09 Jan 2017
خواطر على الطاير
—————–
كوريا الجنوبيه و المانيا و البرازيل و غيرهم من البلاد اللى خرجت من عنق الزجاجه … لم تتقدم الا لما قضت على الفساد …. و لم تقضي على الفساد الا لما تحولوا الى دول قادره لديها الموارد الاقتصاديه و الانتاجيه الكافيه للقضاء على الفساد …… و ده محصلش الا من خلال تنقية او خلق البديل لكل الادوات الاقتصاديه و العلميه و السياسه و الثقافيه للمجتمع اللى مسيطر عليها الفساد زي السرطان ….. و مقدروش يحققوا ده الا من خلال توجيه كل موارد الدوله بمنتهي التركيز في فتره زمنيه مركزه فقط على مشاريع تنمويه و انتاجيه و زراعيه وامنيه ….. يعني مفيش صرف خاااالص على المواطن في اي خدمات او دعم …. يعني الشعوب بتاعتهم جاعت بمعني الكلمه لمدد لا تقل عن عشر سنوات ….. و لما بقي عندهم القدره الماليه و الاقتصاديه و ده اللى حصل بعد سنوات …… قدروا يفككوا شبكات الفساد اللى كان من نتائجه ان المواطن بدأ يشعر بتحسن الخدمات الصحيه و التعليميه المناسبه و الارتقاء بمستوى المواطن .
يعني ايه الكلام ده …. يعني واحد زي ” بارك تشونغ هي” صاحب نهضة كوريا الجنوبيه اللى قال ” اذا لم نتغير لن تتغير كوريا ” … و اللى في اقل من 24 ساعه استولى علي الحكم و اعتقل كل اعضاء البرلمان و الصف الاول و التاني و الثالث من الاحزاب و كل الصحفيين و الاعلاميين و الناشطين في الحركات الطلابيه …. و قاد بنفسه حملات اعدام ميدانيه لكل فرد يتحدث في السياسه او يرفض العمل اليدوي او المهني او يعمل بانتاجيه غير مناسبه … و مع اختلاف المؤرخين على اعداد القتلي في عهده لان الاعدامات بالرصاص كانت بتتم في مكان العمل و امام العمال و بدون سجلات … فالبعض يقدرهم بعشرات الالاف و الاخر بيصل الى مئات الالاف … الا ان الكل بيتفق ان الاسلوب ده خلق شعب يعمل و لا يتحدث …. ينتج و لا يستهلك …..
و بعد 10 سنوات …. بدأت رؤيته تؤتي بثمارها … و بعد ما كان الشعب الكوري يعمل بلا مقابل تحت تهديد الكلاشينكوف و يأكل وجبه بسيطه واحده في اليوم لا تكفي رمق جوع اسره بها اطفال … بدأت الدوله الكوريه في تفكيك و القضاء على شبكات المصالح و المنتفعين و بدأ الخير يعم على الشعب الكورى … اللى النهارده عامل للراجل ده تمثال و عندما تتحدث مع اي مواطن كوري … تجده يتحدث عن هذا الرجل بكل اجلال و احترام و يقول لك ” هذا الرجل هو سبب الرخاء الذى نعيش فيه الان بغض النظر عن ما حدث في عهده” .
نقول تاني ……. دوله زي المانيا … عندما تتحدث مع اي الماني … تجده يتحدث بكل فخر عن آباؤه … اللى عاشوا اكتر من عشر سنوات في عصر ما يسمى ” وجبة البطاطسايه” …. لان المانيا استخدمت كل موارد مشروع المارشال الامريكي لاعمار المانيا في توجيهها الى انشاء المصانع و المزارع و غيرها من الانشطه الاقتصاديه …. فكان الشعب يعمل فقط … و كان عايش في شبه مجاعه … و كل فرد كان يقتات طول يومه على حبه واحده فقط من البطاطس و لمده عشر سنوات اللى كان بيعدي عليهم شتاء اوروبا القارص …. و ده كان في وقت انتشر فيه طبقة اغنياء الحرب الفاسده اللى بتظهر بعد اي حرب و بتكون اغني من الحكومه ذات نفسها …. و لما اتبنت المصانع و الشعب انتج …. و اصبحت الدوله قادره و لديها الموارد الكافيه …. قدرت تفكك شبكات الفساد و تصرف على التعليم و الصحه و الشعب اتربي و اتعود على العمل فقط …. و كل لما حد فيهم يكسل يشتغل … يفتكر الجوع و المرار اللى كانوا فيه …. فيشتغل اكتر عشان ميشوفش المرار ده تاني .
و لاننا مش حنخترع العجله من تاني ….. تعالى نحسبها بطريقه تانيه ….. عندنا في مصر رجال الاعمال و اللى بيمتلكوا ثروات هاااائله كونوها في وقت صغير جدا و بهوامش ربح تتعدي الـ اضعاف راس المال بدورة راس مال قصيره جدا …. تلاقي معظمهم مش رجال صناعه … و لكن مجرد سماسره …. يشترى و يبيع للشعب اللى عايش عيشه استهلاكيه ….. و طول ما الشعب عايش عيشه استهلاكيه … هو حيفضل موجود و بيكسب …. و عشان ده يحصل … لازم يكرهك في العمل و الانتاج …. طب ده يحصل ازاي …..
