9 Feb 2015
نظرة من وراء الأحداث
———————–
هو الأول ، الوضع عامل إزاى !!؟؟
نبعد شوية عن الإخوان ونخرّجهم من المعادلة علشان الأيام اثبتت إنهم غلابة ياعينى ، ومجرد منفذين وشخشيخة فى إيدين ناس تانيين .. ونسأل الأول ، هو الوضع عامل إزاى
الوضع وترتيب الأحداث بيقول إن فيه خطوات واسعة مصر بتخطيها على مستوى السياسة الدولية ، وماحدش قادر يوقف التقدم ده .. وكمان بــ ندخل مشاريع عملاقة وبــ نخطط لــ 40 سنة قدّام ، وبرضوا ما حدش قادر يوقف ده ، وبــ يتم إستفزاز مصر إقليميا علشان مصر تاخذ قرارات متخبطة وردود أفعال غاضبة ، وبرضوا ماحدش قادر يوصّلنا لــ ده ، وحلول وقرارات وخطط إقتصادية وصولا لمتمر مارس الإقتصادى اللى هــ تعدى مصر بيه عنق الزجاجة لأن مصر مشكلتها إقتصادية من الدرجة الأولى ، و برضوا ماحدش قادر يوقف ده … طب الحل إييه !!؟؟؟ ..
الحل إنه يتم إشعال الموقف داخليا وإنهاك مصر بــ إستمرار ، بأحداث داخلية ، علشان تفضل القيادة والأمن المصرى فى حالة لهاث مستمر طوال الوقت ، ويفضلوا مشغولين بالدفاع عن نفسهم وتبرير ردود أفعالهم .. اللى هى بالمناسبة مش محتاجة لأى مبرر أسوةً بكل اللى بيحصل فى كل دول العالم لما بتواجه نفس المواقف أو حتى اقل منها بمراحل كبيرة قوى .. !!
و تكر السلسلة وراء بعضها بتوايخ لأحداث كبرى .. فــ تيجى الثورة الإسلامية فى 28 نوفمبر وتعدى ، .. وبعدين ضرب موسم السياحة فى مصر فى رأس السنة وأعياد الكريسماس ، وتعدى .. وبعدين الثورة الكبرى وإسقاط حكم العسكر فى 25 يناير ، واللى تم التسخين لها بحادثة شيماء الصباغ قبلها بيوم .. وبرضوا تعدى لأن القصة خلاص فقدت الظهير الشعبى .. فيتم محاولة إشعال الموقف بالتذكير بجمعة الغضب والتهديد العلنى والإعلان عن إعادة إقتحام الأقسام و فتح السجون زى ما حصل فى 2011 .. وبرضوا فشنك وتعدى … فتبتدى سلسلة من العمليات الإجرامية والتفجيرات فى كل محافظات مصر وناس تموت وقنابل تتحط أمام مدارس أطفال ونلحقها بفضل ربنا .. وعمليات إستباقية أمنية من غير ما حد يحس أضعاف أضعاف اللى بتتحقق .. وقتل جنود بعملية كبيرة فى سيناء ، والجيش يقول مافيش مشكلة ، إحنا متعودين على كدة وداخلين الجيش علشان نموت .. وكل ده علشان يا إما الناس تسلّم ، يا إما نخربها ونقعد على تلها .. لكن برضوا تفضل الدولة مكملة … طب والحل إييه برضوا !!؟؟
الحل إنه لازم تحصل حاجة تهز الرأى العام الداخلى و الرأى العام العالمى .. حاجة تعمل خلاف بين المؤيدين للدولة والمعارضين ، وحتى بين المؤيدين وبعضهم ..
الموضوع كان متخطط له كويس قوى .. والمخطط كان إنه يتكرر نفس سيناريو ستاد بورسعيد .. لكن المرة دى بقى فى ستاد الجيش ، وتحت سمع وبصر قوات الأمن .. ويموت ناس ، وتبتدى الولولة ، و يتحول الموضوع من شغب ملاعب ، لفخ نصبه الجيش والشرطة للأولتراس الحلوين الأمامير الكيوت علشان هم اللى بيهتفوا “يسكت يسكت حكم الحثكر” !!! … نفس اللى إتقال عن أحداث ستاد بورسعيد .. قااااال إييييييه .. أصل الجيش اللى عمله علشان التراس أهلاوى هتف فى ماتش الأهلى والمحلة يسقط حكم العسكر ، قام الجيش عاقب رابطة المشجعين باللى عمله وقتل 74 واحد !!!!!!
سيناريوهات فاشلة من خيال ناس مرضى ، وناس أفشل وأخيَب بتصدق الكلام ده علشان هم عايزين يصدقوه !!
الناس بقى اللى عمّالين يهاجموا الشرطة من إمبارح ويقولوا طب لما هم كانوا عارفين ما عملوش حاجة لييه !!!!؟؟؟؟ .. وفين تأمين الجماهير !!!؟؟؟ .. و ده يثبت إننا لسة لغاية دلوقتى بنتمتع بثقافة قراءة العناوين ، وثقافة التفاعل والشير من غير ما نعرف ملابسات الحادث !!
