10 Jun 2015
المؤتمر الإقتصادى الإفريقى .. كورة فى الجون .. !!
————————————————–
بجد من كل قلبى بــ أقول “تحيا مصر”
الإدارة المصرية بتتحرك بمنتهى الوعى والإدراك لكل مشاكل مصر اللى عانينا منها على مدار 30 سنة ماضية .. منها تقزّم دور مصر الريادى على المستوى العربى والأفريقى والدولى كمان .. ومش كدة وبس .. لكن مصر بتسعى بكل قوة لبناء نفسها إقتصادياً .. لأن اللى يملك إقتصاداً راسخاً .. وجيشاً قويا .. وشعبا متحداً وداعماً للدولة ، مش ممكن يقلق من أى حاجة بعد كدة 😊
طبعا شمّامين الكلة واللّطامين اللى بيتكلموا بكل إحتقار عن دول أفريقيا بإعتبار إنهم شحّاتين زى مصر .. و إتلمّ المتعوس على خايب الرجا .. أحب بس أقول لهم إن مافيش حد خايب الرجا غيركم انتم يا شوية فشلة يا فاقدى الرؤية .. ولو وجهة النظر دى صحيحة ، ماكانتش فرنسا وأميريكا يتصارعوا فى الخفاء على زيادة النفوذ فى أفريقيا ، و ماكانتش إسرائيل تسعى بكل جهد علشان توطد أقدامها فى أعماق القارة السمراء .. و ده سبب أدعى إن مصر تأمّن ظهرها من ناحية الصهاينة اللى بــ يحولوا يضربوا مصر فى ظهرها عن طريق أفريقيا !!
مصر فعلا بتتحرك بقوة .. وبترسخ اقدامها فى أفريقيا .. والتوجه الحالى بجعل مصر مركز تجمع إقتصادى لكل دول أفريقيا ، ده فكر عالى جداً .. لأنك بكدة بتربط الدول والشعوب بمصر بإعتبارها الشريك الأقرب والأنفع للدول دى .. سواء الدول الغنية منها بثرواتها الطبيعية أو الفقيرة .. وعلشان كدة مصر جمعت فى مؤتمر شرم الشيخ التجمعات الاقتصادية الأفريقية الثلاثة وهى الكوميسا، والسادك، وإتحاد شرق أفريقيا .. !!
اللى بيحصل ده زى ما نوّه الرئيس السيسى النهاردة فى كلمته الإفتتاحية ، بــ يمثل نقطة هامة وفاصلة فى تاريخ التكامل الاقتصادى لأفريقيا ، لأن تأسيس منطقة للتجارة الحرة الثلاثية تضم فى عضويتها ستاً وعشرين دولة ، و يبلغ عدد سكانها 625 مليون نسمة، ويبلغ الناتج المحلى الإجمالى لها 1.2 تريليون دولار أمريكى، واللى بــ يمثل أكثر من 60% من الناتج المحلى الإجمالى لقارة أفريقيا يعتبر من غير أى تطبيل ولا تهليل خطوة جبارة _لو إكتملت_ على طريق تحرر مصر إقتصادياً وسياسياً من التبعية لأى حد أيّا كان !!
الرئيس السيسى قال كمان النهاردة فى كلمته الإفتتاحية إن مصر والسودان قاموا الشهر الماضي بافتتاح الطريق البري اللى بــ يربط برياً بين مصر والسودان، وجارى الانتهاء من أعمال المعبر البرى الثاني اللى بــ يربط بين مصر والسودان في إطار الطريق البرى اللى هــ يمتد من القاهرة إلى كيب تاون .. وأكيد كل خبراء الإقتصاد عارفين إنك لما تربط نفسك بعدة دول بالطريق البرى سواء كان طريق سيارات أو خط سكة حديد ، ده معناه إييه..
مصر مش بتلعب يا مصريين 😊😊
وأخيراً .. فــ توقيع الرئيس عبد الفتاح السيسى النهاردة مع عدد من الزعماء الأفارقة منهم رئيس زيمبابوى روبرت موجابي، ورئيس وزراء إثيوبيا هايله ماريان ديسالين، ونائب رئيس جمهورية تنزانيا محمد غريب ، على وثيقة اتفاقية التجارة الحرة ، واللى تضمن إقامة منطقة تجارة حرة بين 26 دولة و الإتفاق على تحرير التجارة بينها بحلول عام 2017 .. ده بيخلينى أشوف إن مصر بتحسبها صح ، وبتتحرك فى كل الإتجاهات .. و ده بيفكرنى بمقولة الفنان عادل إمام فى فيلم مرجان أحمد مرجان إنك لازم تكون مظبّط نفسك فوق وتحت علشان لو اللى فوق سابوك ، اللى تحت يشيلوك ، ولو اللى تحت سابوك ، اللى فوق يشدّوك !! 😃😃
وطبعاً مش محتاج أقول إن كل اللى بيتعمل ، هــ ينعكس على الداخل ، وهــ يرفع مستوى الإقتصاد المصرى وبالتالى المواطن الغلبان المطحون .. واللى الكوّلجية والإخوان والإعلاميين والصحافة ما وراهمش حاجة غير المتاجرة بالمواطن الغلبان ده ، من غير مايعملوا له أى حاجة على أرض الواقع !
ربنا يحفظ مصر وشعبها من كل شر 😊