أخيرا صدر تقرير الــ "هيومان رايتس ووتش" أو مراقبة حقوق الإنسان علشان يكشف حقيقة اللى حصل فى فض إعتصام رابعة .. واللى مش لاقى أى وصف أوصفه بيه غير المقولة الشهيرة "سكت دهراً ، ونطق كفراً" ..
إختصاراً كدة وعلشان ما أضيّعش وقتكم ، التقرير بيقول إن قوات الأمن عمدت إلى استخدام القوة المفرطة والقتل العمدي للمتظاهرين، مما أدى إلى قتل عدد كبير من المتظاهرين بشكل غير مسبوق في مصر .. وإن اللى حصل ده يصل إلى أن يكون «جرائم ضد الإنسانية»، بسبب المنهجية في القتل ونطاقها الواسع !!
وقال كمان إنه فيه أدلة على استخدام بعض المتظاهرين الأسلحة النارية خلال عدد من الأحداث ، .. لكن الكلام ده لا يبرر عمليات القتل الممنهجة التي قامت بها قوات الأمن ضد المتظاهرين السلميين ... ( لأ .. بصراحة كتر خيركم !!) .. ثم انا مش عارف إزاى المتظاهرين إستخدموا الأسلحة النارية ، وفى نفس الوقت يكونوا سلميين !!
طبعاً بغض النظر عن إن التقرير جاء مجحفاً لمصر كالعادة ، لكنه أورد أن حصيلة قتلى "ميدان رابعة" يصل إلى 817 قتيلاً على أقل تقدير، وقد يصل العدد الحقيقي إلى ألف قتيل !!! ... والكلام ده ينسف أكاذيب جماعة المفسدين من الأساس ويبطل نغمة أعداد القتلى اللى بيقولوها واللى تمت الطنطنة بها بشكل مبالغ فيه ، على جميع مواقعهم وفى كل المحافل الدولية ، واللى تراوحت من 5000 إلى 12000 قتيل !
نرجع بقى لتقرير المنظمة المحايدة واللى طبعا أغفل عدة نقاط منها النداءات المباشرة للمعتصمين للخروج لأنه سيتم الفض ، والممر الأمن إللى تم توفيره لخروج المعتصمين .. ده غير إن الإعتصام اللى يتم فضه فى 14 ساعة ويتم إطلاق النيران فيه ، لا يمكن أن يكون إعتصاماً سلمياً .. وكمان إن 45 ضابط شرطة يسقطوا فى أول 20 دقيقة من عملية الفض ، يخلى حكاية إعتصام سلمى دى مجرد كذبة دمها تقيل قوى !!
فيه حد بقى لسة عايز يتكلم عن حيادية وموضوعية المنظمات الحقوقية الغربية ومنها الــ "هيومان رايتس ووتش" .. وإلّا السياسة بتلعب لعبتها القذرة !!؟؟ ...
وللتذكير فقط .. و زى ما قولنا قبل كدة أكتر من مرة .. وياريت حد يجاوب:
كانت فين الــ "هيومان رايتس ووتش" عندما مات من مات فى أول ايام الثورة على إيديين الإخوان المسلمين !!؟؟
كانت فين الــ "هيومان رايتس ووتش" فى أحداث سيدى جابر !!؟؟
كانت فين الــ "هيومان رايتس ووتش" فى أحداث سيدى بشر فى الأسكندرية !!؟؟
كانت فين الــ "هيومان رايتس ووتش" فى أحداث قتل الشيعة فى مصر !!؟؟
كانت فين الــ "هيومان رايتس ووتش" لما تم سحل المتظاهرين فى الإتحادية (1) أيام الحكم الإخوانى الميمون !!؟؟
كانت فين الــ "هيومان رايتس ووتش" لما تم خطف و قتل الجنود المصريين فى سيناء !!؟؟
كانت فين الــ "هيومان رايتس ووتش" لما تم قتل جنودنا فى رفح !!؟؟
كانت فين الــ "هيومان رايتس ووتش" لم تم قتل اعداد كبيرة من ضباط ومجندى الشرطة والجيش فى مواجهات مع الجماعة فى خلال الــ 6 أشهر التى أعقبت ثورة 30 يونيو .. تلك الأعداد التى لا يمكن ان تسقط من أى جهاز للأمن الداخلى على مستوى العالم فى هذه المدة إلا إذا كانت الدولة حقيقة فى حالة حرب !!!!!
بلاش ده كله ..
كانت فين الــ "هيومان رايتس ووتش" وموقفها من سجن جوانتانمو وأبوغريب !!؟؟
كانت فين الــ "هيومان رايتس ووتش" وإييه كان موقفها من سفوط شهداء فلسطين وما يفعله الصهاينة بهم !!؟؟
كانت فين الــ "هيومان رايتس ووتش" عندما تم قتل أكتر من نصف مليون مدنى بقنابل الإحتلال فى العراق !!؟؟
كانت فين الــ "هيومان رايتس ووتش" من اللى عملته الشرطة التركية بالمتظاهرين فى ميدان تقسيم !!؟؟
كانت فين الــ "هيومان رايتس ووتش" من اللى عملته قطر فى المتظاهرين اللى نزلوا يطالبوا بتغير نظام الحكم !!؟؟
وحتى فى كاس العالم الماضى ، كانت فين الــ "هيومان رايتس ووتش" من الإنتهاكات اللى عملتها الشرطة البرازيلية مع المتظاهرين !!؟؟
القائمة تتسع وتطول ولا تقل ، والمؤسف ان هناك من يسيرون وراء هؤلاء الذين يكيلون بمكيالين لغرض فى نفس يعقوب
أما فيما يخص إعتصام رابعة نفسه وما فعلته جماعة الشر ومؤيديها ، فلهذا حديث أخر غداً بإذن الله
اللهم إحم بلدنا من كل سوء وإحفظها من كل ما يحاك لها وممن يكيدون للنيل منها
