميه نلم الشعب حواليها …. و هم اول ناس كانوا بينتقدوا و يشككوا في كل المشاريع القوميه اللى شغاله على الارض دلوقتي …. و غيرها كتيييييير من المتناقضات اللى مش بتدي غير معني واحد …. ان الناس دي مقتنعه اني عشان اكون مثقف …. لازم اكون مكشر وشي و قرفان من نفسي و ناكش شعري ومش عاجبني حد و بنتقد حتي نفسي لو بصيت في المرايه … و لاني مش بتاع شغل و سفسطه فارغه و خلاص ….. مش عايز الناس تشتغل …. انا عايزها تقضي يومها انها تتكلم معانا و تناقش و بالليل نروح ننام و نبقي كده انا نجحت .
في المقالات السابقه قمنا بتأصيل الكثير من أكاذيبهم …. زي ان الغرب (الراسمالي الامبريالي) هو جنة الله في الديمقراطيه … و ان شعوبهم متحضره …. و اننا شعب همج و متحرش و قليل الادب و معندناش اصل …. و اثبتنا بالدليل القاطع و الارقام و الاحصائيات هذه الاكاذيب و ان العكس هو الصحيح ….. و فرقعنا البالونه المنفوخه اللى اسمها الغرب المتحضر الديمقراطي و اللى لو حضرته موجود فيها و عمل 1% من اللى بيعمله في بلده كان اتنفخ و اتسحل و مبانش ليه صاحب و كله بالقانون ……. و فندنا كذبه الهوس الجنسي عند المصريين و اننا شعب محترم أصيل …. و ان الحضاره عندنا احنا … و ان الاصل عندنا احنا … كل ما هنالك أن عندنا شوية مشاكل اقتصاديه و سياسيه بيتم اصلاحها …. و لمتابعه الاجزاء الثلاثه برجاء متابعة اللينكات في آخر المقال.
النهارده بقي حنتكلم على الشيزوفرينيا الفكريه و الكذب الممنهج اللى اشتغلوا بيه على عقول الشباب كتير وبناء منهجه الفكرى المغلوط على استحضار نتائج لتجارب ملهاش علاقه بمنهجه اللى عايز يقنعنا بيه و في نفس الوقت بيرفض معطيات التجارب دي …… و هى فكرة ( احنا نفسنا نبقي زي كوريا الجنوبيه اللى بدات معنا من 60 سنه …. شوفوا هي فين و شوفوا احنا فين ) … 🙂 🙂 …. طب ايه رأيك انا من اكتر الناس المؤيدين لإستحضار تجربه كوريا الجنوبيه و تنفيذها بحذافيرها 🙂 🙂 … بس يا ترى حضرت ساعتها حتوافق و لا حترجع تعيط 🙂 🙂 . عايز تعرف كوريا نهضت ازاي 🙂 🙂 …. شوف يا سيدي ….
بدون الخوض في تفاصيل تاريخيه و بإختصار شديد …. فنتاج للحرب العالميه الثانيه ….. الجمهوريه الكوريه الحديثه تأسست عام 1948 كدوله بأيدولوجيه ديمقراطيه غربيه بعد فصلها عن كوريا الشماليه …. الا انها و لمدة 14 عام كانت تعاني من فقر مدجع و اقتصاد منهار و اضطرابات سياسيه و حروب مع جارتها كوريا الشماليه ….. حتي قيام الزعيم “باك تشونغ هي” بالاستيلاء على الحكم لمده 17 عام كامله بانقلاب عسكري صريح في عام 1962 و حتي اغتياله عام 1979.
و الجنرال “باك تشونغ هي” هو اكثر الزعماء اللى ثار عليهم لغط تاريخي كبيييير …. و لما تيجي تتكلم مع واحد من كوريا الجنوبيه يقولك …. احنا ممتنين للزعيم “باك تشونغ هي” لما فعله لنا … بالرغم مما ينسب اليه ….. فإننا نقف بإجلال امام تمثال هذا الزعيم الذي كان سبب للرفاهيه التي نعيش فيها.
طب ايه القصه بالظبط …. و ايه اللى عمله الراجل ده و اللى نفس الناشت الحكوكي بتاعنا انه يتعمل في مصر ….. شوف يا سيدي …. الراجل ده اول لما مسك عمل زي محمد على بالظبط ….. لم كل المعارضين ليه و قمع اي تحركات شعبيه او مظاهرات ضده … و الغي الاحزاب و اي من مظاهر الديمقراطيه اللى زرعتها امريكا من عام 1948 و غير الدستور تماما حتي يضمن بقاؤه حاكم اوحد للبلاد ….. و كانت المعتقلات تكتظ بمئات الالاف من المعارضين ليه …. و مفيش مصدر واحد موثق يقدر يقولنا عدد الاعدامات الجماعيه اللى حصلت بدون محاكمات ….. ففيه مصادر بتقول الالاف و مصادر تانيه بتوصل لمئات الالاف ….. لكن الكل بيجمع على ان كوريا تم حكمها بالحديد و النار طوال الـ 17 عام من حكمه ….. فكان الاختطاف و الاختفاء القسري اللى على حق ربنا و اللى بحق و حقيقي و اللى بينتهي بالاعدام هو سمة حكم هذا الزعيم….. و حتي الانتخابات اللى كانت بتجري في عهده كانت مزوره بشكل فج و صريح.
