15 June 2014
أونكل سام – داعش أخر أبنائه
——————————
بصّوا بقي ….. البوست ده مهم جداً جداً في تأصيل الامور …. و معلش هو طويل شويه بس تعالوا على نفسكم و اقرأوه بس بتركيز على رواقه مع كوباية شاى أو فنجان قهوة ….. واحدة واحدة كدة و حــ يتضح من خلاله أصل المواضيع كلها ، و تستنتجوا منه إحنا رايحين على فين
إتفقنا في البوستات السابقه أن هناك هجمة أمريكيه من حروب الجيل الرابع على المنطقه لتفتيتها و القضاء عليها وصمت و مباركه من أوروبا.
كما اتفقنا إن الوسائل لذلك هو هدم المنطقه بالفتن الدينية بــ إستعمال عملاء تم زرعهم في المنطقه منذ زمن بعيد مثل حسن البنا و هو صناعة المخابرات البريطانيه لتكوين الاخوان المسلمين السنة و التي خرج من تحت عباءتهم كل التظيمات الجهاديه المسلحه مثل القاعده و النصره و الجهاد و غيرها.
و مثل الخوميني و هو صناعه بريطانيه أيضا و الذي نزل بالباراشوت من لندن على طهران و نجح في الاستيلاء على ايران ليكون هناك منافس شيعي للسنة و تم تكوين ميلشيات مسلحه مماثلة لما انشأه الاخوان.
ثم يضرب العملاء بعضهم بعضاً لتفتيت المنطقه بالكامل و الدليل علي ذلك أن كل فصيل كلامه كله انه ضد أمريكا و لكن كل أفعالهم و أهدافهم الاستراتيجيه كلها في مصلحة امريكا …. فنحن لم نري أي طلقة أو دعوي جهادية ضد إسرائيل أو أمريكا و لكن السلاح لا يرفع إلّا في وجه الحكومات الاسلاميه فقط سواء من خلفاء الخوميني أو من خلفاء حسن البنا …. و نراهم أيضا حبايب ,,, فــ رئيس إيران لم يدخل مصر و يصلي في الازهر و يرفع علامة النصر منه إلّا في عهد محمد مرسي الاخواني.
طيب إييه السبب و ليه امريكا بتعمل معانا كده … ؟؟؟؟ و ليه أوروبا ساكتة و متكيّفة من اللى بيحصل ؟؟؟؟؟؟
الإجابه ببساطه .. هو الطاقه و الغاز و تكتيف روسيا أو القضاء عليها لو أمكن لأنها تتحكم في أوروبا كلها علشان عندها الماسورة الأم بتاعة الغاز اللى بيزود أوروبا …. !!
بوتين لو زعل مجرد يحط إيده بس على المحبس تترعب أوروبا ……. طب ينفذّوا ده ازاي ؟؟؟؟ .. يبقى لازم الأتى:
الإستيلاء و السيطره على مصادر الطاقه من غاز و نفط في الشرق الأوسط للسيطره على أسعار سوق النفط.
الاستغناء عن روسيا المحتكر الرئيسي للغاز و الطاقه الذي تعتمد عليه أوروبا كلها. .. عن طريق مد خط غاز يمر من دول جنوب روسيا مروراً بالعراق ثم سوريا ثم تركيا ثم الى ( أوكرانيا عبر إقليم القرم ) ثم الى أوروبا.
بكده يتم شل إقتصاد روسيا و محاولة تفتيتها مره أخري.
تم التمهيد للخطه منذ عقود طويله و بدأ التنفيذ العملي عام ١٩٩٠ و إنتهاء المرحلة الاولي بتدمير العراق و الأهم تسليم السلطة فيها إلى عملاؤهم من فريق الشيعه.
