4 Sep 2016
مصر على الطريق فى قمة العشرين .. !!
————————————-
مصر لأول مرة فى قمة العشرين .. و ده شئ مفرح جداً .. وإيجابى جداً .. ومؤثر على مستقبل الدولة الإقتصادى جداً جداً .. وخصوصاً لما تكون الدولة صاحبة الدعوة لمصر هى الدولة المنظمة للحدث .. وكمان هى تانى أكبر ناتج محلى على مستوى العالم .. بالإضافة للدول الأخرى الداعمة لمصر زى فرنسا (6) .. و الهند (7) .. وإيطاليا (8) .. وروسيا (14) .. والسعودية (20) .. لكن قبل ما نتكلم عن الحدث لازم نعرف إييه هى مجموعة العشرين (G-20) !!؟؟
مجموعة العشرين هو منتدى تأسس فى ديسمبر سنة 1999 فى مدينة برلين بسبب الأزمات المالية في التسعينات لما نبهّت الأزمة المالية الآسيوية القوى الاقتصادية العالمية إلى الحاجة إلى دمج الدول الصناعية والاقتصادية الصاعدة فى صنع القرار الاقتصادى والمالى العالمى .. ويمثل هذا المنتدى أكثر من 90% من الناتج العالمي الخام (وهو مجموع الناتج المحلي الخام لجميع بلدان العالم) .. و80% من نسبة التجارة العالمية (بما فى ذلك التجارة الداخلية للاتحاد الأوروبي)، وأيضا تمثل الدول الأعضاء ثلثى سكان العالم .. والغرض من القمة هو تعزيز الاستقرار المالي الدولي و ايجاد فرص للحوار ما بين البلدان الصناعية والبلدان الناشئة ..
وكانت القمة فى البداية بتجتمع على مستوى وزراء المالية ومحافظى البنوك المركزية وقطاع الأعمال فى الدول الأعضاء .. لكن بداية من يوم 15 نوفمبر 2008 ، ولأول مرة في تاريخها، اجتمع رؤساء الدول والحكومات وليس فقط وزراء المالية .. ومن وقتها إكتسبت قمة العشرين شهرتها ومكانتها على مستوى العالم … وتضم المجموعة أعضاء يمثلون 19 دولة وتكتل اقليمى واحد .. وهم الولايات المتحدة، واليابان، والمانيا، وفرنسا، وبريطانيا، وايطاليا، وكندا، وروسيا، والصين، والارجنتين، واستراليا، والبرازيل، والهند، واندونيسيا، والمكسيك، والسعودية، وجنوب افريقيا، وكوريا الجنوبية ، وتركيا … وإعتبرو إن رقم 20 هو التكتل الإقتصادى للإتحاد الأوروبى.
ورغم أنه فى المعتاد بتقوم الدول المستضيفة للقمة بإختيار مدن كبرى علشان تنعقد القمة فيها زى العاصمة مثلا .. الا أن الصين خالفت كل التوقعات والأعراف، وقررت عقدها فى مدينة هانجتشو اللى بتعتبر مدينة قديمة بــ تتميز بمعالمها التاريخية وتنوعها البيئى من جبال خضرة ومياه .. لكن الأهم هو إن مدينة هانجتشو بتتصدر مؤشر مالية الإنترنت فى الصين، وكمان بــ تتصدر مدن العالم فى الدفع للخدمات عبر الأجهزة المحمولة .. زى سيارات الأجرة والمطاعم و حتى بعض أسواق الخضار والبائعين … يعنى من الأخر كدة .. مدينة ًهانجتشو هى عاصمة التجارة الإلكترونية فى الصين وعلى مستوى العالم … يعنى الصين بتعمل قمة العشرين هناك علشان تتفشخر على العالم وتقدم نموذج للدول الكبرى ..
اللى يهمنا فى الموضوع ده .. إن مصر بــ تشارك في القمة لأول مرة وبناء على دعوة تم توجيهها من رئيس المجموعة للعام الحالى الرئيس الصينى “شى جين بينغ” إلى الرئيس “عبد الفتاح السيسي” علشان يكون (((ضيف شرف))) القمة الدولية دى .. وطبعاً الدعوة دى ما كانتش إعتباطاً كدة .. لكنها فيها رسالتين .. ورسالتين فى غاية الأهمية..
