24 Mar 2016
مصر تعود .. مصر تقود ..
ورســـائل بــالجـــمـــلة …. !!
————————–
النهاردة كانت فعاليات اليوم الثالث لمؤتمر تجمع دول الساحل والصحراء .. وللى ما يعرفش .. فــ تجمع دول الساحل والصحراء يعتبر ضمن 8 تجمعات إقليمية من 27 دولة عضوًا، ويأتى بعد الاتحاد الأفريقى كأكبر تجمع للدول الأفريقية من ناحية المساحة وعدد السكان والنواتج الإجمالية المحلية، وهو همزة وصل بين شمال وغرب ووسط أفريقيا !! ..
طب تعالوا نتفرج بنظرة تليسكوبية على المؤتمر ده كدة فى مجموعة من النقاط، ونفكر فيها واحدة واحدة !!؟؟ .. 🙂
أولا .. المؤتمر بينعقد فى مدينة شرم الشيخ .. مدينة السلام المصرية .. المدينة اللى شائت الظروف إنها تدفع ثمن حدث إرهابى ، كجزء من مخطط هدم مصر أو محاولة تعطيلها إقتصاديا وسياسيا .. وكجزء اخر من مخطط هدم منطقة الشرق الأوسط بالكامل وتفتيت جميع دول المنطقة … لأ .. وشوف حكمة ربنا يا مؤمن لما يتزامن بقى إجتماع زى ده ..، فى مدينة تم وصمها من المجتمع الدولى بعدم الأمان ، مع حادث إرهابى جلل من يومين ، أدى إلى إنقلاب فى كل الأوضاع الأمنية فى أوروبا والعالم كله .. وكأنها تصاريف القدر 🙂 🙂
ثانياً … لو قُدّر لحد فيكم إنه يتواجد فى مدينة شرم الشيخ ، كان لاحظ إن الحياة فى المدينة تكاد تكون طبيعية بدون أى إجراءات إستثنائية محسوسة ، برغم كل المحاذير الأمنية العالمية على شرم الشيخ وسيناء بالكامل .. و ده فى حد ذاته رسالة فى منتهى القوة ! 😉
ثالثا .. المؤتمر بيشهد تجمع وزراء دفاع وممثلى جيوش 27 دولة افريقية ، بالإضافة إلى عدد من السفراء والمسئولين الدبلوماسيين و5 دول أوروبية هى، فرنسا، وإيطاليا واليونان، وقبرص، وإسبانيا، وعدد من الهيئات والمنظمات الإقليمية والدولية اللى بتشارك بصفة مراقب .. !!
إيييه !؟ .. بتقول ميييين !؟؟ فرنسا، وإيطاليا واليونان، وقبرص، وإسبانيا !!؟؟ … مش الدول دى كانت من أولويات زيارات السيسى فى جولاته المكوكية الدولية واللى إتكلمنا عن كل واحدة منهم بالتفصيل !؟؟ .. مش الدول دى اللى فيه بيننا وبينهم تنسيق إستراتيجى معلوماتى وأمنى وعسكرى .. وكمان العلاقات الإقتصادية معاهم بتشهد تنامى ملحوظ !؟ .. طب إييه بقى !!؟؟ =D
رابعاً .. إنعقاد المؤتمر الهام ده برئاسة مصر ، على إعتبار إن مصر هى البلد المضيف للمؤتمر ، وفى الظروف اللى بتمر بيها مصر والمنطقة والعالم كله ، هو رسالة فى منتهى القوة وتأكيد على ريادة مصر وتصدرها لمسرح الأحداث فى المنطقة وفى القارة السمراء .. وخصوصاً إن مصر فازت بعضوية مجلس السلم والأمن بالاتحاد الإفريقي لمدة 3 سنوات متتالية !!
