13 Nov 2018
محاولة هدم الدولة المصرية باستهداف قوتها الناعمة – الجزء الاول
—————————————————————–
أعزاؤنا أصدقاء صفحة كلام في الصميم ……. مع الهوجة المتعمده لانتشار اخبار مجموعه من الرعاع و الافاقين و محاولة فرضهم على المجتمع كفنانين و مغنيين على المجتمع المصري ….. فـ موضوع النهارده هااااام جدا … و مع اننا اتكلمنا فيه كتييييير قبل كده في مقالات مختلفه… لكن المره دى حنركز في المقال ده على اهم ادوات القوه الشامله للدوله المصريه … و هى القوه الناعمه …. و اللى كانت و لا زال بيتم التركيز عليها و محاولة هدمها و ضربها بمنتهي القسوه …. لانها تعتبر من اهم الاعمده اللى بيرتكز عليها صلابة و مناعة الشعب المصري ضد الهدم و التقسيم و التدمير….. لكن اعزرونا …. مقال النهادره حيكون مقال دسم شويه و حـ يكون على اكتر من جزء …. لاننا زي ما اتعودنا ان تأصيل الامور مهم عشان نفهم الصوره الكليه بشكل صحيح ….. فـ معلش تعالى على نفسك شويه و كمله ….. و حضروا كوباية الشاي بتاعتنا ….. و ياريت تساعدونا في نشر محتواه داخل مجتمعكم بشرحه لاولادكم و اخواتكم ….
شوف يا سيدي …. اي دوله في الدنيا بيحميها حاجه اسمها القوه الشامله للدوله …. و دي بيكون ليها عناصر كتير … عدد العناصر دي و شكلها بيتوقف على حجم و قوة الدوله دي … و دي اللى بتستخدمها الدوله في الدفاع عن نفسها ضد اي عدوان او التأثير في محيطها للدفاع عن مصالحها و مصالح شعبها … او ممكن الامر يصل الى استخدامها في الدفاع عن وجودها نفسه … و القوه دي بتنقسم الى قسمين … قوه خشنه و قوه ناعمه ….. فعلي سبيل المثال … فالقوه الخشنه هي القوه العسكريه لجيش هذه الدوله اللى ممكن يتم استخدامه اما بطريقه مباشره بالهجوم المباشر على دوله اخرى … او بتدريب و تسليح و التخديم على ميليشيات و جماعات ارهابيه للقيام بمهمة تدمير دول اخرى …. او استخدام القوه الاقتصاديه و الضغط الاقتصادي لتحقيق هذا الهدف …… اما القوه الناعمه …. فبتبقي قوة بيتم استخدامها للتأثير على الدول الاخرى و اخضاعها … او الحماية من هجوم دول اخرى بدون اطلاق رصاصه واحده ….. زي القوه السياسيه و الثقافيه و الحضاريه …. و القوه دي مع انها بتكون مش قوه مباشره … لكن تأثيرها بيكون واسع المدي و عميق و اقوى بكتييييير من القوة الخشنه … و المناعه و الردع بتاعتها بتكون اكثر صلابه …. لكنها مش متاحه لكل الدول … و نادرا لما تلاقي دولة تمتلك عناصر كتير منها…. و مصر من الدول اللى ربنا انعم عليها بقدر هااااائل غير مسبوق من عناصر القوه الناعمه اللى مش موجوده في دول كتييييير و منها دول عظمى.
الدول المستقره بتحافظ على نفسها و مصالحها باستخدام القوه الشامله …. و في كتير من الاحيان شعوب الدول دي مش بتحس بمعارك طاحنه بدأت و انتهت و تم حمايتهم من دمار و خراب كتير … لان تم حمايتهم باستخدام عناصر القوه الناعمه من القوه الشامله …. زي مثلا في مصر … لما قعدنا سنين طويله مش بنسمع حاجه عن سد النهضه و ولا كنا حاسسين ازاي كان بيتم منع بناؤه … و اول لما تم ضرب مصر في هوجة احداث يناير ….. و انكمشت كل عناصر القوه الشامله للدولة المصريه للدفاع عن الدوله المصريه داخليا و الدفاع عن الشعب المصري و حمايته من نفسه من التفكك …. سابت فراغ كبير في مجال امنها الحيوي خارجيا … لقينا السد اتبني و كل من هب و دب شال حتتين سلاح و حاول يقتحم الحدود و بقينا نلاقي منظر المسلحين و قنابلهم في كل مكان في الشوارع.
و لان مفهوم القوه الشامله كبير جدا … و لا يمكن اختزاله في بوست على النت …. فإحنا حنركز على عنصر صغير من عناصره …. و هو عنصر القوه الناعمه الحضاريه…. و التأثير الحضاري و الثقافي.