الرسالة الأولى .. هى رسالة مشتركة من مصر والصين مع بعض .. وهى إن العلاقات المصرية الصينية هــ تكون علاقات خاصة فى الفترة القادمة .. وممكن توصل لمستوى العلاقات الإستراتيجية وخصوصاً بعد الزيارات المتبادلة بين الرؤساء .. وتوقيع العديد من البروتوكلات الإقتصادية .. وكمان دخول محور التنمية فى نطاق خط الحرير الصينى ، بالإضافة للمنطقة الصناعية الصينية اللى فيه كلام عن إنشائها على غرار المنطقة الصناعية الروسية .. والكلام ده كله رسالة مهمة للغرب إن مصر هــ تكون شريك اساسى للعملاق الصينى .. و دى حاجة مش هينة .. 🙂 .. وخاصةً إن فيه تصريح كدة للرئيس السيسى فى حديث لوكالة الأنباء الصينية ” شينخوا ” قال فيه “أؤكد أن مصر تحرص من خلال مشاركتها على دعم أولويات الرئاسة الصينية، وتتعاون بشكل وثيق معها لتحقيق تلك الأولويات” … طب إييه هى الأولويات دى يا ريس .. طب مش هــ تقول لنا وإلا إييه 😉 🙂
وعلى فكرة .. ده ظهر فى الترحيب الكبير والحفاوة البالغة اللى قابل بيها الرئيس الصينى الرئيس، الروسى بوتين والرئيس السيسى والرئيسي الفرنسى مقارنة بالتحية الباردة والتجاهل اللى قوبل بيهم الرئيس الأميريكى خصوصا داخل القاعة !
الرسالة الثانية .. إننا إذا كنا بنتكلم عن قمة أقوى 20 إقتصاد على مستوى العالم .. فلازم نقول ونوضح إن مصر ترتيبها الــ 32 على العالم .. يعنى بيننا وبين مجموعة العشرين 12 مركز فقط .. وتجاوزنا لأول مرة إقتصاد دولة جنوب أفريقيا.. وبالتالى فــ دعوة مصر للقمة مش نوع من الرفاهية أو المجاملة لكنها نظرة للأمام لأن النظرة المستقبلية للمؤسسات الإقتصادية العالمية ومنها موديز وستاندرد أند بورز بتقول إن معدل النمو الإقتصادى المتوقع لمصر هــ يكون فى متوسط 5% فى خلال الــ 10 سنوات القادمين .. و ده من غير حسابات إكتشافات الغاز والبترول القادمة بإذن الله .. و ده معناه إنه مقارنة بمعلات النمو الإقتصادى لدول العشرين اللى بتتراوح من 0.5% إلى 1% بإستثناء الصين .. فمصر هــ تكون من ضمن دول العشرين فى خلال و بحد أقصى 10 سنوات أو على الأقل هــ تبقى فى المركز الــ 23 على أسوأ تقدير إذا حصل حاجة تعطل النمو ده .. وخصوصاً إن التدفقات الإستثمارية لمصر تتجاوز لأول مرة جنوب افريقيا ونيجيريا مجتمعتين … وبالتالي مصر اصبحت قطب قاري مش بس اقليمي وعربي مع الوضع فى الإعتبار تنامى القوة العسكرية المصرية اللى بتحمى الإقتصاد ده .. و ده معمول حسابه فى نظرة العالم ليك مستقبلا !
