08 Nov 2014
ضربة كانت من معلم .. !! 🙂
———————————-
جملة للراحل عبد الحليم حافظ فى أغنية “حكاية شعب” ، جائت على بالى النهاردة بعد صدور البيان الختامى للقمة الثلاثية (مصر – قبرص – اليونان) ، واللى جمعت الرئيس المصرى والرئيس القبرصى ورئيس الوزراء اليونانى
النظرة الأولية والسطحية لأى حد متابع أو مترقب أو …. أو متنمّر .. هــ يقول:
يا سلام .. !!! ..
كل ده علشان قبرص واليونان !!؟؟
يعنى مش ألمانيا وإنجلترا يعنى !!؟؟
وردى على الأشكال دى بكل بساطة هــ يكون: “إن اللى مايعرفش يقول عدس” 🙂 .. لإن القمة دى ياشاطر ، هــ تعمل إرباك لحسابات قوى إقليمية زى تركيا وإسرائيل لتأثيرها الإستراتيجى والإقتصادى ويمكن العسكرى كمان !!
أولا: التلميح فى الجزء الإقتصادى على مصادر الطاقة فى شرق المتوسط والتعاون للإلتزام بمعاهدة الأمم المتحدة لقانون البحار، و سرعة استئناف المفاوضات بشأن ترسيم حدودنا البحرية ، بــ يضرب إسرائيل فى مقتل فيما يخص المياه الإقليمية ، و حدوتة حقول الغاز البحرية اللى الخناقة كلها دايرة عليها دلوقتى ..
ثانيا .. حبة عكننة على تركيا لأن إذا كانت مابينها وبين مصر “ما صَنَع الحدّاد” .. فــ قبرص بينها وبين تركيا مصايب سودة ، لأن تركيا بتحاول تزعزع إستقرار قبرص وتقسيمها بحجة شوية الأتراك اللى عايشين فيها علشان إسترجاع وهم الخلافة العثمانية ، .. بالإضافة لأطماع تركيا فى اليونان والسيطرة على مصادر الطاقة ، .. وكون قبرص واليونان يعملوا تقارب مع مصر فى التوقيت ده ، فــ الموضوع كدة بقى له أبعاد أعمق بكتير من اللى ظاهر على السطح .. ومبروك على أردوغان التبول اللا إرادى .. (ماتقوم تتطمن على خلافتك) =D
ثالثا .. كون الرئيس اليوناني يقول إن اليونان وقبرص هــ يكونوا سفراء مصر في الإتحاد الأوروبي لدعم مصر بكل الطرق لدى دول الإتحاد .. ، ده هــ يدّى مصر وزن فى العلاقات مع الإتحاد الأوروبى .. وأظن عمرنا ما شوفنا رئيس دولة بيقول إنه هو ودولته هيقوموا بدور السفير لدولة تانية لدعمها ومساندتها..؟!!!
رابعا .. مايمنعش إن البيان يكون فيه تنبيط عن السعى لحل القضية الفلسطينية ، و دعم مصر فى معركتها ضد الإرهاب ، ومواجته بكل السبل سواء فى ليبيا أو فى أى مكان أخر .. (وسمّعونى أكبر ضحكة شرّيرة) .. =D
مصر أيها السادة .. بــ تعيد ترسيم خريطة الطاقة إقليمياً ودولياً حسب إرادتها
وبما يتماشى مع مصالحها .. واللى متابع الخرق اللى عمله الطيران الروسى فى البحر المتوسط من فترة قريبة ، والغواصة الروسية اللى تسللت فى مياهه الاقليمية … هيعرف ان البحر المتوسط هو رقعة الشطرنج المقبلة وليس أى مكان آخر
المعركة بــ تحتدم ، والمساحات على رقعة الشطرنج بــ تزداد تشابك ، وكل حركة فى الفترة اللى جاية هــ يكون لها أبعادها وتداعياتها مش إقليميا بس ، ولكن دوليا كمان ..