خامساً .. اللى بتعمله مصر فيما يخص الأمن ومكافحة الإرهاب هو جزء من دورها الريادى الدولى وخصوصاً بعد فوزها برئاسة لجنة مكافحة الإرهاب فى مجلس الأمن لمدة سنتين .. يعنى مصر بتتحرك إقليميا ودوليا لمحاصرة الإرهاب وتأمين نفسها بإعتبارنا الدولة اللى بتقع على خط المواجهة الرئيسية مع الجماعات الإرهابية وكل من خلفهم من دول ومنظمات .. بدعم لا متناهى لرأس الأفعى واللى خرج من تحت عبائتها كل جماعات التكفير والإرهاب الدولى وهى جماعة الإخوان المجرمين !
سادساً .. كون إن مؤتمر وزراء دفاع ، يناقش قضايا عديدة على رأسها قضية الإرهاب ، فــ ده معناه إن الإرهاب الدولى توغل وتوحش واصبحت مواجهته تستلزم تظافر جهود دول بأكملها وكامل عتاد وتسليح جيوشها .. مش زى ما شوية المغيبين المهرتلين على روحهم وشمامين الكلة اللى بيهاجموا جيش مصر و بيقولوا إن مواجهة الإرهاب الدولى من إختصاص الشرطة !! .. طب بس ياحبيبى إتغطى ونام .. أدى دول أوروبا المطلة على المتوسط بتشارك فى المؤتمر الدولى .. وأدى كمان الجيش البلجيكى نزل الشارع علشان بس 3 افراد عملوا عملية إرهابية ، واربعة هربانين …. وإحنا الجيش بتاعنا بقاله 3 سنين بيلاعب منتخب الإرهاب العالمى !!
سابعاً .. المؤتمر ناقش التعاون العسكري بين الدول المشاركة، و تأمين الحدود وتعزيز قدرات الدول لفرض السيادة الكاملة لكل دولة على حدودها .. يعنى الموضوع مش سهل .. وكمان ناقشت الدول المشاركة رؤية مصر لإنشاء مركز لتجمع الساحل والصحراء لمكافحة الإرهاب، بما يساهم في تعزيز جهود وقدرات الدول الأعضاء لمكافحة الإرهاب والجريمة المنظمة العابرة للحدود (إييه رايكم فى العابرة للحدود دى !!) .. وطبعا تم ذكر داعش وبوكوا حرام بالإسم كمنظمات إرهابية تعمل على تكدير السلم الأفريقى .. وخصوصا إن “بوكوا حرام” بتشكل تهديد كبير للمصالح الفرنسية فى افريقيا 😉 .. ونحط تحت الموضوع ده مليون خط 🙂
ثامناً وهو الأهم … المسؤول العسكري للوفد السنغالي، أنطونيو ضيوف، قال إن الدول المشاركة في الملتقى تدرس إنشاء قوات خاصة في منطقة الساحل والصحراء يمكنها التدخل في حالة نشوب أزمات طارئة ..
وقال إبراهيم ثانى أفانى – الأمين العام لتجمع دول الساحل والصحراء ، إن الدول الأفريقية تواجه الجرائم العابرة للأوطان، وقوى الشر يمكنها أن تخترق حدودنا بشكل سهل (حد بس يفكرنى كلمة اهل الشر دى بتاعة مين !؟؟) =D =D =D …. ووجه التحية والشكر للرئيس عبد الفتاح السيسى لتوجهاته الجديدة فى الدبلوماسية المصرية .. وأوضح “أفانى” أن إفريقيا تقدر توجهات الرئيس السيسى، بعد أن عادت مصر لأفريقيا ، ونحن سعداء بهذه العودة المصرية، خاصة أن مصر هى قاطرة الحركة فى القارة … !!! … حد فهم حاجة 🙂 🙂 🙂
اصدقاؤنا ..
الدولة المصرية بتتبوأ موقعها الريادى من جديد .. وبتتحرك وبتحرك الموقف إقليميا ودوليا علشان تأمن الداخل المصرى المستهدف .. فياريت إحنا بقى كمان نقوم بدورنا لأنه مافيش دولة بتنهض ، إلا لو شعبها نفسه عند الإرادة للنهوض بيها ..
مصر تعود .. مصر تقود ..