الأهم من كدة إنه هــ تقام على هامش القمة لقاءات ثنائية بين الزعماء المشاركين فى القمة واللى بيتضمنوا بجانب الرئيسين الصينى والمصرى .. الرئيس الأمريكى باراك أوباما والروسى فلاديمير بوتين ورؤساء الأرجنتين والبرازيل وفرنسا وأندونيسيا وكوريا الجنوبية والمكسيك وجنوب أفريقيا وتركيا، علاوة على رؤساء وزراء استراليا وكندا والهند وإيطاليا واليابان والمملكة المتحدة والمستشارة الألمانية، ورؤساء المجلس الأوروبى والمفوضية الأوروبية وولى ولى العهد ووزير الدفاع السعودى … و ده غير الأمين العام للأمم المتحدة ورئيس البنك الدولى ومديرى صندوق النقد الدولى ومنظمة التجارة العالمية ومنظمة العمل الدولية ورئيس مجلس الاستقرار المالى والأمين العام لمنظمة التعاون الاقتصادى والتنمية … يعنى تجمع أممى عالمى بجد
طب مين بقى اللى الرئيس السيسى إلتقى بيهم لحد دلوقتى !!؟؟ .. خد عندك يا … سيسى .. 🙂
* لقاء مع رئيس وزراء اليابان … طب مش هو الرئيس السيسى لسة كان عندهم هناك !؟ .. هى سيرة بقى =D .. المهم إنهم إتكلموا فى قضايا كتيرة ودعم لمصر .. وبالذات فى التعليم .. واخدلى بالك إنت من التعليم دى !؟
* لقاء رئيس الأرجنتين فى مقر إقامة الرئيس السيسى .. وإتكلموا عن ملفات كتيرة أهمها قرب الإنتهاء من اتفاقية التجارة الحرة بين مصر والأرجنتين .. وعلى فكرة .. الأرجنتين هى اللى هــ تنظم قمة مجموعة العشرين سنة 2018 🙂
* لقاء الرئيس الصينى .. اللى إستقبل الرئيس السيسى فى مقر إقامته هو والوفد المرافق وعمل إفطار جماعى على شرف الرئيس المصرى 😉
* وطبعا اللقاء المرتقب لسة بين الرئيس السيسى والرئيس بوتين والرئيس الفرنسى فرنسوا اولاند كلٌ على حدة .. و ده بالإضافة إلى لقاءات أخرى مع العديد من المسئولين الدوليين
* وبالنسبة للهند .. فالرئيس السيسى لسة جاى من عندهم إمبارح .. يعنى كله تمام .. واهم نتائج زيارة الهند هى المدينة الطبية المتكاملة فى العاصمة الإدارية الجديدة بتكلفة 1.6 مليار دولار 🙂
* والكوميديا المبكية تواجد الرئيس السيسى فى نفس المحفل الأممى مع بهلول إسطنبول واللى سبقتها تصريحات من وزير الخارجية التركى عن إعادة العلاقات والتطبيع مع مصر ..
(يا دكتوووورررر أنا مش أنا) =D =D
ومشاركة الرئيس السيسى فى القمة هــ تركز على الموضوعات التى تهم الدول النامية بوجه عام، زى تعزيز الجهود الدولية لتيسير اندماج الدول النامية فى الاقتصاد العالمى، وإتاحة المجال لاستفادتها مما يوفره من فرص ومزايا بما يساهم فى تحقيق نمو اقتصادى دولى مستدام، بالإضافة إلى التأكيد على ضرورة تقديم المساندة الفعّالة لهذه الدول فى سعيها لتحقيق أهداف التنمية المستدامة 2030، بما فى ذلك تيسير نقل التكنولوجيا للدول النامية، ودفع حركة الاستثمار الأجنبى إليها، وضرورة التزام الدول المتقدمة بتعهداتها فى إطار اتفاقية باريس لتغير المناخ، وتمكين الدول النامية من زيادة الاعتماد على مصادر الطاقة المتجددة .. مع الأخذ فى الاعتبار أن مصر تتولى رئاسة المجموعة الأفريقية المعنية بقضايا تغير المناخ .. يعنى مصر برضوا بتحضر القمة بشكل ممثل قارى أممى .. مش مجرد دولة جايبينها من على القهوة !!
مصر بخير يا جماعة .. ومصر على الطريق الصحيح .. وإوعى حد يضحك عليك أو يقنعك إن مصر بتنهار ومصر هــ تفلس ومصر إقتصادها خربان وكل الكلام الخايب ده .. واللى هم يتمنوا إنه يبقى حقيقى فعلا … مصر لو كدة فعلا وإقتصادها مش واعد ومش بيتحسن ، ماكانش تم دعوتها لحضور مؤتمر كبير زى ده يضم اكبر إقتصاديات العالم .. وعلى فكرة .. مصر محطوطة من ضمن أهم 10 دول بتعمل إصلاحات إقتصادية على مستوى العالم بسبب الإجراءات والقرارات الجريئة اللى بتاخدها الإدارة المصرية بقالها سنتين واللى هــ نشوف نتائجها قريب بإذن الله وعلى المدى الطويل .. 🙂 🙂