شكر خاص .. و .. واجب

07 Apr 2015

شكر خاص .. و .. واجب

——————–

بعد المناظرة المهزلة اللى عملتها قناة القاهرة والناس بين إسلام البحيرى وعبد الله رشدى ، واللى كانت بمثابة الصدمة بالنسبة لناس كثيرة .. ويمكن علشان كدة كانت صورة المقال النهاردة للمتناظرين وكل واحد ظهره للثانى ، كنايةً عن إن كل واحد فيهم كان فى وادى لواحده .. والمتابعين لهم فى وادى ثالث … !!

ولأن الموضوع كان حساس ، و بــ يمس ثوابت عند ناس كثيرة قوى ، سواءً المؤيدين أو المعارضين لكلا الطرفين ، .. إنتقلت الصدمة دى من قناة القاهرة والناس إلى المواقع الإخبارية ، ومواقع التواصل الإجتماعى ، وبالذات موقع الفيسبوك ..

حوارات ، ونقاشات ، وجدال فى كل الصفحات والجروبات ، وكله داخل بيدلى بدلوه .. وكل واحد بــ يعبّر عن نفسه وعن وجهة نظره .. لكن الشكل النهائى بكل أسف ماخرجش عن حاجة من ثلاثة .. إما ناس داخلة بــ تشتم فى مؤسسة الأزهر .. أو ناس داخلة بــ تلعن سنسفيل جدود إسلام البحيرى .. واللى أدى فى النهاية إلى الحاجة الثالثة ، وهى إن دوول و دوول إشتبكوا مع بعض فى وصلات من السباب والشتائم والتنابذ بأقذع الألفاظ سواء بينهم وبين بعض ، أو حتى بينهم وبين الأدمن على حسب توجهات الأدمن ده .. 🙂

إلا فى صفحة كلام فى الصميم 🙂 🙂

 صفحة كلام فى الصميم اللى بــ تعتبر من الصفحات الصغيّرة على مستوى الفيسبوك من حيث عدد الأعضاء .. لكنها من أعلى الصفحات تفاعلاً سواء من حيث عدد الإعجابات ، أو المشاركات ، أو التعليقات ، وأكثرها تأثيراً .. مقارنة بصفحات كبيرة يتخطى عدد أعضائها الــ 300 ألف ، و الــ 400 ألف عضو !

 الشئ الملفت واللى كان مدعاة للفخر ، إن كل التعليقات كانت مثال للإحترام ، والمستوى الحوارى الراقى ، سواء مع الأدمن أو حتى بين أصدقائنا وبعض .. لدرجة إننا لم نحذف غير تعليق واحد فقط ، هو اللى تجاوز الخطوط الحمراء .. وأعتقد إن صاحب التعليق ده مش من أصدقاء الصفحة بكل تأكيد .. يعنى دسيسة علينا =D =D

 الشئ الملفت أكثر ، هو إن معظم التعليقات كانت تتسم بالعمق الشديد ، وبــ تناقش الفكرة بموضوعية شديدة جداً .. ومش بــ تأخذ بالظاهر والقشور .. و ده معناه حاجة واحدة بس ، وبدون أى مجاملة .. إن صفحتنا بــ تجمع أرقى مجموعة من الأصدقاء من مختلف الأعمار على مستوى الأعضاء الناشطين فى الفيسبوك المصرى من حيث الفكر أو الأخلاق والإحترام 🙂

 صحيح بعض التعليقات كانت بتعكس بعض الغضب المكتوم ، أو العصبية ، أو التحيز للرأى المؤيد لكلا الطرفين .. واللى أرهقنا بجد على مدار يومين كاملين فى الرد على التعليقات اللى من النوع ده ، ومحاولة الوصول لنقطة إلتقاء تفيد الجميع حتى من اللى بيقرأ التعليقات من غير ما يعلق هو بنفسه .. لكن ده كان شئ طبيعى ومتوقع فى موضوع حساس بالدرجة دى .. 🙂

إحنا المفروض إننا كنا عايزين نستكمل النهاردة رؤيتنا السياسية فيما يخصر عمليات عاصفة الحزم .. لكننا رأينا إنه من الأولى .. بل ومن الواجب تقديم الشكر لجميع الأصدقاء على المستوى الراقى اللى وصلت له صفحة كلام فى الصميم ، واللى عمرنا ما كنا ممكن نوصل له _بعد فضل ربنا_ غير بمساعدتكم وتفاعلكم الراقى والمتحضر .. 🙂

 أصدقاؤنا أصدقاء صفحة كلام فى الصميم:

نشكركم مرة ثانية .. ونفخر بكم جميعا .. وحضراتكم كمان من حقكم تفخروا بنفسكم .. وتقولوا لكل معارفكم ، وأصدقائكم ، إنه لسه فيه أمل فى بكرة .. وفيه مستقبل أفضل .. بعقل واعى ، وفكر راقى مستنير ، ولغة حوارية متحضرة ، وتديّن وسطى ، و وطنية قوية وصارخة محبة لبلدها .. و الدليل هو أنتم .. و .. وصفحة كلام فى الصميم 🙂 🙂 🙂

لمتابعة تعليقاتكم