13 June 2014
إلحقونااااا – داعش جايه علينا – أوهام الحرب النفسيه
—————————————————-
أنا حــ أتكلّم بالعامية و بدون تجميل للكلام لأن الكلام اللى جاي مهم جدااااااً.
داعش إحتلت مدن العراق – داعش بتدبح الناس – داعش حــ تخش الكويت – إنتشرت فيديوهات و الناس عماله تشيرها بقالهم يومين بيقوم فيها داعش بذبح الناس ..
قوم إييييه بقي – روحنا إتخضينا إحنا بقي – و قعدنا نجري في الشوارع و نخبط في بعض و نقول ” جاي عليا جاي عليا ” …
طب بصوا بقي علشان المراره الله يرضى عليكم 🙂
اللى بيحصل ده حرب نفسيه مش أكتر ، و داعش و القاعدة و النصرة و اللى شبههم بالونة منفوخة على الفاضي ، و اللى بيشتغل أو بيدرس علم السياسه أو العلوم العسكريه يفهم كلامي ده كويس جدا. …… طب أمّال إييه اللى بيحصل ..؟؟؟ تعالوا نفصص الامور واحدة واحدة عشان تتأكدوا !!
في مصر و في جبال سيناء تحديداً و لمدة سنتين كاملين و قبلهم تحضير لأكتر من عشر سنين تم تجهيز مجموعات قتالية معظمهم تم تدريبه على يد خبراء عسكريين غربيين على أعلي مستوي و تم تمويلهم و تسليحهم و تزويدهم بأحدث الاسلحه و نظم الاتصالات و التخديم عليهم لوجيستياً من قبل أجهزة مخابرات عالمية.
الجيش المصري بقي قضي عليهم و علي بنيتهم التحتيه تماماً في ستة أشهر فقط و نجح فيما فشلت فيه أمريكا طوال ١٢ عاماً في جبال تورابورا ، مع الوضع في الاعتبار أن الجيش المصري كان بيتعامل بالشوكه و السكينه و لو كان بيتعامل زي الجيش الامريكي بالقيام بإبادة قري بالكامل لمجرد الاشتباه في فرد واحد كنا خلصناهم في يومين ثلاثة بــ الكتير !!! .. (على فكرة .. الرئيس السيسى قال كلام بــ نفس المعنى ده تقريباً فى رده على سؤال وجهه له إبراهيم عيسى).
في ليبيا و لمدة عامين كاملين تم تجهيز الجيش المصري الحر و تنظيم دامل ( توأم داعش ) و سابه الجيش المصري يتصرف عليه ، و ياكل ، و يشرب اللبن ، و يكبر ، و لما بقي شحط و قد هدومه ، سابه يطلع في موكبه بالسيارات في عرض عسكري من بني غازي و حسب روايات شهود العيان في أقل من نصف ساعه في الفجر و خارج بني غازي كانت تسمع أصوات الانفجارات و بزغ الجحيم من عشرات الكيلومترات من مصادر مجهولة … 🙂 🙂 .. و دي كانت نهاية فرقة دامل المسرحيه 🙂
بقي بالذمه حد يخاف من شوية صيّع مسميين نفسهم جيش ، و آخرهم بيتنقلوا في عربيات نصف نقل و عمرهم ما اتشتطروا غير على مدنيين. ؟؟؟؟
بلاش نقول قوات التدخل السريع المصريه ، لكن ده قوات درع الجزيره اللى في السعوديه لو قربوا بس من حدود الكويت تمصمص عضمهم في أقل من ساعه… !!
طب إيبه الهدف … !!؟؟
الهدف إن حضرتك تبقي مرعوب ….. حرب الجيل الرابع تعتمد على الشارع …. بمعني إن لو إتحكّمت في الشعوب ، سواء بتخويفهم أو بتغييب عقولهم ليتركوا إلتحامهم بقياداتهم و بحكوماتهم و يتركوها فريسة للمؤامرات بدون دعمها ليتم تفكيكها.
و ده اللى حصل معانا و مكّن الإخوان من مصر في ٢٠١٢ ….. و ده اللى لعب عليه المشير السيسي لما طلب من الناس الدعم و التفويض و كل شويه يكلم الناس و يوحدهم حوالين مصر و جيشها.
طب المطلوب إييه .. !!؟
بلاش الفزع و نشر فيديوهات إتضح إنها في الشتاء و ملعوب فيها و الثبات و التوحد و الثقة في القيادة ….. متقلقوش ….. العرض الكبير لسه حــ يبدأ …. المتعه قادمه ….
و كل يوم حــ نبعتلكم رسالة فيها شوية معاني عشان الصورة توضح لكم.
تحياتي ليكم