و عشان نفهم يعني ايه القوة الناعمه الحضاريه و ايه مدي تأثيرها و خطورتها … فمثلا كان في وقت من الاوقات و ايام الحرب البارده بين الاتحاد السوفيتي و امريكا …. كان مجرد نجاح امريكا اللى عمرها مكملش 200 سنة بس في التغلغل في دوله بيسيطر عليها ايدولوجيا الاتحاد السوفيتي بنشر موضة البنطلون الجينز و البيبسي كولا و مطاعم الهامبرجر … نصر كبييييير للامريكان … لانه ببساطه امريكا و هي في بلدها و داخل حدودها … قدرت تنط داخل دوله تانيه و تغير من العادات اليوميه لشعب تاني و اللى حتلاحقة بعدها بافلامها و مسلسلاتها … ثم برامجها و لغتها و لكنتها الانجليزيه … و مع الوقت الشعب ده بيتحول الى شعب متعاطف معاها… و بيوصل الامر انه يكون داعم لمواقفها السياسيه.
و لو جينا طبقنا الكلام ده على مصر … حنلاقي مصر و طوال آلاف السنين و حتي الان … كان تأثيرها الحضاري رهييييب على محيطها الاقليمي و العالمي …. فقديما … مصر كان عندها مخزون حضاري هااااائل …. و وصلت قوة مخزونه الحضاري لدرجة ان شعبها كان بيبلع و بيصهر داخله اي حضاره اخرى تحاول التسلل اليه او فرضها عليه بالقوه مهما كانت قوتها …. حتي في الاديان …. فمثلا مع دخول المسيحيه لمصر …. تلاقي فهم المصريين للمسيحيه فهم ناضج و مختلف عن اي مكان تاني … و تلاقي عندنا الكنيسه المصريه المستقله بشخصيتها و ايمانها عن باقي كنائس العالم و اللى حارب المصريين و قاوموا كل محاولات الرومان من فرض فهم كنيستهم على المصريين … و نجحوا بالفعل في الحفاظ على عقيدتهم و فهمهم الخاص للمسيحيه ….. و حتي مع دخول الاسلام مصر …. و بالرغم من دخول الاسلام عن طريق مجتمع مختلف تماما في عاداته و تقاليده عن المجتمع المصرى … و بالرغم من محاولات فرض عادات غريبه علينا او فرض مذاهب معينه على شعبها زي مثلا لما انشأ الفاطميين المسجد الازهر و جامعته لنشر المذهب الشيعي لمصر … فشلوا لمئات السنين من فرض المذهب الشيعي او فرض فهم غير الفهم الذي اقتنع بيه المصريين … و اصبح لمصر مدرسه فقهيه و فهم خاص بيهم و تم تحويل الازهر الى جامعه تحافظ و تنشر الفهم المصري الوسطي للاسلام بعكس الهدف اللى أنشأ الازهر من أجله.
و بعيدا عن النرجسيه و الشيفونيه الوطنيه …. الموضوع له ليه تأصيل تاريخي تحميه حكمة و اراده ربانيه هى من تحفظ هذا المخزون الحضاري في جينات الشعب المصري…. و التي كانت دائما و ابدا الملجأ و الملاذ الآمن للجميع … و هي و شعبها كانت رقم الحل في اصعب المعادلات و البلائات التي كان يبتلي بها شعوب المنطقه … و الصخره التي يتحطم عليها المخاطر.
- فالارض الوحيده التي تجلي الله عليها و تكلم فيها … هي مصر
- و الدوله الوحيده التي ذكرت في القرآن صراحة هي مصر
- و الدوله التي قرن اسمها في القرآن بالامن و الامان هي مصر
- و الدوله التي اقترن اسمها بخزائن الارض في القرآن هي مصر
- و الدوله التي اقترن اسمها و شعبها بمباركة الله في الانجيل هي مصر
- و الدوله التي علمت العالم الكتابه و نشأ من اهلها سيدنا ادريس اول من خط بالقلم في التاريخ هي مصر
- و الدوله التي لجأ اليها سيدنا ابراهيم من ظلم اهله هي مصر
- و الدوله التي لجأ اليها سيدنا يعقوب و اخوات يوسف من المجاعه هي مصر
- و الدوله التي لجأ اليها السيده العذراء و سيدنا المسيح عليه السلام هي مصر
- و الدوله التي لجأ اليها آل بيت سيدنا محمد بعد ما تم مطاردتهم و تقتيلهم و نكل بهم في العراق و الشام … هي مصر … حتي ان السيده زينب دعت لمصر و شعبها الدعاء الشهير ” يا أهل مصر، نصرتمونا نصركم الله، وآويتمونا آواكم الله، وأعنتمونا أعانكم الله، وجعل لكم من كل مصيبة فرجًا ومن كل ضيق مخرجًا”.
- و السيده هاجر المصريه … هي من خرج من رحمها سيدنا اسماعيل ابو العرب جميعا.
