النسر المصرى يحلق على ضفاف النيل الأزرق

24 Mar 2015

النسر المصرى يحلق على ضفاف النيل الأزرق .. !!

————————————————-

بالرغم من اننا ماكناش عايزين نتكلم فى الموضوع ده تحديدا نظرا لاعتبارات كتيرة .. لكن .. و لاننا استلمنا كم كبير من الرسائل اللى مليانة قلق وخوف وعدم وضوح للرؤية .. وللاسف جزء كبير من القلق كان بسبب اعلام الفتة بتاعنا اللى أصبح بيعتمد على الاشاعات وعلى اسلوب التهييج علشان يحقق أعلى نسبة مشاهدة .. أكثر ما بيعتمد على الحقائق من مصادرها الصحيحة وتحليليها للوصول الى الصورة الكاملة !! ..

علشان نتكلم عن الموضوع ده لازم نرجع شوية للطلب اللى قدمته اسرائيل من كام سنة بمد خط من النيل لتزويد اسرائيل بالمياه ،  وهو ما رفضته القيادة المصرية تماما فى زمن الرئيس الأسبق مبارك .. و ده اللى أدى بعدها بوقت قصير لظهور ما يسمى باتفاقية عنتيبى !!

وعلشان ما ندخلش فى تفاصيل كتير بخصوص الاتفاقية دى فالموضوع باختصار هو محاولة اتفاق دول حوض النيل على نقض اتفاقية مياه النيل الحالية بداية من معاهدة أديس أبابا 1902 ووصولا لإتفاقية سنة 1959 بين مصر والسودان بخصوص حصة مصر والسودان .. وعدم الاعتراف بحصة مصر وهى ال 55 مليار متر مكعب على اعتبار ان ده يمثل تعدى على حقوق دول حوض النيل .. برغم ان إجمالى المياه المتدفقة فى نهر النيل سنويا تتحاوز ال 570 مليار متر مكعب سنويا …. شوف ازاااااااى … !!!

ولأن الجهود الديبلوماسية والضغوط المصرية كانت ناجحة لحد كبير ، فالاتفاقية دى تم تعطيلها بشكل مؤقت .. علشان تظهر فى الافق موضوع انشاء سد النهضة .. علشان مصر كدة تبقى محطوطة بين شقى الرحى .. فإما انها توافق على سد النهضة أو تلاقى نفسها فى مواجهة إتفاقية عنتيبى 🙂

وجائت الثورة المصرية المباركة فى 2011 و أصبحت مصر فى مواجهة داخلية بإنهيار مؤسسى كامل ، علشان تستغل أثيوبيا الموقف وتبدأ فى انشاء السد فعلا ، واللى كانت السعة التخزينية له فى حدود الــ 40 مليار متر مكعب .. وبعدين تم تعديل التصميمات الهندسية وخصوصاً بعد وصول الإخوان للحكم فى مصر علشات توصل سعته التخزينية لحوالى 74 مليار متر مكعب و ده هــ يخلى مصر تواجه مشكلة خلال الفترة اللى هايستغرقها ملئ الخزان بالمياه !!!

ملف سد النهضة كان من أهم الملفات اللى كان على القيادة السياسية الحالية التعامل معاها بمنتهى السرعة والقوة .. لمحاولة إنقاذ ما يمكن إنقاذه .. وخصوصاً بعد ما وصل حجم الإنشاءات الخاصة بالسد إلى ما يعادل 45% من إجمالى الحجم النهائى لجسم السد !!

صفحتنا مش هــ تسقط فى فخ إصدار الأحكام زى ما ناس كتير عملت .. وخصوصا بعد كل كذابين الزفة وإعلاميو الفتة المصرى ما بدأو الترويج لفشل المؤتمر ، وإن إتفاقية إعلان المبادئ دى ضحك على الذقون .. ومصر إشترت الترماى .. و كل الكلام اللى انتم عارفينه من النوع ده .. واللى بيجيب إعلانات كتير ، .. لكن ماعدش حد بيصدق الكلام ده خلاص .. وعلشان كدة إحنا هــ نعرض لكم فى إيجاز .. أهم الرسائل المستخلصة من كلمة الرئيس السيسى إمبارح .. واللى ثبت بالتجربة لجميع اصدقائنا إن دايما وجهة نظرنا ، و تحليلنا لمدلول الكلمات بيكون صحيح على المدى البعيد 🙂 🙂

