27 Jan 2015
الشعب لا يريد إسقاط النظام
————————–
مرت 25 يناير .. ووراها هــ يمر بإذن الله 28 يناير .. 🙂 .. وينتقل كل الداعيين إلى الفوضى والتخريب من فشل إلى فشل إلى نهاية مخزية بإذن الله ..
دعوات حشد ، وبرامج بــ تتكلم عن ثورة شعب بالملايين ، ومواقع التواصل الإجتماعى بــ تغلى بثورة مزعومة ، ورموز ثورة مزيفة ودعاة فتنة وفوضى يطلعوا فى البرامج الفضائية .. أو ينزّلوا تتويتات مليانة سم وغل وحقد على بلد ، كل اللى عايزة تعمله إنها تحاول تقف على رجليها ، وترفع راسها ضد كل دعاوى الفوضى والهدم والتقسيم .. مش فى مصر بس لكن فى المنطقة كلها !!
وفى النهاية .. تلاقى لسة برضوا الكلام الخايب بتاع الإنقلاب بــ يترنح ، و مرسى راجع ، والنصر قريب ، والفجر هــ يطلع ، والشمس هــ تشرق من البتنجان ، … ومجموعة من الجرذان الإخوانية البائسة بــ تنزل الشوارع مدفوعين بشعارات مزيفة من قاداتهم اللى قاعدين فى التكييف وبيقبضوا بالدولار ، وسايبينهم لواحدهم فى معركة خاسرة مافيش فيها أى أمل ، ومعاهم شلة النكسجية واليسارجية وشوية العيال المغيبين اللى لسة بياخدوا مصروفهم من بابا ، و اللى فرحانين بنفسهم والإخوان بيركبوهم للمرة الألف .. وبكل أسف همّ مبسوطين بنفسهم كدة ..
اللى بيحصل فى شوارع مصر دلوقتى ، ولجوء قيادات ورموز وإعلاميو الجماعة للتهديد العلنى على كل قنواتهم الفضائية ومواقعهم الأليكترونية بعد ما كانوا بيتكلموا ليل ونهار عن السلمية البتنجانية بتاعتهم ، مالوش غير معنى واحد بس وحقيقة واقعة غير قابلة للنقاش .. وهى فشل التنظيم الدولى على كافة الأصعدة فى الرجوع بمصر إلى الوراء ..
ده حقيقى مش مبالغة ، وبدون أى تحيز ، أو تطبيل ..
أرجوكم بصوا للصورة صح ..
- التنظيم فشل فى إحداث تحريك أممى ضد مصر فى الأمم المتحدة عن طريق مجموعة من الدول بزعامة الولايات المتحدة بجلالة قدرها !!
- التنظيم فشل فى تشكيل رأى عام دولى ضد مصر ، برغم الألة الإعلامية الجبارة اللى بيتكلموا من خلالها ، إما بالإمتلاك ، أو بالتوافق ، أو بالتنسيق !!
- التنظيم فشل فى دفع اى تحرك سياسى أوروبى ضد مصر ..
- التنظيم فشل فى إستخدام الضغط الإقتصادى على دول الإتحاد الأوروبى للضغط على مصر ..
- التنظيف فشل فى إستخدام تركيا كدولة أقليمية محورية للنيل من مصر ..
- التنظيم فشل فى إستخدام القدرة المالية القطرية اللامتناهية فى إحداث إنقلاب إرهابى داخلى جوة مصر ..
- التنظيم فشل فى إستخدام الجماعات الإرهابية اللى في سيناء وطلعوا فى الأخر يستغيثوا ويطالبوا جميع العصابات الإرهابية فى العالم بمساعدتهم ضد الجيش والقوات الأمنية المصرية ..
حد هــ يطلع يقوللى .. أمّال اللى بيموتوا كل يوم دول إييه !!؟؟
والرد بكل بساطة ..
هو حضرتك عايز حرب من غير ضحايا !!؟؟
هو سيادتك عايز تدخل مواجهة وتطلع صاغ سليم !!؟؟
طب بالذمة ده منطق !!؟؟ .. دى حتى ما يبقاش إسمها مواجهة !!
طب إحمد ربنا إنك لاقيت ناس تواجه بالنيابة عنك وتموت بدالك ، وإنت قاعد فى بيتك ووسط ولادك أمن على نفسك وعلى أولادك 🙂
اللى بيحصل دلوقت ولا حاجة ومالوش غير معنى واحد بس هو إن مصر بتخطى لقدام .. وكل اللى بيحصل ده جزء من الحرب النفسية إسمه الحرب بالترهيب ..، بإنك تخلق حواليك هالة كبيرة من الرعب والخوف والتهديد لأنك ضعيف ، فتقدر تنتصر على اللى أمامك نفسياً من غير ما تواجهه فعلياً … وإفتكروا مقالات صفحتنا عن الحرب النفسية ..
كل الى بيحصل ده ولا حاجة .. وياريت ماحدش يقول اللى شوية الفشلة عايزين يضحكوا بيه علينا زى ما بيضحكوا على شوية العيال المغيّبين إننا بقينا زي سوريا واليمن والعراق ..
بصّوا للصورة صح !! 🙂
أما الفشل الأكبر وخيبتهم التقيلة فــ بتظهر بوضوح فى الفشل اللى وراه فشل ويتلوه فشل ومن خلفه فشل ، فى الحشد على الأرض ، وده إن دل على شئ ، فإنما يدل على إن خلاص الناس فاقت وفهمت وماحدش عاد يصدقهم تانى وإن شعار “الشعب يريد إسقاط النظام” أصبح موضة قديمة .. لأن الشعب فعلياً ..
“لا يريد إسقاط النظام” …