04 Apr 2016
وثائق بنما .. وحديث الساعة … !!!
——————————-
بصراحة مش عارف أقول إييه !!؟؟ .. أو ابتدى إزاى !!؟؟ …
هو مافيش تجديد خالص !!؟؟
نفس النغمة ونفس الطريقة ونفس الأسلوب ، .. ومن ويكيليكس لبنما ، ياقلبى لا تحزن 😉 … لأن كل التسريبات دى تحمل التطشة الغربية على طريقة بــ خمسة شلن حقيقة و كام مليون كدب و تزييف .. و الوثائق وثائقنا و الدفاتر دفاترنا و الختم في الدرج حدانا 🙂 .. والمصدر دايما المجهول وماحدش يعرفه .. أو عارفينه بس مش عارفين نقبض عليه ياعينى … وطبيعى إننا كل شوية نبقى نسرّب حبة وثائق في توقيتات محددة ، إحنا اللي بنختارها ونحددها على حسب أجندتنا ، وحسب ما تقتضيه إليات إدارة الحرب المعنوية !!
طيب .. علشان بس اللى ما يعرفش ، … يفهم إحنا بنتكلم عن إييه … فــ النهاردة ماحدش له كلام غير عن تسريب وثائق بنما !! …
طب إييه هى وثائق بنما دى !!؟؟
الموضوع كله إنه تم تسريب 11 مليون وثيقة من شركة إسمها موساك فونسيكا للخدمات القانونية التي تتخذ من بنما مقراً لها .. وتُعتبر الشركة دى إحدى أكثر الشركات التي تحيط أعمالها بالسرية .. والوثائق المُسرّبة دى بتفهّم الناس إزاى بــ يستخدم الأغنياء وذوى النفوذ، ومن بينهم قادة دول، ملاذات ضريبية علشان يخبّوا ثرواتهم في خارج بلادهم …. وتُظهر هذه الوثائق صلات مع 72 شخصية من رؤساء الدول الحاليين والسابقين، بينهم حكام متهمون بنهب أموال بلادهم.
الجريدة اللى حصلت على السبق ده هى صحيفة “زود دويتشه تسايتونج” الألمانية .. وقامت “BBC” حسب ما تم نشره فى معظم وسائل الميديا العالمية ، ومعاها 107 مؤسسات إعلامية في 78 دولة بتحليل الوثائق دى قبل نشرها وطبعا شوف حكمة ربنا يامؤمن ، إن ماحدش فيهم قدر يعرف مين اللى سرب الوثائق دى ، ولا حتى صحيفة “زود دويتشه تسايتونج” الألمانية صاحبة السبق تعرف حاجة بعد ما قالت إن الوثائق جاتلها من مصدر مجهول !! 🙂
جيرارد رايلي، مدير الاتحاد الدولي للمحققين الصحفيين، قال إن الوثائق دى تغطي الأعمال اليومية في شركة “موساك فونسيكا” خلال الأربعين سنة الماضية ، وإن التسريبات دى تمثل أكبر لطمة يتلقاها عالم (الأنشطة) في الخارج بسبب حجم الوثائق !! ….. طب الوثائق دى بقى بتشمل إييه !!؟؟؟ … بــ تشمل بيانات شركات سرية في الخارج مرتبطة بعائلات ومقربين من الرئيس المصري الأسبق حسني مبارك، والزعيم الليبي الراحل معمر القذافي، والرئيس السوري بشار الأسد وعلاء مبارك و نواز شريف رئيس وزراء باكستان، و إياد علاوي رئيس وزراء العراق وبيترو بورشينكو رئيس أوكرانيا ورئيس وزراء أيسلندا … ألخ ألخ
ومش كدة وبس .. لكن كمان الوثائق بتتكلم عن قيام الرئيس الروسى بوتين بتهريب 2 مليار دولار خارج روسيا .. وإن فيه شبكة مشتبه بها لغسل الأموال بــ يشارك فيها عدد من المقربين للرئيس الروسي فلاديمير بوتين ، ويدير العملية بنك روسيا، اللى فُرضت عليه عقوبات أمريكية وأوروبية إثر ضم روسيا لشبه جزيرة القرم .. (يا محااااسن الصدف) =D =D
طبعا إحنا مش هــ ندخل فى تفاصيل الوثائق لأنها كتيرة أوى ، ومين سرق إييه ومين عنده كام شركة ، وحسابه فى البنك قد إييه ، ولا هــ ننزلق فى خط اللى هــ يطلع يقول “يعنى انت قصدك إن الناس دى كلها زى الفل !!؟ .. وإنه مافيش فساد !!؟؟ وكل الكلام ده اللى لا هــ يودى ولا يجيب … لكن اللى هــ نشير إليه والغريب فى الموضوع هو توقيت النشر … والمصدر المجهول … وإن دايما التسريبات مش بتتكلم غير عن دول وشخصيات بعينها ، ومعظمها هى دول الربيع العبرى ، وكأن الغرض هو محاولة إعادة الإحتقان للشارع فى ظل ظروف إقتصادية صعبة مش على دول المنطقة فقط ، ولكن على العالم كله ..
