إن لم تستطع هزيمة عدوك ، فإجعله يهزم نفسه

12 Aug 2015

إن لم تستطع هزيمة عدوك ، فإجعله يهزم نفسه

———————————————

بعد الهزيمة القاسية اللى تعرضت لها مصر فى 1967 ، كان إحتفال الإسرائليين بالنصر إحتفال اللى مش مصدق نفسه إنه إنتصر .. وبرغم وضوح الصورة الأن ، وتوافر كتير من المعلومات اللى ماكانتش متوفرة فى وقتها ، إلا إن القاسم المشترك بين جنود وضباط الجيش المصرى ، وجنود وضباط الجيش الإسرائيلى فى التعليق على الحرب هو إن مصر ماحاربتش !!! .. أيوة .. ده فعلا كان القاسم المشترك فى كل إستطلاعات الرأى والمعلومات اللى أتعملت ..

المجندين وضباط الصف التانى فى الجيش المصرى كانوا شايفين إنهم ماحاربوش ، وإنهم ما أخدوش الفرصة إنهم يدخلوا فى حرب حقيقية .. و المجندين وضباط الصف التانى فى الجيش الإسرائيلى كانوا شايفين برضوا إنهم ماحاربوش ، وكان عندهم إحساس إن الحرب كانت مترتبة ، وإن كل شئ خلص بأسرع مما كانوا متصورين لدرجة إن كتير منهم كان بيسأل “هو إحنا دخلنا حرب فعلا !!؟؟” ..

لكن جنرالات الجيش الإسرائيلى صدقوا نفسهم ، وصدقوا الإعلام ، وصدقوا أسطورة الجيش الذى لا يقهر اللى هم إخترعوها علشان أعدائهم .. واصبح جنرالات جيش الدفاع هم القاسم المشترك فى البرامج وعلى صفحات المجلات أكثر من الفنانين ، وكل واحد طالع بــ يتباهى ببطولاته فى الحرب ، واللى هو أصلا ما عملهاش !!

الكلام ده كان هو البداية للنصر المصرى فى 73 و اللى إبتدى الإعداد له بعد 3 أسابيع بس من الهزيمة ، وكانت عملية راس العش هى ركلة البداية للنصر والعبور العظيم …

الحالة اللى أصابت جنرالات الجيش الإسرائيلى بعد يونيو 67 ، كانت الثغرة اللى لعب عليها الجيش المصرى والأجهزة الأمنية فى تحقيق نصر 73 ، واللى بيسموها فى العلوم العسكرية “حالة إسترخاء ما بعد النصر” واللى عملت الأجهزة الأمنية المصرية على تغذيتها وتنميتها ويمكن فى يوم نقوم بنشر بعض العمليات اللى إتعملت فى السياق ده 😊

ولأن العلوم والساليب المخابراتية بــ تتقدم وبــ تتطور عبر العصور .. زى ما الحروب برضوا إتطورت من حروب تقليدية لحروب الجيل الرابع والخامس ، وهــ يطلع بعدها الجيل السادس .. فــ اللى بيحصل فى مصر دلوقتى هو إستخدام نفس الأسلوب فى تغييب الوعى لتدمير الجبة الداخلية المصرية ..

طب إزاى .. !!؟؟ …… أقول لكم إزاى ..

بعد إفتتاح قناة السويس ، وإحساس الإخوان بإنهم فقدوا قوتهم وتاثيرهم وقدرتهم على الحشد .. والدول الممولة لحالة عدم الإستقرار فى مصر فقدت كل تاثيرها لأن كل الوجوه اللى الدول دى كانت بتلعب عليها اصبحت كروت محروقة .. والدول الكبيرة صاحبة مخططات التقسيم فى المنطقة اصبحت بتلعب على المكشوف خلاص ، ومعظم الناس فهمت اللى فيها ، وما بقاش لعبهم يخيل على حد .. فكان لازم الهدم ييجى من الداخل !!

ولأن الشعب المصرى أصبح فى ظهر الجيش والحكومة .. ولأن رئيس الدولة مالوش حزب ولا جماعة مخصوصة ، ولا منتمى لأى حد من أصحاب المصالح .. وفشلت كل الأصوات اللى كانت بتهاجمه وبتكذب فى حقه وفى حق الجيش وفى حق مصر فى كل حملات التشويه ، .. فكان لازم تظهر مجموعة تانية تشتغل بالعكس .. وكأنها بــ ترد على الناس الوحشين المشككين اللى بيشككوا فى كل حاجة وفى اى حاجة ، وبيششكوا فى الجدوى الإقتصادية للمشروعات العملاقة للبلد زى قناة السويس ، والمحور الإقتصادى ، وإستصلاح الأراضى ، ومشروع الضبعة النووى ، … ألخ …  فتقوم بــ تبجيل و تعظيم الرئيس بصورة مبالغ فيها ، ويبدأو ينشروا أحلام و توقعات خيالية و غير واقعية عن إنجازات الرئيس ومشروعاته ،…

