27 Apr 2016
أبريل الابيض .. العجيب .. !!
————————–
عنوان المقال “أبريل الابيض” على طريقة اسم فيلم “فبراير الاسود” … الفيلم الحقير اللى مش لاقى له معنى غير تشويه لمصر وللمصرين .. وخصوصاً ان السيناريو اختار الاسرة اللى عايزة تثور على المجتمع بكل سلبياته من وجهة نظرهم هى نموذج للإنتهازية والميكيافيلية السوداء الحقيرة .. يعنى حتى اللى بيثور على الاوضاع هم مجموعة من الحثالة البشرية … يعنى من الاخر مجتمع كله بايظ … والغريب انك تلاقى فيه ناس بتستشهد ببعض لقطات الفيلم ده !!!!
المهم ما علينا …
احنا بقى النهاردة هانتكلم على أبريل الابيض او أبريل العجيب … بس لازم الاول نتفق على حاجة مهمة جداً .. اتكلمنا عليها قبل كدة كتير فى أكثر من مقال وفى أكثر من مناسبة .. وهو ان السياسة الدولية وخصوصاً فيما يخص مصائر الشعوب والأمم وفيما يخص آليات العلاقات الدولية وتشكيل التحالفات الإستراتيجية ، عمرها مابيكون فيها صدف … خاااااالص … لكن بتكون بترتيب و تبادل ادوار وتنسيق فى توقيتات لها معنى لأنها بتكون مبنية على تقارير أمنية وحسابات استراتيجية على اعلى مستوى !!
ولأن الصورة اوضح من اللازم .. تعالوا بقى نستعرض كدة لقطات فيلم “أبريل الأبيض” اللى تداعيات أحداثه بتقول بدون أدنى شك ، اما ان كل اللى بيحصل ده كان لازم يحصل لمنع كارثة كانت هــ تعصف بمصر وبالمنطقة كلها …. أو … ان مصر هى محور احداث قادمة على طريق تشكيل النظام العالمى الجديد اللى مصر فى القلب منه وبيتم تجهيزها علشان تكون فى موقع الصدارة فى خلال السنوات القليلة القادمة … وهى دى الفرضية الأرجح .. وافتكروا مقالات صفحتنا اللى نشرناها من فترة بعنوان “مصر تتمدد داخليا وإقليمياً ودوليا” 🙂 😉
الملك سلمان اللى هو ملك السعودية ، واللى طول عمر المنصب ده بكل تاريخ رجالاته ،.. بتكون حركته قليلة ، وزياراته بتكون بحساب … يقوم الملك ييجى مصر فى زيارة لمدة خمسة ايام بحالها .. ومش لواحده .. لكن معاه ولى ولى العهد والحكومة و 120 رجل أعمال ومستثمر … يعنى السعودية كلها كانت فى مصر .. ويعمل مباحثات على المستوى الرئاسى الملكى والحكومى وعلى مستوى المستثمرين ويتم الإتفاق على مشروعات واستثمارات بحجم 60 مليار دولار … يا نهار إسكوت =D =D … لأ وكمان يقوم الملك سلمان بزيارة الازهر ، و يدعمه دعم مالي و سياسي و لما يرجع السعودية ، فــ يقوم بتحييد هيئة الامر بالمعروف و النهي عن المنكر !! .. هو فيه إييه !!؟؟ 🙂
و الكلام ده ياخدنا لاعلان السعوديه عن البدء في تنفيذ الرؤية المستقبلية للمملكة السعودية 2030 …. لأ .. و شوف الصدف لما يطلع ولى ولي العهد السعودى بتصريح ان السعودية تسعى للتخلص من اعتماد المملكة علي البترول نهائيا و انها ستحول اقتصادها الى اقتصاد استثمارى صناعي و انه بالفعل بدأت الخطوات التنفيذيه ليتم خفض نسبة مساهمة تصدير النفط في الناتج القومي الى 50% فقط بحلول 2020 ..
و ده يفهمنا لييه حجم الإستثمارات دى فى مصر واللى أصبح من الواضح إن المملكة بتسعى للتخلص من نظام الإقتصاد الريعى ، لإقتصاد قائم على عوائد الإستثمار … وهو ده سبب إعلان ولى ولى العهد إن المملكة تعتمد في تنفيذ خطتها علي التوأمة الاقتصادية مع مصر …. و ان نهضة مصر الاقتصادية هو خيار استراتيجي و أمن قومي للمملكة لضمان استقرارها السياسي و الاقتصادي. 😉 … و ده طبعا غير ان المملكة بتسعي أن يكون الجسر الجديد هو أهم محور تجارى عالمي بالتاريخ .. Money talks يعنى =D =D
ومش كدة وبس .. لكن وصل الامر انه في اجتماع مجتمعي موسع فى السعودية لشرح مشروع المملكة …. يقوم أحد الحضور من السعوديين و يسأل ولي ولي العهد على التكلفة التي تتحملها المملكة في دعم الاقتصاد المصرى …. ليقاطعه و يثور عليه ولي ولي العهد و يقول له انه لا يعلم قيمه مصر لأمنه و أمن عيلته و انه لو وصلت انه سيقتسم العيش الحاف مع مصر … فلن يتردد …. فمصر قوية مستقرة تعني سعودية قوية مستقرة … و يقوم بطرده من الاجتماع !!!!
الرئيس الفرنسى ييجى مصر ومعاه رجال الحكومة الفرنسية ومعاهم 62 مستثمر بمشروعات اقتصادية بحوالى 30 مليار دولار … ويتم رفع مستوى الشراكة العسكرية والاتفاق على صفقة طائرات رافال جديدة وكمان رفع عدد حاملات الطائرات ميسترال من حاملتين ﻷربعة حاملات … و اعلان الرئيس الفرنسي ان دعم مصر و التأكيد علي استقرارها هو خيار استراتيجي لفرنسا …. و ضغطه على رجال الاعمال الفرنسيين بالموافقه على شروط الجانب المصرى المالية و شروط السداد طويلة الاجل … وكأن المطلوب هو دعم مصر بأى شكل لهدف ما !!
