5 Nov 2014
نشكركم على حسن تعاونكم
————————–
طبعاً بما إن الإعلام بتاعنا عاملين ودن من طين و ودن من عجين ، و اللى بيتكلم منهم ، فهو بيتكلم على إستحياء و بــ يمر مرور الكرام ، فــ كان لازم إحنا بقى ننوه عن الموضوع ..
الدولة المصرية بتخوض حرب شرسة جداً هذه الأيام فى جنيف فى مقر المجلس الدولى لحقوق الإنسان التابع للأمم المتحدة وسط حضور وفود 120 دولة وعدد من المنظمات الدولية والعربية .. وطبعاً الموضوع ده نتيجة تأليب الناشطين الإخوان والتنظيم الدولى للجماعة لكل دول العالم على مصر بالأكاذيب والمال والضغوط الإقتصادية والإعلام المرتزق المسيّس ، فى كل ما يخص وضع الجماعة فى داخل مصر ، وتصوير نفسهم فى صورة الحمل الوديع اللى بــ يتم إنتهاكه وقتله والتنكيل به من جانب سلطة الإينكيلااااب 🙂
لكن ماتخافوش ، لإن الوفد المصرى كان مذاكر صح ، ومحضّر كويس قوى ، وجاهز للرد على كل الإستفسارات وصد كل الهجوم بالإضافة إلى إنهم عرضوا فيلم وثائقي مدته 15 دقيقة عن جرائم الإخوان فى مصر، خلال الفترة اللى فاتت ..
وفى الوقت اللى فيه قنوات الإعلام المصرى واخدين أجازة وضع 🙂 أو بــ يشربوا حجرين معسل على القهوة ، .. طبعاً قناة الجزيرة كان لها السبق فى متابعة الحدث متابعة كثيفة كالعادة ، .. وإستضافة المحللين والضيوف علشان يمعنوا فى تضليلهم وإنحيازهم الأعمى ، واللى معظمهم ما لاقوش أمام إحترافية الأداء بتاعة الوفد المصرى غير إنهم يفضلوا يرددوا إن ده كذب وإفتراء ، لكن بدون أى دليل أو حجة يردّوا بيها على ما يقدمه الوفد المصرى 🙂
الطريف بقى فى الموضوع إن جزء مش بطّال من التحضير ، و المذاكرة ، والأدلة اللى كان محضّرها الوفد المصرى كان مأخوذ من الفيديوهات المصورة لقناة الجزيرة ، وخصوصاً كل ما يخص إعتصام رابعة الــ …. سلمى .. وكل ما يتصل به من تحريض ، وسباب ، وتكفير ، وتحدى ، وهجوم على الشعب المصرى وجيشه .. وكمان كل التهديدات اللى متسجلة صوت وصورة .. وطبعاً بالإضافة إلى كل ما هو مسجل من مصادر أخرى بــ توضّح عمليات القتل والحرق والتكسير والعنف اللى بيأكد كل الكلام اللى جاء على لسان أفراد الجماعة ، و ده غير توثيق كل حالات الوفاة اللى حدثت على إيدين المنتمين للجماعة الملعونة واللى بلغ حوالى 2900 شخص بالإضافة لدحض كل الأكاذيب بتاعة الربعاوية عن موضوع الــ 15000 واحد اللى ماتوا فى فض إعتصام رابعة.
طبعاً كلنا عارفين مجلس حقوق الإنسان ، وإن لجانه كلها مسيّسة ، ويارب بس يبقى عندهم دم لأول مرة ويقولوا كلمة حق ، .. لكن أنا بجد شعرت بالفخر لهذا الأداء الرائع للمصريين ، واللى لما بيحبوا يعملو حاجة صح ، بيعملوها صح …
أما فيما يخص قناة الجزيرة ، فأنا بعد اللى حصل ، وبعد الأدلة اللى إستخدمها الوفد المصرى من تسجيلات الجزيرة .. واللى هى نفسها اللى إستخدمتها الجهات الأمنية فى الإيقاع بالإخوان ، واللى هــ يستخدمها برضوا القضاء المصرى كأدلة إتهام ، .. إفتكرت المسلسل الشهير من ملفات المخابرات «دموع فى عيون وقحة» .. وحبيت أقولهم نفس الجملة الشهيرة اللى إنتهت بها واحدة من أنجح عمليات جهاز المخابرات المصرى فى حرب العقول وهى:
«نشكركم على حسن تعاونكم معنا»
وإلى اللقاء فى عمليات أخرى 🙂