17 Jul 2016
مصر … وإستكمال المهمة الأفريقية … !!
————————————
الرئيس السيسى بــ يشارك الزعماء والقادة الأفارقة حضور القمة الأفريقية التى بدأت اجتماعاتها الرسمية النهاردة في العاصمة الرواندية كيجالي .. وسط ترحيب كبير من كل القادة الأفارقة حسب كلام جميع البعثات والحضور من كل الإعلاميين … وكمان الترحيب به كان بشكل خاص فى العاصمة الرواندية لأنه أول رئيس مصرى يقوم بزيارة روندا 🙂
الموضوعات اللى تحدث فيها الرئيس السيسى ، و اللى تم ومازال بــ يتم مناقشتها كتيرة ومتشعبة .. وكلها بتضرب على وتر تقدم أفريقيا ورخائها على المستوى السياسى والإقتصادى .. منها مثلا الحديث عن وضعية أفضل وتمثيل جغرافى أوسع يتيح لأفريقيا التمثيل العادل اللى تستحقه فى العضويــة الدائمـة وغيـر الدائمـة بمجلس الأمــن، مع تمتع الدول التى ستنضم كأعضاء دائمين جدد لمجلس الأمن الموسع بكافة الحقوق وفقا للموقف الأفريقى الموحد !
لكن الأهم كان الحديث عن التكامل الإقاليمى وصولاً لإقامة الجماعة الاقتصادية لأفريقيا بما في ذلك سبل الانتهاء من المفاوضات حول إنشاء منطقة تجارة حرة أفريقية ،.. و البناء على نجاح القمة الثالثة للتجمعات الاقتصادية الثلاثة “الكوميسا – السادك – تجمع شرق أفريقيا” اللى إنعقدت فى شرم الشيخ فى يونيو 2015 بمشاركة 26 دولة أفريقية ، وتم التوقيع على الاتفاق النهائى لإنشاء منطقة للتجارة الحرة بين التكتلات الثلاثة، واللى من شأنه تحرير التجارة بين الدول الأعضاء بما يسمح بتدفق السلع والمنتجات والاستثمارات بينها.. و طبعا أهم الأماكن المقترحة لمنطقة التجارة الحرة هو محور التنمية فى منطقة القناة 🙂
بصراحة شديدة ، أنا متخيل شكل وجه نتنياهو وهو بــ يشوف اللى بيحصل ده كله ، واللى بيحرق له كل خطواته ومحاولات زيادة التوغل الإسرائيلى فى أفريقيا .. وخصوصاً بعد ما نفى الوزير سامح شكرى فكرة الموافقة على دخول إسرائيل للإتحاد الأفريقى كعضو مراقب من قبل مفوضية الإتحاد … على الأقل لحد دلوقتى !!
أفريقيا أصبحت أرض معركة جديدة تخوضها مصر دفاعاً عن أمنها القومى لمواجهة التحديات .. وخصوصاً لما نعرف إن نتنياهو بيخطط لجولة افريقية لدول غرب أفريقيا فى سبتمبر القادم …. يعنى المواجهات أصبحت سجال … وإحنا بنقول الكلام ده من دلوقتى علشان بس مايجيش حد وقتها ويقول فين مصر !؟ .. وفين الخارجية !؟ .. وزيارة سامح شكرى جائت لييه فى التوقيت ده بالذات .. وكل الكلام اللى إتقال فى الأيام اللى فاتت بالتزامن مع جولة نتنياهو الأفريقية وزيارة الوزير سامح شكرى لإسرائيل 😉
مصر بتنتهج سياسة الفعل .. وأعدائها بيحاولوا يجروا وراها فى كل حتة ومش ملاحقين .. وإفتكروا جملة “بكرة تشوفوا مصر” … 🙂
بس بإيدينا .. يعنى بالعمل مش بالتمنيات 🙂 🙂 🙂