أصل الحدوتة .. فى ثورة مصر المحروسة 3

 24 Jan 2015

 أصل الحدوتة .. فى ثورة مصر المحروسة  3

————–————–—————

 اللعبة السياسية عبارة عن رقعة شطرنج بــ تتحرك عليها كل القطع للوصول لهدف بعيد وهو “كش ملك” .. وعلشان نوصل للهدف البعيد ، ده ما يمنعش أبداً إنه فى السكة يكون فيه بعض الأهداف اللى بــ يتم ضربها ، واللى ممكن تبان للمتابع إنها بعيدة كل البعد عن الهدف الرئيسى .. وبالشكل ده تتولد حالة من الشك وعدم الفهم للمتابع للأمور بشكل سطحى وعاجز عن ربط الأحداث ببعضها ..

 سؤال: طب أمريكا والغرب والكيان الصهيونى كانوا عايزين إييه !!؟؟ …

 إجابة: كانوا بيضغطوا على مصر وبيدعموا وصول الإخوان للحكم … وعلشان كدة بمجرد إندلاع أحداث يناير 2011 إنطلقت تصريحاتهم بــ تطالب مبارك بالرحيل فوراً !!

 إستغراب: طب إزاى !!؟؟ .. مش ممكن .. !!! … إلا إذا كان الغرب أصبح فجأة مؤمن بالمشروع الإسلامى وحلم الخلافة … !!!

ومن هنا تتبذر بذرة الشك اللى تخلّى الناس مش مقتنعة ومش مصدقة … ويبقى أمريكا بتدعم الإخوان فى الوقت اللى ماحدش فيه مصدق الكلام ده

 لكن الأمر الواقع والمستجدات اللى حاصلة على الأرض فى الوقت الحالى هو تنفيذ حرفى لمشروع “الشرق الأوسط الجديد” اللى وضعه المؤرخ الصهيوني المتأمرك “برنارد لويس” بتكليف من وزارة الدفاع الأمريكية “البنتاجون” ، الخاص بتفكيك الوحدة الدستورية لمجموعة الدول العربية والإسلامية جميعًا .. واللى وافق عليه الكونجرس الأمريكي بالإجماع في جلسة سرية عام 1983م  … والموضوع ده هــ نبقى نتكلم عنه فى مقال منفصل لأنه مهم جداً ..

 وعلشان ما أطولش عليكم وممكن تتوهوا منى لإن الموضوع متشابك جداً ، فــ أنا هــ ألخص القصة كلها المرة دى فى نقط مركزة فيما يخص جزئية الثورات العربية وبدون الغوص فى تفاصيل الماضى:

 الغرب يدعم الإسلاميين أو الإخوان على وجه الخصوص للوصول للحكم لخلق كيان دينى فى المنطقة !!

 ثقة الغرب إن كيانات الإسلام السياسى فى المنطقة وخاصة الإخوان ، ماعندهمش أخلاق ، .. وهدفهم الوحيد هو الوصول للكرسى ، وبالتالى يسهل السيطرة عليهم عن طريق إبتزاز قياداتهم اللى ممسوك عليهم حاجات كتير قوى نتيجة عمالتهم للغرب.

 تنوع الكيانات الدينية فى المنطقة وإختلاف أيديولجياتها وأفكارها يخلّيها فى حالة صراع مستمر لأن الناس دى هدفهم الرئيسى دنيا وليس دين ، .. ونشأوا فى الأساس على فكر دينى مشوش على إيديين الغرب وبالتالى تفضل المنطقة مشتعلة وفى حالة تناحر مستمر ، فيتم إستنزافها إقتصاديا وعسكرياً زى ما حصل فى سوريا على سبيل المثال ..

 القضية الفلسطينية اللى إنتهت تقريباً و ما فاضلش منها غير غزة بقيادة حماس وبالتالى يسعى الأهل والعشيرة لــ لمّ الشمل عن طريق حل المشكلة على حساب جزء من سينا .. وبكدة يبقى أنا ريّحت إسرائيل مرحلياً !!

 أمريكا اللى رشقت فى أفغانستان من كام سنة ومش عارفة تخرج منها .. تقوم توجد وطن بديل للإرهاب عن طريق وصول الإسلام السياسى المتطرف للحكم فى مصر ، .. وهو ده اللى حصل لما رجع كتيييييير من قيادات الإرهاب الدولى بدعوة مباشرة من الإخوان واللى كانوا على إتصال مباشر بأيمن الظواهرى .. وده طبعاً غير اللى تم إطلاق سراحهم من السجون بالعفو الرئاسى الشهير بتاع مرسى !!