- و الدوله التي اوصي بها و بأهلها خيرا النبي محمد هي مصر.
و بالرغم من تتابع قوى الاحتلال العسكري على مصر من اول اليونان و الرومان و حتي اسوأ فترة احتلال في تاريخ مصر و هو الاحتلال العثماني اللى كان بيتعمد اضعاف و محو الشخصيه المصريه و اذلالها …. و تفريغ مصر من المبدعين في جميع المجالات و ارسالهم الى الاستانا لاستعبادعم و استخدامهم لتطوير عاصمتهم … و تفريغ الدوله من الشباب في استخدامهم في جيوشهم …. الا ان مصر كانت دائما عندها المخزون الحضاري الغزير الذي كان لا ينضب ابدا و اللى كان بيضخ المبدعين و القاده و الوعي الجمعي بين الشعب و اللى كان بيظهر في وقت الشده ليس في التأثير على كل الشعوب المحيطه منه … و لكن لانقاذه المنطقه كلها من الاخطار المحيطه بيه.
و لو نظرنا الى العصر الحديث … سنجد ان مثلا اللهجه المصريه لها تأثير طااااغي و ساحق من المحيط الى الخليج … فهي اللهجه المحببه و المفهومه لكل العرب …. و كان في فترة من الفترات …. كان العرب جميعا من المحيط الى الخليج تتوقف الحياه تماما في شوارعهم و بيوتهم لمتابعة حفلة من حفلات ام كلثوم او خطاب سياسي لعبد الناصر …. و كانت مصر تسيطر تماما على الثقافة العربيه و الفن العربي تماما … مما خلق اجيالا عربيه كان منهم قاده و صناع قرار في بلادهم متيمه بحب مصر و عشقها….
و عشان نعرف تأثير مصر سياسيا و حتي ايدولوجيا على الشرق الاوسط و افريقيا … فستجد مدي تأثير قوة مصر الناعمه الرهييييب عندما اخذت قرارها و تحولت من ملكيه الى جمهوريه تدعم تحرر الشعوب من الاستعمار … لتجد بعدها دول افريقيا بالكامل و الدول العربيه تحذوا حذوها تباعا الدوله تلو الاخرى.
و حتي لما بدأت الحرب العالميه الثالثه الجاريه الان على اراضي المنطقه بتخطيط و ادارة من الدول العظمي … كانت بيتم الاعلان علانية ان مصر هي الجائزه الكبرى … و بالرغم من نجاح هذه الحرب في مخططاتها في دول المنطقه في سوريا و العراق و ليبيا و اليمن … الا ان تأثير مصر كان طاغي عندما اتخذ الشعب المصري قراره برفض هذه الحرب و الوقوف امامها و وجوبية تدعيم الدول و الجيوش الوطنيه … لنرى بعدها استنهاض جيش العراق الوطني و الليبي و اليمني مرة اخرى…. و نرى البلاد الافريقيه تفتح ذراعيا بشوق الى الدور المصري الفاعل في قارتها…. و حتي مع توجه مصر الفاعل على الارض الى ترسيخ مبادىء التنميه المستدامه و رؤية 2030 و الانتقال من الاقتصاد الريعي الى الاقتصاد الانتاجي و الغاء الدعم و ان تتحول ثقافة الشعب من الاسترخاء انتظارا للمساعدات و الدعم الاقتصادي سواء الداخلي او الخارجي الى ثقافة العمل و الانتاج … لتجد هذا المصطلح و التوجه اصبح منهج العديد من دول المنطقه.
اللى فات ده كله هو عباره عن مقدمه الى موضوعنا … و هو تأثير و اهمية القوة الناعمه الحضاريه للدوله و الشعب المصري على محيطها و مجالها الحيوى …. و عشان نعرف قد ايه هذا العنصر يعتبر حاسم و هام في بقاء الدوله المصريه …. و لو جينا نفكر بعقل الشيطان و اهل الشر … حنلاقي ان هذا العنصر هو اول عنصر يجب ضربه و هدمه اولا اذا اراد اهل الشر هدم الدوله المصريه.
و لو ربطت حضرتك الكلام ده ببعض الظواهر اللى شوفناها بعينا و عيشناها … و الخطوات الممنهجه و الهجوم الشرس اللى كانت بتتم على ارض مصر لاستهداف التاريخ المصري و تشويهه و سرقة و تدمير و طمس التاريخ و الفن و الثقافة و الاخلاق المصريه على مدار ال 50 سنة الماضيه بداية من السبعينات …. و ازاي بيتم خلق جيل جديد عبارة عن كائنات زومبيه لن تعرف في حياتها غير هدم دولتها و مجتمعها ….. حتعرف قد ايه مصر بتواجه حرب لم تواجهها من قبل.
و ده اللى حنتكلم عليه في الجزء القادم ان شاء الله
تحياتنا ليكم