11 Feb 2015
النظام العالمى .. كرسى فى الكلوب .. !!!
————————————–
الروس على الحدود .. هو ده ملخص الى قالته صحيفة معاريف الإسرائيلية واللى تعتبر واحدة من أكثر الصحف الأسرائيلية اليمينية المتطرفة عن زيارة القيصر الروسى لمصر .. ناهينا طبعاً عن اللى قالته الجريدة الشهيرة يدوعوت أحرنوت عن تفاصيل اللقاء الروسى المصرى وبالذات موضوع الإتفاق على بناء المفاعل النووى 🙂
ومش الصحف الإسرائيلية وبس .. لكن وسائل الإعلام الألمانية والبريطانية والأميريكية كمان زى الدوتش فيلا ، زود دوتش ، هاندلزبلات ، بى بى سى ، الجارديان ، نيويورك بوست …. الخ كلهم إتكلموا بمنتهى الإهتمام على زيارة القيصر الروسى لمصر ومباحثاته مع الرئيس المصرى .. وكان تركيزهم الشديد على حاجتين مهمين جدا ، .. الأولى هو الرسالة الواضحة اللى بــ تبعتها مصر لأميريكا بإن العلاقات المصرية الدولية مش خاضعة لأى حد وخصوصاً أميريكا ، و ده معناه تقلص النفوذ الأميريكى فى مصر ، .. والثانية هو الإتفاق على بناء المفاعل النووى المصرى بتكنولوجية روسية ..
إحنا ما قولناش حاجة من عندنا .. ده العالم كله هو اللى بيقول أهو 🙂
أنا بس حبيت أجيب الضجة العالمية لزيارة القيصر بوتين لمصر علشان بس نرد بشكل عملى على مجموعة الفشلة التافهين اللى غلط نوصفهم من الأساس بإنهم مصريين ، واللى بيتفّهوا ويقللوا من حجم الزيارة التاريخية .. أو بيقللوا فى كل مناسبة من حجم مصر وأهميتها بالنسبة للشرق الأوسط وللعالم كله ، وكمان يتّريقوا على نظرية المؤامرة زى ما بــ يسمّوها وإن مش معقولة كل ده علشان مصر ، لكن اللى مش عايز يقتنع أو يعترف بكدة هو حر ، .. لأن مصر هى دولة محورية حتى لو كانت فى أضعف حالاتها .. وهــ تفضل دولة كبيرة ولها ثقلها العسكرى والسياسى بإذن الله ، شاء ذلك من شاء ، و أبى من أبى ..
لما نيجى نتكلم عن زيارة القيصر الروسى لمصر ، فــ لازم نفهم إن الزيارة بــ ترسخ لفكرة النظام العالمى الجديد اللى بــ يتشكل وبدأت ملامحه تظهر بوضوح فى كل اللى بيحصل فى المنطقة .. وإفتكروا مقالات صفحة كلام فى الصميم عن “العدوان الثلاثى والحرب العالمية الثالثة” ، و “ضربة كانت من معلم” ، و “مصر تتمدد داخلياً وخارجياً” ، و “عملية تأديب فرنسا ” شارل إيبدو” ، و مقالات باب المندب ، و مقالات أسعار البترول وحقول الطاقة … لأنها كلها بتأكد الصورة الحالية واللى بتقول إن كرة الثلج بدأت تتسارع و هــ تاخد فى وشها كل اللى هــ يحاول يقف قصادها 🙂
ولازم ناخد بالنا من الرسائل ذات الدلائل الواضحة ، اللى تم توجيهها من خلال الزيارة دى ، واللى الصحف العالمية أخدت بالها منها وركزت عليها ، زى العشاء الرئاسى اللى إتعمل فى أعلى برج القاهرة ، والبرج ده له مدلول خاص جدا فى تاريخ العلاقات المصرية الأميريكية ، بالإضافة للهدية اللى قدمها الرئيس بوتين للرئيس السيسى واللى كانت عبارة عن بندقية كلاشينكوف قديمة الطراز كتذكار ، فى إشارة واضحة وصريحة للتعاون العسكرى المقبل بين روسيا و مصر !!
روسيا اللى فى وضعية مواجهة مباشرة مع أميريكا ، بتتقارب بشكل مباشر مع مصر واللى كانت فى السابق هى الحليف الإستراتيجى لأميريكا فى المنطقة (ده وصف الخارجية الأميريكية) ، وكمان روسيا اللى هــ تبنى لمصر مفاعل نووى مش أميريكا … وكمان إعلان شراكة مصرية روسية فى الحرب على الإرهاب مش مع أميريكا بتاعة موضوع الطيارات الأباتشى .. وكمان إحتمالية تفعيل التبادل التجارى مع روسيا بالعملات المحلية واللى هو قيد الدراسة عن طريق البنك المركزى فى الدولتين !!
