27 Apr 2015
إسلام .. أم نازية
——————
لغاية دلوقتى مش قادر أعقل ، و أفهم ، و أهضم ، المنطق الدينى والأخلاقى وحتى الإنسانى ، اللى يخلى شخص ، أياً من كان ، يقوم بــ تفجير نفسه فى سيارة تحمل على أقل تقدير 5 طن متفجرات .. و تكون العملية الإنتحارية دى داخل بلده ، وضد جيش بلده ، ويموت فيها أشخاص يحملون نفس جنسية بلده .. وكمان يكون الضحايا سواء مجندين أو مدنيين من الشباب والرجال والأطفال .. واللى ديانتهم فى الأغلب الأعم هى نفس ديانة الإنتحارى .. وهى الإسلام !!!
إييه حجم الخواء الفكرى اللى ممكن يوصّل إنسان ، إنه يتحول لدمية ممسوخة بــ يتلعب بيها و بعقلها ، فى عملية غسيل مخ ممنهجة ، أكيد لم تتم بين يوم وليلة ، ولكن تمت على مدار سنين أو حتى شهور ، علشان توصل به القناعة ، إنه يبقى مقتنع مليون فى المائة إن اللى بيعمله ده جهاد فى سبيل الله !!
ناس ضايعة وعقول ممسوخة بتفكرنى بالفكر النازى اللى وصل بــ معتنقيه لدرجة إنهم ماكانوش شايفين غير الفكر النازى ، ومافيش عندهم أى قناعات غير قناعاتهم بأفكار الحزب النازى وأفكار زعيمه .. وكمان على إستعاد إنهم يموتوا فى سبيل قناعاتهم دى وهم مرتاحين البال والضمير !
ياترى ماحدش سأل نفسه من أغبياء التأسلم السياسى ، إزاى تبقى الجنة اللى وعد ربنا بيها عبادة المتقين ، يكون ثمن الوصول لها هو دماء المسلمين !!؟؟ .. إزاى إقتنعوا بفتوى شيوخهم ، إن قتل جنود الجيش المصرى ، ومش بس كدة .. لكن وقتل الأبرياء المدنيين هــ يكون ثمن الفوز بجنة عرضها السماوات والأرض !!!!
لكن العيب مش عليهم ، لكن على شيوخهم من أمثال القرضاوى وكل اللى زيهم اللى طوّعوا النصوص الدينية لخدمة أغراض دنيوية سياسية قذرة .. و الى وقودها بكل أسف مجموعة من الأغبياء .. مش عارف بجد هــ تبقى حجتهم إييه لما يقفوا أمام ربنا عز وجل يوم القيامة !! … هل الواحد منهم يا ترى هــ يقول لربنا ، أصل عمو الشيخ هو اللى قاللى أعمل كدة !!؟؟؟ .. وإلا هــ يقول لربنا أصلى كنت طمعان فى الحور العين اللى شيوخهم بيقولوا لهم إنهم هــ يستقبلوهم بالرياحين ، بمجرد خروج روحهم من الجسد بعد ما يتفرتك فى الإنفجار !!؟؟
المرة دى أنا مش هــ أتكلم عن العمليات الإرهابية اللى حصلت فى سيناء النهاردة ، ولا هــ أتكلم عن أعداد المصابين والقتلى ، و مش عايز أقول حاجة ، ولا أثبت حاجة .. محتاجة لإثبات .. ولا هــ أستخدم أى أيات قرأنية ملأت القرأن الكريم للتدليل على كلامى بإثبات جهل وحمق وغباء الناس دى .. همّ وكل اللى هــ ييجى بعدهم ، و هــ يسير على نهجهم .. .. .. لييه !!؟؟ … لأن الفكر المشوه مش محتاج إثبات علشان يقنع اصحاب الفكر ده حتى من القرأن ، .. ولأن الدفاع والإستشهاد هــ يكون بمثابة تبرئة ساحة الدين الإسلامى اللى هو مش مدان أصلاً علشان ندافع عنه !!
الحاجة الوحيدة اللى عايز أقولها .. هى مقولة أحد الحكماء اللى قال “إن الأغبياء لا يدركون أبدا أنهم أغبياء لأنهم أغبى من أن يدركوا هذا، فــ الغبى لا بد أن يمتلك ولو لمحة من الذكاء ليدرك أنه غبى” ..
لو فكّرنا فعلاً بعمق فى المقولة دى، هــ نلاقيها صحيحة تماماً ، لأنها بــ تنطبق على كل اللى بــ يرتكبوا كل الموبقات بإسم الدين ، وفاكرين إنهم بينفذوا تعاليم ربنا عزّ وجلّ ، لكنهم فى الحقيقة مش بــ ينفذوا غير تعاليم الشيطان الى ضحك عليهم هو و المفتيين الفتّايين بتوعهم ، وإستغل غبائهم بإسم الدين، لكنهم بكل أسف أغبى من إنهم يُدركوا ده .. !!!!!!!!!
رحم الله شهداء الوطن