يبقي لازم يمتلك شركات انتاج سنيما و مسلسلات و قنوات فضائيه و جرائد و مواقع الكترونيه …. كل شغلها انها تسود عيشتك و تكرهك في بلدك و في قيمة العمل … و توصلك انك تقتنع ان كلمة فلاح دي شتيمه و الصنايعي ده جربوع … و الشخص المجتهد عبيط و حيفشل …. و انك لو فكرت تشتغل تبقي خايب لانك حتفشل … و عشان تنجح لازم تكون فهلوى و حرامي و تعيش عيشه مش بتاعتك و ماسك موبايل تمنه اضعاف اجمالي دخلك …. المهم انك تصرف و خلاص … و تستعيب انك تشتغل بايدك ….. و المنظومه السرطانيه دي لازم ليها حمايه سواء قانونيه او تنفيذيه و ده يمكن بدأتوا تشوفوه في القضايا اللى بتتمسك اليومين دول …. و اللى مبدأتش تحصل غير لما مصر بدأت تتحول من اقتصاد السمسره و المعونات الخارجيه … الى الاقتصاد الانتاج الصناعي و الزراعي …. و اللى بتحارب حرب تكسير عظام من منظومة الفساد بالضغط على الشعب للانفجار الفوضوي عشان تفضل الشبكه العنكبوتيه دي موجوده اللى مش بتعيش غير على الفوضي و الفساد …. و ده من خلال افتعال العديد من الازمات الموجهه مباشرة للمواطن …. زي تخزين السكر و الرز و لبن الاطفال و الادويه و القمح و غيرها من الازمات المفتعله .
طب نقول حاجه تانيه …. تعرف ان في التاريخ ان اشهر جاسوس روسي كان كل مهمته انه يستغل مهام منصبه انه يعين الفاسدين فقط …. طب تعرف ان حلقة الفساد دي اصل تكوينها و زرعها كان من الخارج !!! …. طب عايز تتاكد ….. عمرك شفت شخصيه اعلاميه او شخصيه مشهوره تتقاضي ملايين الجنيهات في السنه الواحده …. حد منهم اتبرع لبلده او لصالح المجتمع !!!!! … طب عارف ليه ….. لان الخواجه اللى بيدير اللعبه فهمهم قانون اللعبه … ان الفلوس دي عشان تفضل معاك … لازم الدوله تفضل ضعيفه … و لازم المجتمع يفضل مفكك و عايش عيشه مش عيشته …. و طول ما عايش عويل و لا ينتج …. فانت في امان و فلوسك تزيد … لكن لو الناس فاقت و اشتغلت …. الشخصيات دي حتختفي تماما .
طب تيجي نقول حاجه تانيه …. حد طلب منك انك لو مشتغلتش حتتعدم و تموت ….لأ
حد طلب منك ان تعيش على بططسايه واحده في اليوم و انك ممكن تموت متجمد من البرد في الشتاء على الدوله تجني ارباحها …. لأ
حد طلب منك انك تشتغل بدون مقابل لغاية لما الدوله تقف على رجليها ….. لأ
حد قالك الدعم حيتشال تماما في 24 ساعه و دبر نفسك انت في عيشتك …. لأ ….. ده الدوله بتتوسع في منظومات الحمايه الاجتماعيه .
حد قالك جوع عشر سنين بحالهم لغاية لما الدوله تقف على رجلها … لأ … ده كل المطلوب منك ان تشتغل و تستحمل كام شهر بس .
حد قالك التعليم من النهارده للي بيدفع بس …. او تم الغاء علاج الامراض المزمنه المجانيه … لأ …. ده الدوله عالجت ما يقرب من مليون مواطن من فيرس سي مجانا .
كل المطلوب منك … ان تغير من نمط معيشتك … تقلل استهلاكك …. و لو دخلك من شغلك مش مقضيك … جدودنا قالوا لازم تغير عتب … يعني اتعلم صنعه و انزل اشتغل بضمير و بتفاني … حتنجح و تتغني زي ما حصل مع مئات الالاف من السوريين اللى جم على الحديده و اصبحوا اصحاب اعمل في اقل من 3 سنين و انت قاعد تشتكي على القهوه .
و نقول كمان …. مادام الدوله بدأت تفكك في شبكات الفساد اللى للاسف فيه ناس عايشين معانا عاملين نفسهم انهم اتفاجئوا ان فيه فساد … و لما الدوله و لاول مره تمد اديها و تفككهم …. بدل ما يدعم الدوله … قاعد يعايرها بمنظومة فساد عايشة معانا و مستقره من عشرات السنين .
قلنا قبل كده … ان عام 2016 هو عام الحسم السياسي …. و عام 2017 حيكون عام الحسم الاقتصادي و اللى الناس حتبدأ تحس بيه في النصف الثاني من العام الحالي …. و اللى حيحس بيه اكتر اللى بيشتغل بايده و مش قاعد على مكتب .
الخير جاي …. و اكتر مما يتخيل احد …. لكن اللى حيحس بيه بشكل حقيقي و سريع هو مواطن 2017 … اللى مش بيستعيب الشغل المهني و الانتاجي
تحياتنا .