الخطوة الثانيه كانت سوريا لوصل الخط الى تركيا التي كانت ستتولي الدفاع عنه ، و هذا يفسر تصرفات الحاج أردوغان لأنه كان حــ يبقي ليه قيمة كبيره عند الغرب لما ينجح المخطط لأن وصلة الماسورة الأم بتاعة الغاز لاوروبا حتكون على أرضه و ده سبب دعم امريكا ليه .. 🙂
أمريكا و بنفس الادوات عملوا الثورة المزعومة علشان أوكرانيا تخش حلف الناتو و بذلك تحمي القوات المسلحه لأمريكا و أوروبا خط الغاز فهمي نظمي رسمي … 🙂
طيب للقضاء على حكومات الخليج ، و تدمير سوريا ، و إستكمال و تأمين الخطة بالكامل مين اللى واقف زي العضمه في الزور ….. مصر طبعاً 🙂 🙂 .. فــ تم معنا اللى شفناه و مازال مستمر طوال الأربع سنوات و ده سر عياط أشتون و دعم أوروبا و أمريكا لمرسي العياط و الإخوان لغاية دلوقتي بكل الوسائل … ماهو كده شقى عمرهم بيضيع قدام عنيهم … 🙂
السودان و ليبيا تم تفتيتهم للتحضير لحصار و تركيع و تقسيم مصر لتسير خطتهم في امان … و علشان ماطوّلش عليكم ، أكيد انتوا عارفين الأحداث و ما وصلنا اليه الان ….
المهم بقي عشان نكون عارفين … بالرغم من الخلاف الايدولوجي الرهيب بين مصر الدوله و حزب البعث من يوم نشأته و توجهاته ، الّا ان مصر الدولة تنسق مع سوريا الدولة تنسيق وثيق منذ عام ٢٠١٠ لمواجة المخطط على المنطقة سواء سياسياً أو مخابراتياً أو عسكرياً …..
سيبكم من اللى على الوش و اللى بــ يبان …. أمن سوريا و وحدتها و تخريب هذا المخطط لــ مصر أمن قومي و مسألة بقاء 🙂
و مع إتضاح الصورة و إقتناعهم بالمخطط .. نلاقى مصر بــ تنسّق مع دول الخليج و تم الإعلان عن التحالف ضد أمريكا و اللى يقرأ بيان الملك عبدالله يشعر فعلا إن إتحادهم و وقوفهم مع مصر مساله حياه أو موت ….. ليه بقى ؟؟؟؟
لأن مقدرات و مستقبل دول عظمي و تحضير لسنين طويلة و دفعوا دم قلبهم على مدي عقود لتنفيذه محدش يقدر يقف قدامه غير تحالف بقيادة مصر كعادتها التاريخية لأنها الرقم الصعب في المعادلة و تاريخياً هي من هدمت كل المخططات الإستعمارية على مر التاريخ و تستطيع تغيره لصالحها و لصالح المنطقه بالكامل (وهذا الحديث له مقال منفصل).
أما الحاج بوتين بقى .. فــ مصر وفّرت عليه مواجهات كتييييير مع الغرب سواء إقتصادية أو سياسية أو عسكرية ….. يعني في روسيا ممكن يعملوا للسيسي تمثال عندهم 🙂 🙂 🙂
الخلاصة إن الموضوع مش ديمقراطية و حقوق إنسان و إنتخابات و دساتير… !! لكن الاعتراف الغربي يكون فيما يتوافق فقط مع مصلحتهم و فــ لتذهب دماء الشعوب الى الجحيم.
الموضوع صعب و مش سهل أبداً و لكن هو ده قدرنا التاريخي… و زي ما قالت إحدي صديقات الصفحه ….. بداية المخطط كان في العراق و سينتهي في العراق.
و أهم قاعدة هي الثبات حول القيادة و التروي في تصديق الأخبار حتي لو كانت صوت و صورة .. لأن ممكن تشوف أحداث سوداوية كتير الفترة اللى جاية في حين أنها غير كده خالص أو في مصلحتنا.
زي كده ما السيسي كان إخوان ، و زوجته منقبة ، و الجيش حــ يتخلّى عن الشعب ، و الاخوان تمكّنوا ، و الشرطه معاهم ، و أمن الدولة تم تدميره و اختراقه في حين إن الحقيقة كانت غير كده خالص .. !!!!!
ماهي حرب جيل رابع ، .. يعني لعب في الدماغ .. و كلمة السر ما بيننا هي الإقتناع بأنها لازم تضلّم قوي علشان تنوّر قوي 🙂
نحن على الحق المبين و ما النصر إلا من عند الله ..