مصر .. و العودة للمربع صفر

27 Apr 2015

مصر .. و العودة للمربع صفر

——————————

كلامنا النهاردة مش كلام عادى … لكنه هــ يكون فى الأول وفى الأخر كلام تحذيرى علشان لو حد مش واخد باله من اللى بيحصل حواليه ، .. لازم يبتدى ياخد باله كويس قوى .. ومش كدة وبس .. لكن لازم كمان ينبه كل اللى حواليه ..

مبدئياً .. مافيش حد يقدر ينكر غير المفرضين ، أو اللى عندهم عمى قلب طبعاً ، إن فيه فرق كبير جداً بين مصر 2013 ، ومصر 2015 .. سواء من الناحية الإقتصادية أو الأمنية أو السياسية ، أو حتى على المستوى العسكرى … وإحنا إتكلمنا فى مقالات كثيرة جداً مافيش مجال لذكرها دلوقتى عن كل الإنجازات اللى مصر حققتها فى الفترة اللى فاتت ، واللى ماكانش ممكن تحصل غير بتكاتف مجتمعى .. وتلاحم بين الشعب والجيش والحكومة (ممكن نبقى نعمل تجميع للمقالات دى فى وقت لاحق) ..

 ولأن كل المحاولات لتركيع الدولة باءت بالفشل ، ولأن الدولة ماشية بخطى ثابتة .. وبتعمل أقصى المتاح من مشروعات قومية ، لــ مؤتمرات إقتصادية ، لــ توائمات سياسية ، لــ تطوير قدرات عسكرية ، لــ تحالفات إقليمية و دولية ، لــ دحر فساد داخلى ، لــ تطوير منظومات تخدم المواطن الفقير ، لــ تكسير فى الفساد اللى لابد فى عّب مؤسسات الدولة .. لــ إعادة هيكلة المؤسسات الأمنية .. و بالإضافة لرئيس دولة جايب العالم من الصين فى أقصى الشرق لأسبانيا فى الغرب .. ومن روسيا فى أقصى الشمال إلى دول أفريقيا السمراء فى الجنوب و .. و .. ألخ .. و بما إن الإرهاب دلوقتى أصبح مش بيجيب نتيجة مع المصريين   فــ بالتالى كان لازم يبتدى اللعب علشان نرجع للخلف حبتين ..  و يتم التركيز مرة تانية على الداخل ، فى محاولة لإشعال الموقف من جديد والعودة بالدولة للمربع صفر !!!

والمقصود بالمربع صفر هنا ، هى الحالة اللى كانت عليها الجبهة الداخلية فى مصر فى سنة 2010 ، وحالة التذمر ، و الغليان ، والتصعيد ، وتأليب الرأى العام على كيان الدولة بإستغلال كل السلبيات اللى كانت موجودة ، مهما كانت صغيرة وتكبير حجمها ، و بروزتها عن طريق الإعلام .. وبالتالى خلق حالة من عدم الإستقرار وتجهيز مسرح الأحداث للى حصل بعد كدة فى 2011 !!!

 وهو ده اللى بيحصل دلوقتى بالضبط …

نفس الوتيرة ..

نفس الأشخاص أو حتى شخوص أخرى ..

نفس الضغوط الخارجية ويمكن أشد ..

نفس الوجوه الإعلامية بنفس السياسة ..

 كل اللى بيحصل دلوقتى مش من قبيل الصدفة ، ولا يمكن يكون عن غير قصد … لأن لما مرة وحدة كدة _خير اللهم إجعله خير_ تلاقى كل الإتجاهات بتشتعل فجأة و التوون بــ يعلى بنفس النغمة ، يبقى ده مش ممكن يكون بالصدفة .. وإفتكروا كل اللى حصل من منتصف سنة 2011 واللى إكتشفنا بعد فترة إنه كان له أهداف محددة ونتائج مطلوب الوصول لها ..

 وإفتكروا برضوا كلامنا قبل كدة لما قلنا إن كل ما تلاقوا دوشة كبيرة ، وتهليل وتطبيل ، ..  إعرفوا على طول إن الموضوع فيه إنّ .. والحكاية فيها زينب 🙂

 يعنى لما جريدة المصرى اليوم تتبنى حملة مفاجأة على الداخلية ، ونرجع تانى نتكلم عن التعذيب فى الأقسام ، والإغتصاب ، وإستغلال النفوذ ، والإنتهاكات .. ولما جريدة اليوم السابع مايبقاش وراها حاجة غير موضوع بيوت الدعارة وزنا المحارم والتحرش الجنسى وإنتهاكات الأطفال وخيانة الزوجات .. ويكون كل ده بالتزامن مع دعاوى متخلفة يتم التطبيل لها وتكبيرها وبروزتها لخلع الحجاب ، والحرية المثلية .. وكل ده ماشى فى نفس التوقيت مع الحديث عن كتب التراث مابين مؤيد ومعارض ، وكلام ولت وعجن كثيييييير قوى .. يبقى أكيد الكلام ده مش طبيعى

 لما معظم الإعلاميين يسخنوا فجأة ويبدأو مهاجمة الحكومة بضراوة .. والتركيز على السلبيات _اللى أكيد ماحدش يقدر ينكرها_ والكلام عن الفساد الإدارى والتخبط الخططى ، وإنعدام الرؤية .. لأ وكمان الهجوم ده يتخطى للهجوم على الرئيس السيسى بشكل مباشر وعنيف من بعض الإعلاميين بنفس السلوب اللى كان بيتم فيه فى 2010 .. يبقى أكيد الكلام ده مش طبيعى !!

