حدث بالفعل

03 Mar 2015

 حدث بالفعل

————

و عزة و جلال الله ما في شعب في العالم في عظمة و قوة و شجاعة الشعب المصري

انا اول مره حتكلم عن حاجه و موقف حصل معايا شخصيا …. لكن انا حبيت اني اشرككم معايا 🙂 🙂

النهارده حصل ليا موقف غريب ….. فكرني بكلمه قالهالي شخص اجنبي …..” انتم شعب غريب …. اللى بيحصلكم من اربع سنين لو في اي دوله اوروبيه كان قضى عليها في اقل من شهور معدوده …. لكن انتم فيكم حاجه مش عارف افهمها او اوصفها ” …. 🙂

 عايزين تعرفوا ايه اللى حصل ؟؟ …. النهارده الصبح و على الرصيف قدام البيت اشتبهت في قنبله ….  🙂 🙂  فانوس عربيه خلفي كامل و سليم محطوط على الرصيف و الناس رايحه اشغالها الصبح و تعدي من جنبه عادي …. و حتي عامل النظافه كان بيكنس الرصيف …. و و لما شافه …  قلق منه قام نازل من الرصيف و مكمل شغل على الرصيف التاني بعيد عنه ….

 المهم نبهت على امن العماره ان مايخليش حد يجي جنبه …. و لان فيه كمين امني كبير على مسافة ٥٠ متر فقط من البيت  …. ذهبت فورا اليهم و بلغتهم باشتباهي بوجود قنبله …. و هنا بقي …. خاللي بالكم من اللى حصل ….  🙂 🙂

اول لما بلغت و مع ان الناس اللى واقفه لسه مغيرتش النبطشيه بتاعتها ….. يعني سهرانين طول الليل و طالع عنيهم في الشارع …. لقيت امين شرطه و مخبر مباحث اتحركوا في ساعتها و بمنتهي الاهتمام …. و بطيبة المصري اللى مليانه تحدي ….  لقيته بيقول لزميله و هو بيضحك بلهجه ريفيه جميله ” خلاص افطر انت يا مصطفي ….   باينلي حستشهد على الصبح ….. يلا بينا يا باشا و ريني فين القنبله دي “

رحنا للمكان و بصراحه قبل مكان الفانوس ب ٢٠ متر رجلي تقلت و وقفت …. 🙂 🙂   لكن لقيته هو مكمل عادي خالص بمنتهي الثبات …. و بص على الفانوس كويس و لقيته بيقولي …. ” شكله يا باشا مفيهوش حاجه ” … قلتله طب خاللي بالك .

لقيته بيقولى ” متخافش …بقولك شكله مفيهوش حاجه …. استني كده !!!! ” …. و لقيته عمل اغرب اختبار للقنابل في حياتي  🙂 🙂 …. قام شايطه برجله بمنتهي القوه في الحيطه 🙂 🙂  …. و قام باصص لي و هو بيضحك و يقول ” مش قولتلك يا باشا مفيهوش حاجه … 🙂  “.

 بالرغم اني اتناقشت معاه ازاي يعمل كده في قنبله محتمله … و ازاي هو شرحلي ان بيتم تدريبهم على التعامل مع المواقف دي و انه بأقل الامكانيات بيتعاملوا يوميا مع بلاغات كتير جدا و بيعرفوا يحددوا اذا كانت قنبله فعلا و لا لأ .

 و قبل ما حديقولي ازاي يتعامل بالشكل ده و المفروض يكون فيه امكانيات و فين التجهيزات و الكلام الكتير ده … انا حبيت اشرككم معايا في اللى حسيت بيه في اللحظه دي ….. الناس دي بتقابل الموت 100 مره كل يوم …. و بيواجهوه بكل روح معنويه مرتفعه … و بمنتهي التحدي و بدون كلل او ملل … و بيستحملوا نقص الامكانيات و المعدات و بيفدونا بدمهم.

ارهاب مين اللى يغلب الشعب ده ؟؟؟

داعش و ماعش مين اللى تغلب الشعب ده ؟؟؟

الموقف ده لو حصل في اي حته في العالم كان الشارع اتقفل و الدنيا اتهدت …. لكن فرد واحد بسيط في الامن عنده اسره و عيله و بيتعامل مع قنبله ممكن تحوله الى اشلاء بكل روح معنويه مرتفعه و تحدي ….. و لو طلعت قنبله فعلا …. كان الناس كلها اتلمت عليها تتصور سيلفي معاها قبل ما تنفجر …

قولنا كتير ان الجيش المصري رجال و ان الشرطه المصريه رجال

انا بختصرها و بقول ….. الشعب المصرى رجال

لمتابعة تعليقاتكم