* الرئيس قال إن الإتفاق اللى تم على قواعد ملئ الخزان وتشغيله بــ يضمن تحقيق المنفعة لأثيوبيا دون الإضرار بالمصالح المائية لمصر والسودان .. و افتكروا كلمة رئيس الوزراء الأثيوبى لما كان فى المؤتمر الإقتصادى فى شرم الشيخ لما قال موجها كلامه للرئيس السيسى .. إحنا إختارنا إننا نعوم مع بعض يا سيادة الرئيس 🙂

* وقال .. لا بديل على تفهم دوافع كل طرف لدوافع ومتطلبات الطرف الأخر ولا مجال للإستئثار من طرف على حساب الطرف الأخر .. يعنى ببساطة خالص إحنا فى سلة واحدة ، وعايزنى أفهمك يبقى لازم تفهم قلقى أنا كمان .. والموضوع مافيهوش هزار لأن ده أمن قومى ..

* وقال كمان .. أدعوكم لنحلم سويا بالخير والرخاء .. لنترك لشعوبنا إرثاً من المحبة والتعاون .. يعنى من الأخر كدة الصدام المرة دى هايكون صدام شعوب مش خلاف سياسى لحكومات وكيانات سياسية لدول .. واللى هــ يتهور .. مايزعلش لما يتعور 🙂

ده كان فيما يخص الكلمة الرسمية .. لكن الأهم هو اللى الرئيس السيسى قاله لما قلب بالعامية المصرية 🙂 .. لأن فيه 3 نقاط غاية فى الأهمية

– الأولى لما قال فيما معناه إننا ممكن نوقع إتفاقيات كتير لكن الأهم حسن النوايا ، ومن غيرها مش هــ نوصل لحل .. عايز تنمى بلدك .. ماشى .. بس خلى بالك فيه ناس تانية عايشة على المية دى !!

الرسالة هنا واضحة وصريحة وفيها زئير مكتوم بإنك لو بتعمل كدة علشان بلدك ، فــ إحنا نقدر نتفهم ده وهــ نساعدك ونتعاون معاك لكن لو الموضوع له أبعاد أخرى ، و فيه أطراف تانية .. فــ مصر مش هــ تسكت 🙂

– الثانية .. إن مياة النيل من عند الله و يحيا بها الجميع في مصر من ألاف السنين .. يعنى مش علشان المية بتنزل فى أثيوبيا تبقى بتاعة “أهــ….ك” ، فبلاش تلعب اللعبة دى علشان مصر مش هــ تسكت 🙂

– الثالثة والأخيرة .. ممكن نتعاون ونعمل حاجات كويسة مع بعض .. وممكن نفضل نؤذى فى بعضنا .. وإحنا إختارنا التعاون على البناء والتنمية .. (وتصفيق من الجميع بما فيهم رئيس الوزراء الأثيوبى يحمل معنى الموافقة) 🙂

ويختم الرئيس كلامه بإن ده مجرد إتفاق إطارى وإحنا لسة بنستكمل عليه ..

طب أنا عايز أعرف بس .. كذابين الزفه والفتايين ، وخبراء التوك شو وجنرالات ورجال إقتصاد الفيسبوك .. أصدروا أحكامهم ووضعوا تصوراتهم بناءً على إييه بالضبط !!؟؟

كله بــ ينقل من كله ، وكله بيهلل ويلعب دور الوطنى .. وده غير أصحاب الأجندات اللى بيلعبوا على الوتر الحساس علشان يعملوا حالة من التهييج والقلق الشعبى لحساب نفسهم أو لحساب أجنداتهم بدون النظر لمصلحة مصر والمصريين ..

الرئيس السيسى بيلعب سياسة وبيحاول يرفع أنقاض الخراب اللى خلفته ثورة الخريف العبرى فى مصر .. ويلغى او يقلل من حجم الأضرار اللى تسبب فيها رئيس زريبة الجماعة اللى وصل فى غفلة من المنطق لرأس السلطة فى مصر .. !!

كلام الرئيس فى جلسة توقيع المبادئ بيقول ان جناح النسر المصرى ابتدى يتفرد علشان يظلل على منابع نهر النيل …. و أحنا من هنا بــ نعلن تضامننا مع الحكومة المصرية و مع الرئيس السيسى فى كل قراراتهم وتوجهاتهم ثقة منا فى حسن رؤيتهم وقدرتهم على مباشرة كل الموضوعات المتعلقة بملفات الأمن القومى المصرى ..

فياريت بلاش قلق و خليكم واثقين فى قيادتكم السياسية .. لأن فيه تعهد ان مصر هاتبقى قد الدنيا .. وبإذن الله هاتبقى قد الدنيا 🙂

لمتابعة تعليقاتكم