كل ده غير المواجهة اللى دايرة دلوقتى فى حرب الطاقة (غاز وبترول) بين دول الخليج ومصر وروسيا هى وحلافائها من جهه ، وبين أميريكا وحلفائها من جهة ثانية فى عملية فرض الإرادة على المنطقة وإرهاب ومحاولة تكسير كل الدول الموجودة فى محيط الأطماع الغربية وداخل نطاق خريطة إسرائيل الكبرى !! 🙂
التحالف الغربى إبتدى يتفكك واحدة واحدة ، .. إبتدى بفرنسا اللى بتتحرك بشكل منفرد دلوقتى ، وكمان بتبرم صفقات سلاح وطيران مع مصر ، و ده هــ يكون له مقال مخصوص بإذن الله .. و ألمانيا إبتدت تتراجع على إستحياء ، وميركل بــ تبدى عدم إتفاقها مع السياسة الأميريكية ضد روسيا .. وقبرص واليونان كلنا عارفين موقفهم إييه ، .. وإيطاليا بتقول يالا نفسى لإنها بتعانى إقتصاديا وأمنياً نتيجة الوضع المتردى فى ليبيا .. أما تركيا فبرغم شراسة السياسة الأردوغانية الإخوانية مع مصر حاليا ، إلا إن روسيا قامت بتحييدها على الأقل فى الملف السورى بعد ما مضت إتفاقية الغاز مع تركيا .. ولسة التقيل جاى لأن السياسة مالهاش ثوابت ، ولغة المصالح دايما هى اللى بتتكلم .. 🙂
مش كدة وبس .. الرئيس القبرصي نيكوس أناستاسياديس أعلن إن قبرص ستعرض على روسيا إستضافة قاعدة عسكرية روسية على الأراضي القبرصية وهــ يتم توقيع إتفاقية الدفاع العسكرى و التعاون المشترك دى خلال زيارته لــ موسكو في 25 فبراير اللى جاى .. لأ والمضحك إن التقديرات المبدئية لموقع القاعدة العسكرية المجهزة بالطائرات الروسية إنها هــ تكون على مسافة 40 كم عن القاعدة الجوية البريطانية … شوفوا إزاااااى =D =D =D .. بجد اللى بيحصل ده جنان 🙂
ده معناه إن روسيا بترسخ تواجدها فى البحر المتوسط اللى كان بيعتبر فى السابق بحيرة أميريكية .. و بتربط مابين مصر وقبرص وسوريا ، بسيطرة جوية وبحرية على شرق المتوسط ، واللى فيه حقول غاز المتوسط أكبر إحتياطى غاز فى العالم 🙂 🙂
وفى وسط الهم ده كله ، نسمع عن المناورات البحرية المشتركة “مرجان-14” بين القوات القوات البحرية المصرية والسعودية ، فى رد واضح و إستعراض قوى ضد أى حد يفكر يهدد أمن الدولتين وخصوصاً فى باب المندب !!
و مايمنعش إنه يطلع خبر صغير كدة بالمرة عن إحتمالية زيارة الرئيس الصينى لمصر فى أقرب وقت ممكن للتأكيد على إتفاقية الشراكة التجارية الموقعة مع مصر واللى هــ يتم تفعيلها فى المؤتمر الإقتصادى العالمى فى مارس القادم بإذن الله 🙂 .. وده معناه إن الدعم الروسي بترشيح مصر علشان تبقى عضو مراقب لإتفاقية البريكس كبداية ، إبتدى يتم تفعيله ..
لو ربطنا كل ده بالتصريحات الخايبة لوزارة الخارجية الأميريكية على لسان “جين ساكى” المتحدثة باسم الخارجية الأمريكية إن واشنطن لا تعارض التعاون المصرى الروسى ، نفهم إن أميريكا بتحاول توصل للعالم عدم إنزعاجها من التقارب ده ، .. لأ ومش كدة وبس ، دى بتحاول توصل رسالة للعالم كله بإنها هى اللى موافقة على كدة ، بإعتبار إنها لسة المعلم الكبير الحاكم بأمره فى العالم .. لكنها إتفضحت لما تجاهلت التعليق على موضوع إتفاقية التبادل التجارى بالعملة المحلية وقالت إنها لا تعتقد إن ده هــ يحصل 🙂
النظام العالمى الجديد إبتدى يتشكل ، ومصر بإذن الله هــ تبقى عضو مهم فيه ، وما ننساش إن كل التحركات الخارجية دى ، هدفها أولاً وأخيراً إستقرار مصر داخلياً سواء على المستوى الأمنى أو على المستوى الإقتصادى ، وحماية الأمن القومى المصرى من أى تهديدات ، بتحسين وضعية مصر إستراتيجيا و سياسياً على المستوى العالمى ..
مصر أم الدنيا ، وهــ تبقى قد الدنيا مهما كانت العقبات ومهما كانت التحديات .. أما بخصوص وضعية أميريكا ، فــ دى هــيبقى لينا معاها كلام تانى فى مقال منفصل بإذن الله