 لما نبتدى نسمع تانى عن دعاوى إعتصامات ، والمناداه بإسقاط الحكومة والكلام من تانى عن العدالة الإجتماعية وزيادة المرتبات بالرغم من إن مصر يادوب بتحاول تقف على رجليها .. يبقى أكيد الكلام ده مش طبيعى !!

 لما نبتدى من تانى التشكيك فى قدرات الجيش ، وبعدين النواح والتباكى على جيشنا المسكين اللى هــ يضيع فى حرب اليمن .. وإشاعات عن خلافات حادة مع السعودية وبيانات مضروبة بيتم نشرها ، والإمارات بتتخانق مع السعودية علشان خاطر مصر ، .. وقطر مش عارف بتعمل إييه .. ألخ ألخ ألخ .. يبقى أكيد الكلام ده مش طبيعى !!

وعلشان الصورة تسوّد أكثر .. يبقى لازم يكون فيه كمية حرايق فى المنشأت بمعدل مش طبيعي في مصر ، و كمية حوادث متكررة ومتصاعدة وغير مبررة زى حادث المترو مثلاً , وإشتعال النار فى المواصلات العامة من غير سبب واضح .. وحادثة زى ناقلة الفوسفات بمعايير أمن وسلامة منعدمة .. و نحط عليها تصريحات متخلفة من بعض المسئولين علشان تزوّد الطينة بلة .. وحالات تسمم غير منطقية وغير مفهومة يطبل لها الإعلام بإعتبارها نتيجة الفوسفات ، من غير محاولة للفهم أو للتحليل أو حتى وضع تصور منطقى للى بيحصل .. يبقى أكيد فيه حاجة غلط !!

 ولما نحط على كل ده ، تحركات الجماعة القذرة بتفجيرات ، وحرائق ، فى الوقت الل بــ يتم الكلام عن مصالحة وهمية علشان يحصل عملية بلبلة فى الشارع ، وناس توافق وناس تعترض ، وناس تقول فصيل وطنى ، وناس تقول المسامح كريم ، وناس تقول يتحرقوا بجاز … و .. و .. يبقى أكيد الكلام ده مش طبيعى !!

الإرهاب ماجباشي النتيجه اللي عايزها الإرهابيين , و لا المظاهرات بقت تجمّع خمسه سته على بعض , و السيسي ماشي و دايس , يوم يظهر في مصنع و يوم في طريق , فجأه تلاقيه في روسيا و بعدين تصحى تلاقيه في اسكندريه , طب و بعدين ؟ نعمل شوية تفجيرات جايز تجيب نتيجه ؟ لأ برضه مفيش فايده .

 لكن إحنا مش هــ نعيده تانى يا مصريين .. و ماينفعش نبتدى من الأول تانى بعد اللى وصلنا له .. وحلة الإستقرار النسبى ، والإستثمارات اللى هاتدخل مصر ، وقناة السويس اللى هــ يتم إفتتاحها كمان كام شهر .. وننسى إن مصر نجت بمعجزة من مخطط تقسيمها و تفتيتها زي سوريا والعراق و اليمن وليبيا .. وإفتكرو إن مُخرج الأحداث مش هـ يتنازل بسهولة عن حلمه بخراب مصر واللى بيستغل فيها المصريين أنفسهم من إخوان ، لــ فلول الفساد ،  لــ كولّجية الثورة المزعومين .. زى بالضبط ما إستغل شعوب الدول اللى تم تفتيتها حوالينا … والصورو ما بتكذبش !!!!

 الكل دلوقتي بيعيد و يزيد في نغمة إن الحكومة و النظام فاشل .. بالرغم من إن اللى بيتكلم هو المادة الخام للفشل ذات نفسه .. و بكلمة و رد غطاها .. اللى عنده بديل و خطة بديلة واضحة المعالم و قابلة للتطبيق يتفضل يقولها .. و غير كده يبقي حط لسانك في بقك ، و سمعنا سكاتك !! 🙂 .. إحنا جربناكم قبل كده .. و ناس كتير سمعت كلامكم و مشيت وراكم و طلعتم أفشل خلق الله  !!

 و أنا باقول لكم يا مصريين .. ينسوا .. عمرهم ما هــ يشموها تانى .. ولا حد هــ يسمح لهم بإنهم يخربوا البلد تانى .. لكن ده مش هــ يحصل إلّا بإيدينا إحنا .. بإيدين كل المصريين اللى خايفين على بلدهم وعلى مستقبل أولادهم ..

 خلّوا بالكم من مصر يا مصريين ..

اللهم بلّغت .. اللهم فـاشهد

 لمتابعة تعليقاتكم