26 May 2015
اللعبة من زمان بس إحنا مش واخدين بالنا
——————————————
أيوة فعلا .. اللعبة من زمان .. وإحنا مش واخدين بالنا .. أو مش عايزين ناخد بالنا .. ولسة اللعبة مستمرة ، لان الهدف بكل بساطة هو تفتيت المجتمع ، وخلق حالة من اللغط المستمر . لان إحنا بنفسنا اللى بنساعد على إستمرار حالة اللغط دى إما بقصد أو بدون قصد ..
صفحتنا دايما بتتكلم فى القضايا السياسية بشكل عام .. وبتتناول بالتحليل كل ما يتعلق بمصر وخصوصاً فى الملفات الخارجية .. لكن خلّونا نقول إن اللى بيحصل دلوقتى فى مصر زى ما قلنا قبل كدة هو عبارة عن حملة ممنهجة هدفها وضع المجتمع المصرى فى حالة من الغليان المستمر .. بتفتيت الأراء وخلق مبارزات وهمية بين الرأى والرأى الأخر حوالين قضايا فرعية علشان ينشغل الناس ويبعدوا عن القضايا الرئيسية اللى تهمهم فى المقام الأول ..
و طبعاً من الطبيعى ان يكون مهندس القصة دى كلها هو الإعلام اللى مش بيعمل حاجة غير إنه يولّع عود الكبريت ، وبعدين ييجى دورنا إحنا علشان نقلبها حريقة مالهاش أول ولا أخر .. بــ تولع فجأة .. و تنطفى فجأة !!
طبعا إحنا إتكلمنا من خلال مقالاتنا الثلاثية عن الحرب النفسية عن الجزئية بتاعة الشائعات واللعب على الوعى الجمعى للناس .. وأعطينا أمثلة كتيرة من حاجات كانت بتتقال من زمن مبارك ومرورا بسنوات الثورة وسنة حكم الإخوان وثورة 30 يونيو وما بعدها زى مثلا موضوع تصدير الغاز لإسرائيل واللى طلع فشنك بعد ماعرفنا إن مصر بتصدر الغاز لإسرائيل بسعر أعلى من اللى روسيا بتصدر به الغاز بتاعها لأوروبا .. لكن خلونا نتكلم عن الجديد بقى .. والــ (New Version) بتاع اليومين دول .. واللى خلّانا كلنا وصلنا لمرحلة إن أول ما نفتح عنينا الصبح نقول “هو الهرى على إييه النهاردة” .. 😃😃😃
ياترى أخبار مشروع الفنكوش بتاع قناة السويس إييه .. و اللى المصريين دفعوا فيه فلوسهم وضيّعوا شقى عمرهم عليه على الفاضى !!؟؟
ياترى أخبار عفاريت القنوات الفضائية اللى كانوا بيطلعوا إييه ؟؟ .. وإييه اخبار اللى بيعالجوا الناس من المس و بــ يخرجوا العفاريت والجن والشياطين .. وفاضل شوية كمان و هــ يطلّعولنا بترول 😃
ياترى إييه اخبار معارك عذاب القبر والثعبان الأقرع والدعوة للمناظرات وكل واحد طالع يفنّد أراء الأخرين ، واللى إنتهت فى الأخر بدون مناظرة واحدة حتى ! .. ومافيش إعلامى واحد حتى تبنى الموضوع !!
