خوارج آخر الزمان

4 Feb 2015

 خوارج آخر الزمان

——————-

 بعد الحادثة البشعة اللى حصلت بقتل الطيار الاردنى البطل الرجل للنهاية معاذ الكساسبة .. فكلامنا النهارة يمكن يكون صادم للجميع وبكل اسف كنا مأجلين الحديث فيه من فترة طويلة لكن دلوقتى جه أوان فتح الموضوع .. واللى هيستمر معانا فترة طويلة لاننا هنعيد فتحه والحديث فيه ، ولن نمل من تكراره ما ابقانا الله وما بقيت صفحة كلام فى الصميم !!

 وكلامنا النهاردة هايبتدى بسؤال !! ..

هو ليه كلنا اتفاجئنا باللى حصل !!؟؟

 ناس كتير بكل اسف بتمثل دور ممدوح وافى فى مسرحية الهمجى لما قال “أنا مذهوووووول” .. واحنا هنرد برضوا برد الفنان محمد صبحى لما قال له “اتفاجأت يالاه” !!؟؟

 كنا منتظرين اييه من مجموعة من القتلة السفلة سافكى الدماء وهم بيتكلموا بإسم الدين !!؟؟ ..

كنا منتظرين اييه من مجموعة من المرتزقة صنيعة الغرب اللى عايز يسقط المنطقة فى بحور من الدماء وبإيدينا احنا مش بإيديين حد تانى !!؟؟

 كنا منتظرين اييه من فكر مشوه وكتب تراث الفقهاء الاوائل اللى مبنية على القتل وسفك الدماء وتكفير الاخر

والسؤال الاهم بقى .. هو احنا ماعندناش منه هنا فى مصر !!؟؟ .. هو اللى ولع فى ترام اسكندرية مش كان ممكن حد يموت جواها محروق زى ما مات الشهيد معاذ الكساسبة !!؟؟ ..

 هو مش الموضوع ده حصل قبل كده في مصر في كرداسه (كما هو موضح بصور واقعية فى صورة المقال لضحايا كرداسة) … و تم سقي ضباطها و هم يحتضرون  ماء النار وسط تهليل و تكبير العشرات و منهم من كان يصور بالموبايل ليتفاخر بما يفعل ؟؟؟؟ ….. هو مش فيه دكتور رفض اسعاف او علاج ضابط و تم تمزيقه و هو على سرير الطوارىء في المستشفي وسط تهليل و تكبير العشراتز

 هو اللى حط قنبلة على قضيب المترو فى القاهرة امام مدرسة اطفال يفرق عن داعش فى حاجة !!؟؟ … هو مش رجال الاخوان كفروا كل اللى كان نازل فى مظاهرات 30 يونيو امام رئيس الدولة نفسه وهو كان قاعد يهز فى دماغه بالموافقة .. وقالوا انهم هايعلنوها حرب اسلامية وهيسحقوا كل المنافقين واعداء الدين اللى نازلين المظاهرات !!!؟؟ .. كده بمنتهى البساطة تم تكفير شعب باكمله !!!!!

 هو مش ابو اسحاق الحوينى فى اجابة لسؤال فى احد اللقاءات طلع وفسر حديث رسول الرحمة صلى الله عليه وسلم اللى فيما معناه “ينقسم المسلمون الى 73 فرقة ، كل الفرق فى النار الا فرقة واحدة هى الناجية وهى التى عليها رسول الله واصحابه” .. وراح حاطط ايديه الاثنين على صدره وقال “نحن التى عليها هو واصحابه” وكان قصده طبعا السلفيين للمتابع للقاء كاملا .. يعنى حكم على كل من سواهم بالنار !!!

 ومش كدة وبس … هو مش فيه ناس حقيرة مؤيدة للى بيحصل فى مصر .. او على الاقل جاى على هواهم لمجرد انهم ضد حكم اللى بيسموهم “عسكر” بس مش بيقولوا كدة حفظا لماء الوجه !!؟؟ … اخوك وجارك وزميلك فى الشغل والموظف اللى فى الحكومة او حتى فى القطاع الخاص او استاذ الجامعة او الدكتور او المدرس او الطالب فى المدرسة و الجامعة .. و .. و .. و .. وكل اللى بيبرر او يحط اسباب للى حصل !!! …  و كمان شوية العيال الصيع (ودى الكلمة المؤدبة بالمناسبة) اللى بيطالبوا بالديموقراطية وهم عندهم احط مستويات الديكتاتورية فى مصادرة فكر الاخر والتجنى عليه من اول الشتيمة وقلة الادب وانت طالع كدة لغاية انهم عايزين يولعوا فى البلد باللى فيها .. يفرق اييه ده عن الفكر الداعشى … احنا هانضحك على بعض .. ياسادة الفكر الداعشى موجود جوانا احنا كمان !! ..