نائب المستشارة الالمانية ميركل ييجى مصر ومعاه وزراء و ممثلين للحكومة ورئيس حزب الاغلبية فى البرلمان بالاضافة لمجموعة من رجال الاعمال للتوقيع على اتفاقيات اقتصادية وبروتوكولات تعاون اقتصادى بين البلدين .. طب هى الحداية بترمى كتاكيت والا اييه !!؟ 🙂
الشيخ (محمد بن زايد آل نهيان) و لى عهد أبوظبي يزور مصر مع وفد حكومى وإقتصادى لتوقيع 60 إتفاقية تجارية بين البلدين ، ويعلن عن دعم مصر بكل السبل ويضخ 4 مليار دولار فى الاقتصاد المصرى ، منهم اتنين فى صورة وديعة بنكية واثنين فى شكل استثمارات . . طب لييه فجأة كدة !!؟
الملك حمد بن عيسى آل خليفة ملك البحرين يوصل مصر فى زيارة مع وفد حكومى رفيع المستوى ، ويعلن من هنا انه هــ يدعم مصر اقتصادياً بكل السبل .. وكمان هــ يساند الموقف المصرى فى تشكيل القوة العربية المشتركة !!!
ولسة كمان الملك محمد ملك المغرب هــ يزور مصر فى زيارة غريبة .. وكأن مصر هى رأس العقاب اللى بيفرد أجنحته على الشرق والغرب 🙂
جون كيرى وزير الخارجية الاميريكى يزور مصر زيارة سريعة ويتعمل معاه أحلى واجب ، قبل ما يسافر علشان يحصّل رئيسه أوباما اللى اتعمل معاه نفس الواجب فى السعودية .. ومش كدة وبس لكن تم رفض الطلبات الأميريكية اللى تم طرحها فى اجتماع اوباما مع مجلس التعاون الخليجى .. وتم اخراس قطر تماما … ويطلع بعدها أوباما على فرنسا … وخلوا بالكوا من الربط بين زيارات اوباما للسعودية وفرنسا وبين الدول دى وزياراتهم لمصر …. وبعدين يطلع بعدها على إنجلترا علشان يدى التمام ويقول انه فشل ويطلب من ال Boss الكبير انه يتدخل !!! =D
وبالرغم من ده ، إلا إن إنجلترا كمان دخلت على الطريق .. وقال مبعوث رئيس الوزراء البريطانى لتعزيز العلاقات التجارية مع مصر، جيفرى دونالدسون، إن مصر يمكن أن تصبح القوة الدافعة الحقيقية لمنطقة الشرق الأوسط بأكملها فيما يتعلق بتحقيق الازدهار الاقتصادى، مؤكدا أن مصر تمتلك قدرات استثمارية كبيرة .. وقال كمان إنه بالرغم من التطورات التى تحدث فى منطقة الشرق الأوسط، إلا أن مصر دولة آمنة ومستقرة، وأعتقد أن هذا أمر مهم جدًا !!! … ماعرفتكش أنا كدة !! =D =D
وفى وسط الهالومّة دى كلها .. نلاقى شوية زيارات كدة على ما قسم من مبعوث الخارجية الروسى … لرئيس شركة إينى الايطالية اللى جاى يؤكد على تعاقداته مع مصر .. لوفد من توجو برئاسة الرئيس التوجولى “فاوري نياسينبا” فى زيارة لمدة 3 أيام .. لزيارة الرئيس الموريتاني محمد ولد عبدالعزيز، الذي قام بزيارة رسمية إلى مصر لمدة 3 أيام .. لزيارة من وزير الداخلية الجزائري السيد/ نور الدين بدوي بحضور السيد/ مجدي عبد الغفار وزير الداخلية المصرى، للتباحث فى عدد من القضايا تضمنت أبرز التطورات الأمنية على الصعيدين الإقليمي والدولي، مع التأكيد على أهمية مواصلة التنسيق والتشاور بين الأجهزة الأمنية بالدولتين !!!
لأ وكمان مصر بــ تفعّل دورها كعضو فى مجلس الأمن اللى عقد جلسة بناء على طلب مصري بصفتها ممثلة عن المجموعة العربية .. على خلفية التصريحات الإسرائيلية على لسان نتنياهو بخصوص الجولان علشان يؤكد مجلس الأمن الدولي عدم اعترافه بضم إسرائيل لهضبة الجولان السورية المحتلة رغما عن انف امريكا اللى لاول مره لا تستخدم الفيتو ضد قرار ضد اسرائيل، فيما عبّرت الأمم المتحدة عن قلقها بشأن التصريحات الإسرائيلية عن الجولان قائلة إن وضعها لم يتغير… يعنى رغم الصعوبات ، مصر بتتحرك فى كل الإتجاهات وبترسم دورها بمنتهى القوة والإحترافية
الموضوع مش مجرد زيارات تبادلية ، وإتفاقيات إقتصادية وبس .. لأ .. ده جزء من تخطيط على المستوى الإقليمى والدولى ، تقوده مصر بمنتهى الإقتدار ، واللى هــ نشوف نتائجه فى خلال السنوات القليلة القادمة والصورة هــ تبتدى تظهر وتبان مع نهاية عام 2016 اللى إحنا مازلنا مصرّين ونؤكد على إنه عام الحسم !!
مصر الجديدة قادمة بإذن الله رغم أنف كل الحاقدين والمغرضين