الوطنية الحنجورية .. فى كلمتين وبس

09 Oct 2016

الوطنية الحنجورية .. فى كلمتين وبس (كلام غير تقليدى)

——————————————————-

النهاردة أعلن رئيس الوزراء الإثيوبي “هايلي مريم ديسالين” حالة الطوارئ لمدة ستة أشهر بهدف استعادة النظام فى أثيوبيا بعد الإحتجاجات اللى إندلعت بشكل واسع على مدار الأسابيع الماضية ، واللى أسفرت عن سقوط قتلى من الأثيوبيين وبعض الأجانب منهم سيدة اميريكية.

ونشرت وكالة رويترز إن إعلان حالة الطوارئ كان من خلال كلمة لرئيس الوزراء بثها التلفزيون الحكومي بعد ما قام المحتجون بتدمير السيارات والمنشأت والمصانع ، نتيجة العنف اللى إنتهجته قوات الأمن الأثيوبية واللى نتج عنه سقوط ضحايا إما بسبب قوات الأمن أو بسبب التدافع فى التجمعات الكبيرة للمتظاهرين

كل ده مايخصناش إحنا كمصريين فى حاجة وخصوصاً إن التظاهرات دى أساسها عرقى نتيجة الصراعات بين شعب أو قبائل الأورمو اللى بيعتبروا المكون الأساسى للشعب الأثيوبى ، وبين باقى المكونات المجتمعية فى الداخل الأثيوبى … يعنى الموضوع كله مشاكل داخلية نتيجة الإضطهاد العرقى اللى بيتعرض له شعب الأورمو ، والإستيلاء على أراضيهم قسراً من جانب السلطات الحاكمة بالإضافة لتدهور الأوضاع المعيشية نتيجة سوء الحالة الإقتصادية لمعظم قبائل الأورمو بسب الإضطهاد والتجاهل !

نيجى بقى إحنا هنا فى مصر .. وداخل العالم الفيسبوكى الإفتراضى .. تلاقى ناس بتكتب على صفحتها .. وتلاقى صفحات كتيرة مش معروف لها صاحب ، مدورينها شوية عيال ، أو حتى ناس كل هدفهم إنهم يجمعوا أكبر عدد من الشير واللايكات .. تلاقيهم بيرتدوا عباءة المفتش كولمبو .. أو رداء رجل المخابرات اللى جاب جون فى جيمس بوند ، ويشيروا اخبار المظاهرات اللى فى اثيوبيا ويقولّك كلام من نوعية .. “شكرا للعميقة” .. أو “الصقور لا تنام” .. أو “العميقة عندما تعمل فى صمت” .. ألخ ألخ ألخ

عميقة مين يا متخلف إنت وهو .. وإييه طقم الوطنية الحنجورية الغبية ده اللى سيادتك عايشه ، وكأنك بتشرب الشاى كل يوم مع عمر سليمان !!؟؟ .. هو إنت مش عارف إن كل كلمة بتتكتب على الفيسبوك مرصودة وبيتم فلترتها و دراستها من كل الأجهزة الأمنية اللى فى العالم تقريباً !؟ .. هو إنت ماتعرفش إنك بــ تلبّس بلدك كدة فى حيطة سواء بسلامة نية أو بغباء شديد و حمورية منقطعة النظير !!؟؟

فوق ياحبيبى إنت وهو وبلاش تعيش فى دور “رجل المستحيل” لأن اللى سيادتك بتعمله مايفرقش كتير عن اللى بتعمله اللجان الأليكترونية للإخوان وغيرهم … علشان بس ماتبقاش عامل زى الدبة اللى قتلت صاحبها .. ده مع فرض إنك مالكش أى اغراض دنيئة !

مصر لا تتدخل فى الشئون الداخلية لأى دولة ، لأننا مش دولة معتدية . وخليك فاكر إن مصر يهمها برضوا إستقرار دول منابع النيل مش العكس …

لمتابعة تعليقاتكم