 لما اللى عايشين بيننا بيفكروا كدة وبيعملوا كدة ، يبقى مستغربين ليه ان يصدر من داعش ماهو افظع من حرق البطل الشهيد معاذ الكساسبة !!!؟؟

 كل واحد بيشتم فى الجيش المصرى أو بيرمى طوبة على مؤسسة شرطية ، أو تلاقيه كاتب  على صفحته مع كل تقدم يحرزه جيش مصر وهو لا اخوان ولا زفت “يارب انصرنا على الجيش !!” … ينصرك على مين ياجاهل يا متخلف يا اعمى البصر والبصيرة !!؟؟ .. انت بكل كلمة وكل طوبة وكل سباب وشتائم بتقولها بتعلى جدار الكره ، وبتهدم فى بلدك ،  وبتأسس لفكر داعشى تسجن فيه نفسك ومش هاتخرج منه أبدا !!!

 الرئيس السيسى لما اتكلم عن تنقية الفكر الدينى قامت عليه الدنيا ولم تقعد .. واتهمه كتير من الاغبياء انه بيعادى الدين .. ومسكوا فى كلمة الواحد ونص مليار مسلم والسبعة مليار وقالوا انه بيتهم المسلمين كلهم بالارهاب !!!

 عايزين تعرفوا هو قال كدة لييه !!!؟؟؟ .. ادخلوا النهاردة على كل الصفحات والجروبات حتى الغير إخوانية واتفرجوا على التعليقات على اللى حصل فى موضوع حرق البطل الطيار الاردنى !!! .. هتكتشفوا كارثة ان داعش عايشين فى وسطنا مش بعيد عننا .. !! .. وكله بيستدل بما فتح الله عليه من اللى قرأه من فكر خرف متخلف من كثير من كتب الفقه ، او مما أفتى  به شيوخ الدم والقتل من تحليل لدماء المسلمين المخالفين قبل دماء اللى من الديانات الاخرى … والحجة الجاهزة طبعا ان عم الشيخ قال او ان كتاب الفقه للإمام الفلانى أقر وصرح !!!!

 طب بس ياريت لما تقف امام ربنا الواحد الاحد الحق العدل يوم القيامة ابقى قول له اصل عم الشيخ هو اللى قال .. وساعتها هايرد عليك عم الشيخ ده اللى انت فرحان به وبتسمع كلامه بنفس رد ابليس على كل اتباعه “إِنَّ اللَّهَ وَعَدَكُمْ وَعْدَ الْحَقِّ وَوَعَدْتُكُمْ فَأَخْلَفْتُكُمْ وَمَا كَانَ لِي عَلَيْكُمْ مِنْ سُلْطَانٍ إِلاَّ أَنْ دَعَوْتُكُمْ فَاسْتَجَبْتُمْ لِي فَلا تَلُومُونِي وَلُومُوا أَنْفُسَكُمْ مَا أَنَا بِمُصْرِخِكُمْ وَمَا أَنْتُمْ بِمُصْرِخِيَّ إِنِّي كَفَرْتُ بِمَا أَشْرَكْتُمُونِي مِنْ قَبْلُ إِنَّ الظَّالِمِينَ لَهُمْ عَذَابٌ أَلِيمٌ ” .. صدق الله العظيم

 إن رسولنا الذى ارسله الله رحمة للعالمين كما قال فى قرأنه الكريم .. يقول صلى الله عليه فى الحديث الشريف “تركت فيكم ما ان تمسكتم به لن تضلوا ابدا .. كتاب الله وسنتى” .. لكن احنا تمسكنا بسنة شيوخ الدم وتفسيرات فقهاء العفن الدينى والفكر الملوث .. وعلشان كدة ضللنا الطريق ..

 ومش كدة وبس .. ده دول غير شوية النحانيح اللى عاملين فيها ثورجية .. وهم فاهمين الدين غلط والثورة غلط ومافيش عندهم اي ثقافة او اتساع افق ، وبيساعدوا بفكرهم القمئ ده ، وتفكيرهم الضحل ، على هدم اوطانهم وحجتهم انهم ثوريين واصحاب فكر وعندهم وجهة نظر !!!!

 و رجوعا للموضوع الاساسى اللى هانفضل نتكلم فيه كتير قوى كل ما تسنح الظروف .. عايز بس اقول كلمة اخيرة .. انه إذا تعارضت ابسط قواعد اﻹنسانية مع ايات القرآن او حديث رسول الرحمة صلى الله عليه وسلم ، فالخطأ بيكون فى تفسير اللى بيفسر القرأن أو فى اللى نقل لنا وفسر لنا الحديث الشريف !! من اصحاب فتاوى الدم ، واﻹجماع الفقهى اللاإنسانى الحقير … اللى بتتبرأ منه الانسانية كلها مش الانبياء والرسل بس ، واولهم رسول الرحمة محمدا صلى الله عليه وسلم .. ومن فوقهم جميعا الرحمن الرحيم الحق العدل الذى سيسأل الجميع يوم القيامة عما كانوا يعملون

 ألا هل بلغت .. اللهم فاشهد

 وللحديث بقية قريبا جدا بإذن الله

لمتابعة تعليقاتكم