هو ليه حضرتك لم تضع فى إعتبارك أن منع الألتراس من دخول الإستاد كان أصلا بناء على معلومات مؤكدة عن الترتيب لمذبحة داخل الإستاد !!
مين اللى قال إن الجماهير ما كانتش متأمنة ، وإن فيه 5000 واحد كانوا جوة الإستاد ماحدش فيه إتخربش !؟
مين اللى قال إن المفروض إنى أقوم بتأمين ناس جايين اصلا بهدف الإشتباك مع الشرطة !؟
واسئلة كتير قوى من النوع ده !!
الألتراس هو تنظيم فعلى … لكنه تنظيم بقوم بأفعال عدائية ضد الدولة و المجتمع … ومن الطبيعي اننا نتوقع منهم الاشتباك مع الشرطه و الحرق و التدمير ، ورغم ده يكون المطلوب مننا إننا نتعامل معاهم بحكمة و نغض الطرف على أفعالهم .. وهو ده من وجهة نظرنا هو اكبر خطأ إرتكبته الداخلية من البداية !! … إنها رضخت للضغوط الشعبية وحاولت تمثل من البداية دور الشرطة الكيوت علشان ما تخسرش الناس تانى …. !!!
الخطأ الأكبر كان هو السكوت عليهم الفترة الكبيره اللى فاتت ….. دول العالم بالكامل و هي في ظروفها العاديه جرمت الروابط دي و طاردتها أمنيا بمنتهي القسوه سواءً كان بتغليظ العقوبات الجنائيه و التعويضات المادية اللى بــ تطول الأهل حتي الدرجة الثانية …. أو بتنفيذ القوانين دي بمنتهي القسوه لمجرد الاشتباه …. و لنا في انجلترا عبرة … و كيفية القضاء على شغب الملاعب الإنجليزى في موسم واحد فقط بعد ما كان كل ماتش بيسفر عن ضحايا و قتلي .
لكن احنا عندنا ارهاب و تنظيمات ارهابية … و دول بتعلنها صراحة في وسائل الاعلام و في بيانات صحفية اننا هــ نستخدم الالتراس و الشباب لحرق البلد … طب إزاى الحال بقى !!!؟؟
الشعب المصري شعب مش اهبل ، ولما بــ يعوز يعمل نظام بيعمله والدليل على كدة اللى حصل فى معرض الكتاب .. طابور طوله كيلو متر … وكمان لما يعوز يعمل هرجله وبلطجه بيعملها والدليل اللى حصل إمبارح فى الإستاد … يعنى الموضوع دايما خاضع للمزاج .. أو ….. للتمويل
كلمة أحيرة ..
وقوفك في خانة المدافع و إنت على حق تنقلك على طول إلى خانة المتهم .. ولازم نعرف إنه لسة هــ تحصل احداث كتيرة قوى من هنا لحد المؤتمر الإقتصادي تحت مسمى” إربك النظام ” .. و أحد أهم بنوده هو إرهاق الداخلية و إستنزاف طاقتها و إختلاق أحداث تضعها فى حرج و خانة المتهم
واأحب ألفت نظر اللى مش واخد باله ، إنه انه بيتم الاعلان بمنتهي الصراحه عبر رؤوس الاخوان و قنواتهم و الدول الداعمة لهم ، انهم بــ يتحدوا مصر انها مش هــ تعمل المؤتمر الاقتصادي و مش هــ تقف على رجليها ، و لو إحتاج الامر لحرق البلد باللى فيها … كدة وش .. فهمي رسمي نظمي
و فيه فيديوهات و تصريحات لهم كثيرة قوى على اليوتيوب ، و هم بــ يتحدوا الشعب المصري و بيقولوا منبقاش رجالة لو عملتوا المؤتمر الاقتصادي .. وإحنا غعلامنا نايم فى العسل .. أو …. أو بيستعبط
ياريت الناس تصحصح كدة وتاخد بالها ، لأن عملية إفشال المخطط اللى كان مترتب للمنطقة من داعمى الخريف العربي ، أو لو شئنا الدقة الربيع عبرى ، ما كانش شوية عليهم .. وكمان عايزين يبقى لكم دور إقليمى ، وتبقوا لاعب سياسى دولى ، و تعملوا قناة سويس جديدة ، و مؤتمر إقتصادي ، و تجذبوا إستثمارات ، و ترجّعوا السياحة ، و … وكمان تلعبوا كورة … !!! …. إنتو بتحلموا !!!
إثبتوا يا مصريين وبلاش تتهزوا لأن هم سكتين مالهومش ثالث ..
يا إما تكونوا في صف بناء و إستقرار مصر ، أو تكونوا في صف إللي عايز يهدها
ولكم الإختيار …
رحمة الله على كل الأبرياء والضحايا