10 Mar 2017
أثار مصر بين الحقيقة و الغرض
——————————
أكيد إنتم فاكرين لما قولنا إمبارح إن الشائعات هــ تزيد فى الفترة القادمة .. وأكيد أصدقائنا اللى متابعيننا من زمان عارفين إننا قولنا إن عام 2017 هو عام الشائعات والهرى الكثير … وبرضوا كل الأصدقاء فاكرين لما كنا دايما بنقول إن الهرى الكثير مش بييجى من الهوا كدة ، لكن بــ يكون دايما مرتبط بحدث معين ، يتم الحديث عنه بصورة مخالفة للواقع ، وتقليبه على الجنبين علشان اللى بيتكلم يظهر فى صورة إنه ياعينى خايف على البلد وزعلان عليها من المصير الإسود اللى مستنيها …
طبعا إحنا من إمبارح مافيش ورانا شغلانة غير متابعة الهرى اللى داير عن موضوع إكتشاف أثار المطرية ، وإن الجهل والفشل الإدارى اللى بــ تدار به الدولة خلانا نستخدم الحفارات واللاوادر علشان نطلع التماثيل الأثرية العملاقة من الأرض .. وإنه كانت النيجة إن اللودر ضرب سكينة الرافعة بتاعته فى جسم التمثال المسكين ودشدشه ، وطلّع التمثال حتت .. وياحسرتك يا مصر .. وياضياع ثروتك الأثرية يامصر .. وياخيبتك فى ولادك يا مصر .. وأدى نتيجة حكم العسكر اللى إحنا عايشين فيه ألخ ألخ ألخ …
والمشكلة إن اللى بيتكلم فى الموضوع ده ، وبالشكل ده ، إما إخوانى كان موافق من أقل من 4 سنين على تغطية الأثار بالشمع وكان مقتنع إنها اصنام وبقايا لحضارة وثنية ملحدة .. ومافيش احسن من الشريعة … وإما شخص مدعى ثورية ، كان موافق ومؤيد لتدمير المتحف المصرى ، بإعتبار إن الثورة اهم .. وكمان مؤيد وموافق على حرق المجمع العلمى وتدمير معظم الخرائط والكتب والمراجع الأثرية اللى فيه على إيدين احمد دومة وشلته ، بإعتبار إن ده الثمن اللى مصر بتدفعه لنجاح الثورة !!
ماعلينا .. وإحنا مش هــ نناقش الماضى ..
طبعا معظمنا شاف الصور اللى بيتم تداولها واللى إتعملت عليها بوستات ومقالات إنتشرت إنتشار النار فى الهشيم واللى بتصور رأس التمثال وهى متصورة مكسرة ، وبيتم رفعها باللودر .. وطبعا كل واحد داخل يكتب كلمتين وهو زعلان وبيمصمص شفايفه عن الإنهيار اللى مصر وصلت له .. وإحنا بدورنا مش هــ ندخل فى تفاصيل فنية لإننا مش هــ نعمل زى الخوابير الإستراتيجية اللى بتفتى فى كل شئ حتى فى الأثار .. لكننا هــ نتكلم كلام تانى خالص …
هو حضرتك مصدر المعلومة بتاعك إييه حضرتك !!؟؟ ..
الفيسبوك والصور المنشورة ..
إييه ده بجد !؟؟ .. يعنى هى دى كل مصادرك ؟؟
لأ كمان شوية مواقع ماعرفهاش بس الصور دى فضيحة وكارثة ثقافية لمصر !؟
طب حضرتك شوفت مراحل إستخراج التمثال !؟
لأ
طب حضرتك شوفت التمثال كامل قبل ما يتكسر !؟
لأ
طب حضرتك شوفت اللودر وهو بيضرب رأس التمثال وبيفشفشها !؟
لأ
طب حضرتك عارف هم إكتشفوا الأثار دى إزاى .. ومين اللى كان بيقوم بعملية إستخراجها !؟
لأ
طب بتصدق اللأجانب والصحف والمواقع الغربية التى لا يأتيها الباطل من بين يديها ولا من خلفها ؟؟
أيوة طبعا علشان هم ناس حلوين وكيوت ومش بيكذبوا ومش عبيد بيادة وامنجية ومطبلاتية زيكم
طب ماشى
بص يا سيدى ..
