14 June 2014
يعنى إييه حروب الجيل الرابع
————————————–
علشان بس نكمل الصورة اللى إحنا بدأنا فيها على صفحتنا من كام يوم ، وعلشان المعلومة تبقى واضحة ، .. بالإضافة إلى إننا أستلمنا العديد من الرسائل بتسألنا .. فــ إحنا هانتكلم النهاردة بإختصار شديد جداً ومبسّط عن معنى الجيل الرابع من الحروب …
وفى نفس الوقت بنساعد على نشر الوعى بالأحداث علشان نبقى فاهمين طبيعة المرحلة ، بالتالى نقدر نفهم المستجدات اللى هــ تحصل فى الفترة القادمة واللى بإذن الله هــ تكون خير على مصر طول ما الجبهة الداخلية متماسكة ومؤيدة بقوة للقيادة الساسية وبتدعم الجيش المصرى بشدة !!
الجيل الاول من الحروب كانت جيش نظامى كامل ضد جيش تانى كامل برضوا ، زى ما قرأنا فى التاريخ زمان عن حروب الدولة الرومانية والفرس وحتى جيوش الدولة الإسلامية .. أما فى العصر الحديث فــ عندنا مثلا حروب زى حرب 73 اللى كانت بين الجيش المصرى والجيش الإسرائيلى (جيش قصاد جيش).
الجيل الثانى من الحروب ، هى حرب عصابات ضد جيش نظامى زى الحروب الى بتحصل فى أمريكا الاتينية .. عصابات مدربة ومسلحة بأسلحة خفيفة فى المدن أو الاحراش ضد الجيوش النظامية للدولة.
الجيل الثالث هى الحروب الوقائية أو الإستباقية زى حرب العراق ، أو حرب أفغانستان وفيها الجيش نفسه بيتقسّم الى مجموعات قليلة العدد ، مسلحة بقوة نيران عالية جداً ، خفيفة الحركة ، وأغلب شغلها وراء خطوط العدو ،.
الجيل الرابع من الحروب مافيهوش جيوش بــ تحارب … لكن الفكرة بتكون هى إفشال الدول وتفتيت مؤسساتها الأساسية وتفكيك وحدة شعبها باستخدام تنظيمات مدربة ، تملك إمكانيات لوجيستية ومجموعات محترفة وخلايا خفية (زى الإخوان كدة مثلاً) ، تنشط لضرب مصالح الدول الأخرى ويستخدم فيها أجهزة إعلام وتجنيد إعلاميين وشخصيات عامة من فنانين وصحفيين ، ويستخدم فيها أيضاً مواقع التواصل الإجتماعي ومنظمات المجتمع المدني والمعارضة .. !!
يعنى اللى بيحصل فى ميادين الوطن العربى وفى الفضائيات وعلى الفيسبوك ده حرب من الجيل الرابع .. وهو إستغلال لحالة الغضب اللى كانت موجودة فى الشارع ضد بعض الأنظمة العربية فــ يستخدم الشارع لإسقاط الدول نفسها بذريعة إسقاط النظام .. والفارق طبعا كبير جداً ….
بمعنى أخر .. اللى كان ومازال بيحصل فى سيناء ، دى حرب من الجيل الثالث ….. واللى كان بيحصل فى مدن القنال و الشرقية والقاهرة من قنص للضباط والعساكر وتفجيرات للأماكن الحيوية والمبانى التابعة للمؤسسات الأمنية ، دى تعتبر حرب من الجيل الثانى.
وطبعاً بما إن حروب الجيل الرابع إتفهمت وإتفهم سيكلوجيتها والهدف منها ، يبقى لازم يطوروا انفسهم ويظهر الجيل الخامس من الحروب .. ودى بقى ممكن نتكلم عنها لاحقا فى بوست منفصل
أرجو إن الصورة تكون وضحت للجميع
لكن إحنا جامدين قوى .. وهــ نكسب حرب الجيل الرابع داخلياً وخارجياً … وبإذن الله ، “اللى بعديييه واللى بعديييه واللى بعديييه” ، لأن جيش مصر هو خير أجناد الأرض والصقور لا تنام .. ولو حصل إخفاقات مرحلية ، فــ يجب قياسها على إجمالى الصورة علشان نعرف حجم النصر اللى مصر حققته ، وبتحققه يوم بعد يوم ..