لكن ايضا الكل اجمع على حقيقه واحده ….. ان “باك تشونغ هي” كان وطني من الطراز الاول ….. و عنده رؤيه وطنيه لنهضة بلاده ….. و ان الكلام ده كان بيوجهه فقط لاى حد بيعارض تحقيق او تعطيل الرؤيه دي …. او حتي بيرفض يشتغل …. يعني مسك الكرباج لمده 17 سنة و خاللي الشعب يشتغل غصب عنه لغايه لما بقت كوريا بالشكل اللى شايفينه اليوم و في خطابه الشهير بعد توليه الرئاسة قال : ( ان لم نتغير نحن لن تتغير كوريا ) و من مقولاته ايضا ( يمكننا البكاء و السخط على احوالنا و يمكننا ايضا العمل على تغيير هذه الاحوال )
الراجل ده لما مسك الحكم قسم الشعب ثلاث اجزاء بالقوه المسلحه….. الرجاله تشتغل في الحقول و المصانع اللى كان بينشأوها …. و الشباب سهل سفرهم يشتغلوا بالخارج و اجبرهم على تحويل دخولهم بالعمله الصعبه لداخل الوطن … و الاطفال يتعلموا بالمدارس و النساء تخدم الاطفال و الرجال بالداخل ….. و مشى على هذا المنوال اغلب فترة حكمه …. و اللى من خلالها تغير الحال تماما في كوريا …. و مع السنين تأصلت ثقافه العمل …. اتعود الشعب هناك على نسيان الكلام في غير ما يفيد ….. و اصبح العمل الجاد خوفا من الاعتقال هي ثقافة الشعب هناك ….. و تغير الحال تماما ….. تم بناء كوريا الجنوبيا من تحت الصفر بكل ما تعني هذه الكلمه من معني …. و بعد ما كانت سيول العاصمه مجرد عشش عفنه …. اصبحت من احدث المدن ….. و تحولت كوريا الجنوبيه من ثالث أفقر دوله اسيويه …. الى أقوى اقتصاد اسيوى حتي الوقت الحالي…. و تكريما له ….. فقد قام الشعب الكوري الجنوبى بإنتخاب ابنته “بارك غيون هاي” … لتكون أول رئيسه أنثي لكوريا الجنوبيه .
طب يا ترى الناشت الحكوكي اللى طوال سنوات قاعد يمصمص في شفايفه و مصدعنا بوجوب تطبيق التجربه الكوريه في مصر ….. يا ترى نفسك نطبقها ….. طب يا ترى طوال السنوات السابقه و انت قاعد تشتم و تسب الدوله و الجيش و تنشر في اشاعات و تحارب اي مجهود بيتعمل لاى مشروع قومي و انت قاعد على الفوتيه في التكييف … حد اعتقل حضرتك ؟؟؟ …. حد اخفاك قصريا ؟؟؟ …. ده حتي الارهابيين اللى رفعوا السلاح على الشعب و قتلوا و فجروا لسه بيتعلفوا أكل في السجون في محاكمات بإجراءات طبيعيه و برده مش عاجب حضرتك …. طب يا ترى حتستحمل تشتغل ؟؟؟؟ …. و لا انت رافض مبدأ الشغل من اصله و عايز تعيش حياتك كلها تسفسط و تشاور بصباعك و تمصمص شفايفك و تقول مفيش فايده.
و على فكره … نفس التجربه الكوريه شغاله عندنا من 4 سنين مع ناس عايشين وسطنا و نجحوا نجاح باهر و في نفس الظروف اللى عايشين فيها …… و لكن مش بسبب العصايه و الكرباج ….. و لكن بسبب انهم لو فشلوا مش حيلاقوا مكان تاني يروحوا فيه لان دولتهم كانت بتروح منهم …. ابقي إسأل اي شاب سوري و هو حيقولك ازاي بدأ بفرش على ملايه في الشارع او بكام طبق اكل كان بيعمله في بيته و ينزل يبيعه ….. و دلوقتي بقي عنده محل و مطعم ملكه و مشغل عنده شباب مصري ….. إسأله و هو حيقولك انه عاش معاك نفس الظروف اللى انت عايشها …. بس الفرق انك كنت مشغول بالسفسطه الفارغه و النقاش و الجدل العقيم و محاولة اغراقنا بمركبات النقص و امراضك النفسيه و نشر طاقاتك السلبيه ….. في الحين انه مكنش عنده وقت غير للشغل و بس …..