06 Jan 2015
و تظل ثقافة حسن و مرقص و كوهين هي سر الشعب المصري
———————————————————–
الصورة دي من فيلم غزل البنات و هو آخر فيلم لنجيب الريحاني إنتاج 1949 يعني منذ 66 سنه .
المشهد ده من أشهر المشاهد الكوميدية اللى إتحفرت في الوجدان الثقافي للشعب المصري و كلنا حافظينه عن ظهر قلب و بنضحك عليه مهما إتكرر و مهما شوفناه.
ولكن هل تعلم أن المشهد ده بيعبر عن سر من أسرار لوغاريتم المجتمع المصري الحقيقي و بيعبر عن سماحته و تأصل ثقافة المواطنه الحقه و التحضر و الرقي و التسامح و احد اسباب تماسك البلد دي طوال 7000 سنة 🙂 🙂
هل تعلم أن هذا المشهد يجمع ما بين :-
- سليمان نجيب قبطي مصري مسلم الديانة
- نجيب الريحاني قبطي مصري مسيحي الديانة
- ليلي مراد قبطيه مصريه يهودية الديانة
طب تعرف ان المشهد ده بيتكرر كل يوم لغاية النهارده بس احنا بس اللى مشغولين بمشاغل حياتنا ….. و إن فيه تركيز كبييييير عليك و من سنين طويلة إنهم يحاولوا يغيّروا الحقيقة دي …. لكن خلاصة المشهد ده متأصلة داخل جينات المصريين و فشل كل اللى حاول إنه يغيرها
مش مصدق ؟؟ …
طب فاكر الفطار الجماعي من سنة و نص لما فطرنا مسلمين و مسيحيين مع بعض … و أذان المغرب لما كان بيدق معاه جرس الكنيسة …. طب فاكر حرقة قلب المواطن المصري لما اقتحموا الكتدرائية و حرقة قلب نفس المواطن المصري لما اقتحموا الازهر الشريف !!؟؟
دي مصر وعمرنا ما هــ نتغير رغما عن أنف المجانيين و المتطرفين اللى منهم عايز يطرد المسيحيين زي ما حصل في العراق ….. أو اللى عايز يطرد المسلمين بحجة الاحتلال الاسلامي لمصر.
وزي ما قلنا في مقال ” حروب الجيل الرابع و مصر العصية القاهرة ” … إحنا قاعدين هنا … و اللى مش عاجبه يمشي هو 🙂 .
كل سنة و كل المصريين طيبين بميلاد سيد الخلق سيدنا محمد صلى الله عليه و سلم.
و كل سنة و كل المصريين طيبين بمناسبة ميلاد المسيح عليه افضل السلام