 وجود هذه العناصر الإرهابية فى سيناء يجعلها ورقة ضغط مستمرة فى إيدين الغرب ، .. ويا إما تنفذوا اللى بنقول عليه ، يا إما نقلب المجتمع الدولى عليكم بحجة الإرهاب … وبالتالى لما نقول حلايب وشلاتين يبقى حاضر .. سد النهضة .. حاضر .. نحارب سوريا .. حاضر .. إسرائيل كيوت ومش احفاد القردة والخنازير .. حاضر .. فكك الجيش ومؤسسات الدولة .. حاضر ، .. (وحط تحت تفكيك الجيش دى مليون خط) … الخ ألخ ألخ

 وجود كيان دينى أو بمعنى أصح إسلامى حوالين إسرائيل ، يدعم الحجة بإعلان إسرائيل دولة يهودية زى ما تم التلويح به فى بدايات عام 2013 ، واللى ماحدش من كيانات الإسلام السياسى اللى كانت فى الحكم فى الوقت ده فكروا حتى يعلّقوا عليه مجرد تعليق واحد !! وكأنه كان هوا .. !!!

 بمجرد إعلان اسرائيل دولة يهودية ومع حالة الهياج اللى ممكن تحصل من شعوب المنطقة ، غير التصريحات والشعارات الحنجورية الغير مسئولة اللى هــ تطلع من الساسة الكبار ، فــ يقوم الإعلام الصهيونى بتدويل الموضوع ، ويرتفع الصراخ والبكاء والعويل على الصهاينة الكيوت اللى المسلمين الوحشين هــ يأكلوهم أحياء ، .. وبالتالى ينفجر الموقف بعد حدوث بعض الإحتكاكات بحيث يبقى فيه ذريعة للتدخل الغربى فى المنطقة .. على الأقل فى منطقة القناة وسيناء ، بحجة حماية المصالح الدولية … (وماحدش يقوللى الكلام ده فيلم هندى لأنى بس أحب أفكركم إن الأسطول الأميريكى إتحرك فعلا ناحية القناة فى 2011 وأعلن إنه جاهز للتدخل وبنفس الحجة) .. معلش .. بس إحنا أصلنا بننسى 🙂 🙂

 ومع السيطرة التامة على مصر وتفكيك جيشها ، بالإضافة لسوريا والعراق واليمن وليبيا اللى هــ يكونوا إتفتتوا بالكامل ، .. يبقى السيطرة على دول الخليج مسالة وقت ، يبتدى بالترهيب والإبتزاز .. “يا إما تدفعوا ، يا إما نطربقها على دماغكم” .. وينتهى بالسيطرة التامة وتدعيم وصول أمراء وملوك للحكم ، يكونوا موالين للغرب .. زى بالضبط ما حصل فى قطر ..

 وما تنسوش إن الدول الخليجية هــ تكون واقعة بين شقى الرحى ، إيران والأنظمة الشيعية الموالية ، وداعش والكيانات السنية المتطرفة ، ويبقى مافيش غير احضان أميريكا و الغرب الأوروبى !! 🙂

 وفى النهاية بالنسبة لأميريكا وإسرائيل ، الشرق الأوسط كله فى إيدينا ، وحرب الطاقة كسبناها بالسيطرة على كل منابع الطاقة فى المنطقة .. ومش قلقانين من الفقر المائى لأن النيل ودجلة والفرات وبعض الأنهار الموجودة فى سوريا بالإضافة لمخزون المياه الجوفية فى المنطقة كلها بقى تحت إيدينا ، والصراع الإقليمى ضد روسيا والشرق الأقصى خلاص بح ، لأننا جوة فى قلب المنطقة بسيطرة على الأرض و بقواعد عسكرية ، .. وكل ده خطوة على الطريق فى تحقيق الأطماع الغربية و … و حلم إسرائيل الكبرى اللى إحنا إتكلمنا عنه فى مقال سابق ، وبالخرائط ومن على مواقع صهيونية 🙂

 أصدقاؤنا أصدقاء صفحة كلام فى الصميم ..

في عام 1980م أثناء الحرب العراقية الإيرانية ، طلع تصريح من مستشار الأمن القومي الأمريكي “بريجنسكي” بيقول فيه بما معناه “إن المعضلة اللي هــ تواجه الولايات المتحدة من دلوقتى (سنة 1980) هي كيف يمكن تنشيط حرب خليجية ثانية تقوم على هامش الخليجية الأولى اللي حدثت بين العراق وإيران واللى من خلالها تقدر أميريكا ترجع للمنطقة من أجل تصحيح حدود “سايكس- بيكو” ..

 وهو ده اللى حصل فعلياً واللى ظاهر وواضح فى كل اللى بنشوفه على الأرض … !!! … يعنى فعلاً قمة السخرية والإستهانة بالشعوب والحكومات العربية !!!

بيتهيألى كدة يبقى إحنا وضحنا الصورة بالكامل من خلال مقالاتنا الثلاثة ، لييه كان لازم تحصل 25 يناير ، .. وتسلسل الأحداث على أرض الواقع بيأكد كل كلامنا ، حتى لو إختلف معنا البعض فى هذا 🙂 🙂 🙂

 اللهم إحفظ بلادنا من كل شر .. فــ مصر فى قلوبنا من وراء القصد ، وعلى الله تمهيد السبيل بفضله وتوفيقه ..

لمتابعة تعليقاتكم