وعلشان كدة ظهرت صفحات ومواقع فى الفترة الأخيرة بــ تنشر صور وأخبار تحت عنوان “انشروا الايجابيات” .. وفى الحقيقة هى بــ تنشر أخبار  مغلوطه عن انجازات فى الهوا .. ، زى صور كبارى معينة ، والصور دى أصلا مش فى مصر .. وزى صورة القطار الطائر اللى على كورنيش إسكندرية واللى هو لسة مشروع قيد الدراسة .. وأخبار عن مرور بتاع عشرويت ألف ناقلة فى قناة السويس الجديدة فى ساعتين إلا خُمس .. وغيره وغيره وغيره ..

وعلى طول يبدأ المصريين الوطنيين المؤيدين للجيش والدولة ، واللى هم المحروقين من حملة الإنتقادات ، يشيروا الإنجازات دى علشان يردوا بيها على حملات التشكيك من غير ما يتأكدوا من مصدر المعلومة ، ومع الوقت يبدأ يرتفع سقف التوقعات بصورة مبالغ فيها لغاية لما يتصدموا بالواقع اللى يوصّلنا كلنا فى النهاية لحالة من الإحباط والإستياء لما ما نلاقيش مردود للتوقعات دى .. وبكدة نكون عملنا زى الدبة اللى قتلت صاحبها !!

من ضمن الأخبار الكاذبة اللى انتشرت إنتشار النار فى الهشيم موضوع إن الرئيس السيسى أمر بإيداع إيرادات قناة السويس بالبنك المركزي بدلا من مخصصات رئاسة الجمهورية ، .. ده على أساس إن الرئاسة كانت طول عمرها ، بتاخد إيراد قناة السويس تجيب به سميط وبيض للرئاسة من عند الحاج إمام اللى فى أول الشارع .. بالرغم من إن إيرادات قناة السويس ، ومع قلة موارد الدولة ، طول عمرها كانت جزء .. وجزء مهم جداً من الموزانة العامة للدولة المصرية و طول عمرها بيتم إيداعها في البنك المركزي .. 😊 .. لكن طبعاً الخبر هدفه التأكيد علي شائعات إخوانية قديمة من أيام مبارك ، إن  إيرادات القناة كانت بتروح للرياسة ، وأى حد شيّر الخبر ساهم بدون ما يعرف فى تأكيد الشائعة المغرضة !!

كمان موضوع قناة بنما و إنخفاض المياه فيها ، وإن ده هــ يأثر بشكل إيجابى على إيرادات قناة السويس … طب بس بالعقل كدة .. إييه اللى جاب القلعة جنب البحر !!؟؟ .. دى قناة بتربط بين محيطين علشان المراكب تعدى منها بين الأميريكيتين بدل ما يلفوا حوالين أميريكا الجنوبية للوصول لأميريكا الشمالية .. طب إييه بقى علاقة ده بقناة السويس !!؟؟؟ … وللأسف الناس بتشيّر ، من غير ما تفكر !!

و طبعاً كل ده غير الحملة اللى فى الإعلام دلوقتى ، واللى مازلنا كصفحة كلام فى الصميم ، مصرّين إنها حملة غير مبررة ، و أهدافها مش فى صالح البلد أيّاً كان الشخوص الداعيين لها .. ومهما إختلفت معنا أراء بعض اصدقاء الصفحة 😊😊

الخلاصة .. ومن الأخر ..

اوعى تبيع دماغك لحد ..

اسمع ، و حلل ، و افرز ، و غربل ، و ارمى الهَطَل فى الزبالة .. وبلاش تسمح لحد إنه يلعب على وطنيتك ، لإن اللى مش عاجبه البلد ، واللى ضدها على طول الخط ، واللى بــ يشخصن الخلاف فى مبارك ، والسيسى ، وطنطاوى وغيرهم .. عمره ما هــ يغير رأيه علشان بوست فيسبوك !!

مر تانية خلّوا بالكم من الحرب النفسية علشان ما تعملوش زى جنرالات إسرائيل ، .. أو تبقوا زى الدبة اللى قتلت صاحبها .. وفى الأخر هــ تلاقى حد بيضحك عليك ويقول لك “نشكركم على حسن تعاونكم !!

شير بقوة من فضلك وساهم فى توعية الناس

 

لمتابعة تعليقاتكم