ياترى مبارك بطل يموت ليه ، بعد ماكان بيموت كل يومين 3 مرات !!؟؟
ياترى الشيخ «ميزو» إختفى ليه بعد ما كان ضيف مستمر فى كل القنوات الفضائية ، واللى كان أخرها ، لقائه مع تونى خليفة لما إتقمص ومشى من غير ما يكمّل اللقاء !!؟؟
ياترى حصل إييه للجيش المصرى البرى اللى قالوا إنه سافر اليمن فى عاصفة الحزم ، وقعدوا يولولوا عليه ويقولوا إنه مش راجع ، وحسرة على شباب أولادنا .. والسيسى اللى هــ يضيّع جيشنا زى ما حصل فى حرب اليمن الأولى !؟؟
طب ياترى الإخوان بطلوا كلام لييه عن مرسى اللى راجع القصر يوم السبت العصر !!؟؟ 😊
وطالما بنتكلم عن اللى راجعين ومش راجعين ، .. هو إييه أخبار عمر سليمان الله يرحمه ويديله الصحة و ياترى هــ يرجع إمتى؟
ياترى مين طلع بديل السيسى ، و اللى قناة الجزيرة خلّت يتامى البنا صاحيين نايمين بيتكلموا عنه على إعتبار إن السيسى الحقيقى تم إغتياله .. وإن الجيش بيعمل كدة علشان ما يتفضحش .. 😊 وبالمناسبة كمان .. ياترى ليه القنوات المعادية لمصر بطلت تتكلم عن أم الرئيس السيسى اليهودية ، وبالتالى كل اللى كانوا بــ يمأمأوا وراهم بطلوا يتكلموا !!؟؟ .. تكونوووووونشى أسلمت !!؟؟ 😃😃
إييه أخبار سيارات داعش التى إتقال إن شهود العيان شافوها موجودة فوق الدائرى !؟
ياترى الفيلم بتاع اقباط المهجر والحريات والطائفية فى مصر مابقاش بــ يتذاع دلوقتى ليه … وإلا هــ ييجى دوره تانى
ياترى الخط الأحمر بتاع أبوتريكة لسة أحمر وإلّا إييه النظام !!؟؟ 😊
وأخيراً وليس أخراً .. إييه اخبار ياسمين النرش ، وحمار المطار ، وكليبات العرى والمثليين والمتحولون اللى إنتشروا فجأة فى كل القنوات الفضائية .. و ده طبعاً غير كيلو البامية اللى أصبح فجأة من العملات الصعبة على مستوى العالم !؟؟ :😊
و طبعاً بما إننا داخلين على رمضان ، فــ الهرى اللى جاى هــ يبقى على أسعار ياميش رمضان وكأن الشعب المصرى اللى بيكافح علشان رغيف العيش ، هــ يبقى كله بياكل فسدق و لوز .. زى بالضبط ما كانوا ما بياكلوش غير البامية أم 25 جنيه … أدينا بنغششكم أهو ! 😊😊😊
كل اللى قلناه دع على سبيل المثال لا الحصر .. وللأسف إحنا بدون مانشعر بــ ننفذ بالحرف اللى هم عايزيننا نعمله ، وبنعمل حمل على الدولة بأكثر بكتير من اللى الدولة شايلاه أصلا .. وبــ ننسى الأية الكريمة المعجزة لكل بيان واللى وردت فى سياق حادثة الإفك لما ربنا عز وجل قال عن اللى بــ يتناقلوا الأحديث والأخبار “إِذْ تَلَقَّوْنَهُ بِأَلْسِنَتِكُمْ وَتَقُولُونَ بِأَفْوَاهِكُم مَّا لَيْسَ لَكُم بِهِ عِلْمٌ وَتَحْسَبُونَهُ هَيِّنًا وَهُوَ عِندَ اللَّهِ عَظِيمٌ” .. صدق الله العظيم … صحيح الكلام ورد فى تناقل الإفك الذى قيل عن السيدة عائشة .. لكن الوصف القرأنى معجز ومذهل لما وصف الناس إنها بــ تتلقى الكلام باللسان مش بالأذن .. يعنى من لسان لــ لسان بدون ما نفكر فى الكلام ولا نعمل عقولنا فيه !!
أصدقائنا ..
قلنا قبل كدة إن الحرب الحالية مش سهلة ، لأنها حرب غير الحروب التقليدية ، بيتم فيها استخدام الشعوب والمجتمعات لهدم أنفسهم بأنفسهم .. وبعدين نرجع نقول ياريت اللى جرى ما كان .. والعينة بينة قدام عنينا فى كل مكان حوالينا !!
صدقونى .. اللعبة فعلاً من زمان بس إحنا اللى مش بــ نأخد بالنا 😊