إحنا زى ماقولنا ، مش هــ ندخل فى مهاترات ومحاولة لإثبات كلام مين هو الأصدق .. لكننا هــ نقول لك شوية حاجات كدة
اللينك ده من موقع ناشيونال جيوجرافيك .. بيقول إن علماء الآثار من مصر وألمانيا إكتشفوا (((بقايا))) تماثيل ترجع للحضارة المصرية القديمة ، وبيعتقدوا إنها تنتمى لواحد من اشهر الحكام فى التاريخ القديم .. وفيه فيديو مرفق مع اللينك بيوضح إن التمثال كان مستقر فى مكانه و محطم لأجزاء ، قبل إزالة كامل الطمى من عليه .. (واخدلى بالك من كلمة بقايا دى ؟؟)
واللينك ده من الموقع الإخبارى بي بي سي .. واللى ذكر إن رئيس البعثة الألمانية، ديترش رو، أكد إن الجزء الذي رُفع من التمثال لم يُمس بسوء، ولم يتعرض للخدش أو الكسر، كما أُشيع في مواقع التواصل الاجتماعي، بل في حالة جيدة !!! … وعلى فكرة ده مش أول كشف للبعثة الأثرية الألمانية المصرية لأنهم موجودين فى مصر من فترة طويلة وعملوا إكتشافات فى سنة 2015 و 2016 و أخيرا 2017
و ده غير كلام عالم الأثار المشهور زاهى حواس اللى قال إن كل الأثار المصرية اللى تم إكتشافها فى حى المطرية محطمة منذ العهد المسيحى لأنهم كانوا بيعتبروها اصنام
وأدى كمان لينك من موقع سكاى نيوز واللى ذكر على لسان وزير الآثار المصري خالد العناني إن البعثة عثرت على جزء تمثال سيتي الثاني قبل بضعة أيام، بينما عثرت على التمثال الثاني يوم الثلاثاء .. وأضاف أنه من المقرر نقل أجزاء التمثال الثاني إلى موقع المتحف المصري الكبير في الجيزة، لترميمها وتجميعها، حتى يكون التمثال ضمن سيناريو العرض بالمتحف الذي من المتوقع افتتاحه جزئيا في 2018
و ده لينك لصحيفة الجارديان بيحتوى على فيديو فيه لقطتين بــ يوضحوا إن الحفر ماكانش باللودر فى البداية .. وإنه بعد ما تم إكتشاف التمثال .. بدأ الحفر باللودر على جانب التمثال لتوسيع الحفرة وتعميقها تمهيدا لرفع القطع الأثرية
وطبعا كل المواقع دى لو فيه شبهة إهمال أو تراخى أو تدمير للأثار المصرية اللى هى بتاعتنا صحيح لكنها تراث ثقافى للعالم كله .. ماكانش حد سمّى علينا .. وكان زمان فضيحتنا بجلاجل فى كل حتة .. وكان هــ يتقال اللى ماتقالش .. وكلنا طبعا عارفين تاريخ المواقع الإخبارية دى مع مصر
وعلى فكرة .. الترميم بيقوم عليه خبراء كبار على مستوى العالم ، وعملية تجميع الأثار المحطمة وترميمها بــ تكون عملية معقدة وصعبة جدا لحين عودها إلى حالتها الطبيعية .. مش زى ما اقنعوك إن الخبراء فى وقت من الأوقات ، لزقوا ذقن توت عنخ أمون بــ “صمغ أمير” =D =D
مرة اخرى .. إحنا مش خبراء اثار .. ومش هــ نناقش تفاصيل فنية فى كيفية رفع قطع اثرية من مكانها .. وكل ما نملكه بيانات وزارة الأثار وشهادة البعثة الألمانية وموقع محترم زى موقع ناشيونال جيوجرافيك … والأهم من ده كله إننا عندنا عقل نفكر بيه ، علشان يحفظنا من الإنزلاق فى فخ الإبتزاز الخبرى 😉 🙂
إحنا بالفعل مقدرين كل واحد غضب علشان بلده .. وزعل علشان المشاهد اللى شافها .. وبنفرق بين اللى زعلان من جوة قلبه علشان بيحبها بجد وعايزها احسن بلد فى الدنيا .. وبين اللى بيمثل على نفسه قبل ما بيمثل علينا إنه بــ يحبها .. و بــ يستغل أى حدث كنقطة إنطلاق للهجوم على الدولة أو النظام أو الحكومة لمجرد إنه مختلف سياسياً أو لغرض فى نفس يعقوب …. وعلشان كدة .. ارجوكم .. ارجوكم .. ارجوكم .. بلاش تنساقوا وراء معسول الكلام .. وماتخلوش حد يستغلكم لصالحه ابداً للهجوم على الدولة
ومش معنى كلامنا إن الدولة والحكومة لا يأتيها الباطل من بين يديها ولا من خلفها برضوا .. لأ طبعاً .. الغلط وارد .. وطبيعى يحصل .. لأننا مش جايبين حكومة من المريخ .. لكن قبل ما تحكم على شئ بإنه غلط او صح … لازم تتأكد من المعلومة .. وخصوصاً لما يكون الموضوع هيصة من ناس مغرضين .. وكلكم متابعين الفيسبوك وصفحاته ، وعارفين توجهات كل الصفحات دى إييه !!
مبروك لمصر الكشف الأثرى الجديد