والأغرب بقى هو إن التسريبات دى مش بتتكلم غير عن خصوم الغرب فقط ، أو عن دول وشخصيات ماتفرقش حاجة فى معادلة حساب موازين القوى … لكن قطعاً دول الغرب فــ دى كلها دول …. “زى الفل” ….. “بلسان وصوت الفنان عادل إمام” … يعنى مثلا ماحدش إتكلم عن دونالد رامسفيلد الأميريكى وشركات السلاح والسمسرة بتاعته ، والملايين او المليارات اللى حققها هو وشكائه من سبوبة إحتلال العراق …… مثلا 🙂 🙂 … يعنى الوثائق كلها مافيهاش أميريكانى واحد ، بالرغم من إن افلامهم بتاعة هوليود بتاعتهم اللى بتتكلم عن تغوّل الفساد المالى والسلطوى فى بلادهم بتقول عكس كدة خالص !!! 🙂
بس مش هو ده المهم … لكن المهم إن اللى سرّب الوثائق أو نشرها أو … فبركها … عمل كدة وهو متأكد إن الموضوع ده هــ يلاقى صدى كبيييييير جداً فى مجتمعات بعينها … وإن الهرى ده كله هــ يلاقى كولجية تهيّص له .. وإعلام بامية يخدّم عليه .. ومتواطئين يبروزوه .. وجهات خارجية تتطبل له وتشاور عليه …. وبكدة نبدأ اللعبة من جديد …. و بالأسلوب الصهيوأميركى المعروف 🙂
و ده طبعا بيفكرنى بموضوع الــ 70 مليار دولار بتوع مبارك اللى إتكلمت عنهم صحيفة الجارديان صاحبة التمويل القطرى ، وعملت الجزيرة القطرية عليهم فرح .. بالإضافة للحديث عن إجراءات إستعادتهم فى عز ما كانت مصر منهارة فى سنة 2011 ، لدرجة إن الناس والشباب فى ميدان التحرير وفى شوارع مصر ، كانو بيحسبوا نصيب كل واحد فيهم كام من الــ 70 مليار لما يرجعوا … وإن الحكومة هــ تخبّط على بيت كل اسرة وتديهم نصيبهم من الفلوس .. والمشكلة إن الكاتب الراحل “محمد حسنين هيكل” إتكلم عن نفس الموضوع وأكد الخبر .. ولما النيابة إستدعته علشان تحصل منه على معلوماته من مصادرها ، قال إنه اخذ المعلومة من صحيفة “الجارديانز” !!! … يعنى كله كلام فى الهواء .. والهدف هو الوعى الجمعى للشعوب
يااااااااااه يا عبد الصمد ….
ده الأيام مافيش اقرب منها .. واللى يعيش ياما يشوف و ….. ويسمع 😉 🙂 … ولو حبينا نشغل دماغنا ونفكر شوية بناء على ما هو متاح من معلومات وبناء على الصورة الواضحة للوضع على الارض .. هانلاقى ان التسريبات دى هى مجرد رسالة واضحة وصريحة لأطراف معينة بفشل مؤامرة الربيع العبرى ….. والبقية تأتى