31 Jan 2017
النظام العالمى الجديد وألام المخاض !!
————————————
فى مقال نشرناه يوم 31 ديسمبرالماضى بعنوان ((المخاض)) .. إتكلمنا فيه عن بعض ما يحدث على الساحة العالمية .. وقولنا إن دى كلها هو بعض العلامات لمخاض ميلاد النظام العالمى الجديد .. وطلبنا منكم إنكم تحضّروا الفشار لأن الفرجة هــ تحلوّ جدا فى 2017 .. وأهى بدأت …
دونالد ترامب بدأ ينفذ سياسته اللى هو مؤمن بيها .. واللى هى مش مفاجاة بالمناسبة .. ، لأنه بالفعل أعلن عنها صراحة فى حملته الإنتخابية .. لكن .. لأنه بيتعامل بوجه مكشوف ، وبياخد القرارات بدون اى موائمات ، فالشكل العام للقرارات دى بــ يوحى إنها تتسم بالعنف .. يمكن علشان العالم مش متعودين على كدة .. أو إن الناس اخدت على أسلوب الأفاعى اللى كانت بتتعامل به إدارة أوباما وهيلارى ….
ولأن ترامب بدا من أول يوم ، فكان لازم يتم إختباره ، ورفع كروت الإنذار فى وجهه مش من الدولة العميقة الأميريكية فقط .. ولكن من العالم كله .. أو إن شئنا الدقة ، من النظام العالمى القديم !
ترامب اصدر قرار بحظر دخول مواطنى 7 دول لأميريكا وهم (العراق وإيران وليبيا والصومال والسودان وسوريا واليمن)، على أن يستثنى من بين هؤلاء حملة التأشيرات الدبلوماسية والرسمية الذين يعملون لدى مؤسسات دولية … طب ترامب اخد القرار ده من نفسه .. لأ .. لكن ده قائم تفعيل لقرار تم إتخاذه فى عهد إدارة أوباما بإن الدول دى ضمن الدول الراعية للإرهاب ، و بموافقة الكونجرس نفسه .. لكن لم يقوموا بتفعيل أى إجراء .. يعنى اللى عمله ترامب مبنى على أساس .. وخصوصاً إنه بيتفق مع توجهاته السياسية .. قووووم إيييه … فجأ الدنيا ولعت .. وبدات الإعلام يشعل الحرائق .. وبدات المظاهرات تشتعل على نفس نظام الربيع العبرى .. وطبعاً المنفذين والمتخصصين فى الموضوع ده موجودين عندهم بعد ما أصبحت اميريكا ملجأ لشلة السبوبجية والعملاء ويتامى هيلارى البنا 🙂 … والرئيس المؤمن أوباما بذات نفسه طلع يدعوا للتظاهرات ضد قرارات ترامب لأن تدعوا للعنصرية 🙂 … اللهم قوى إيمانك يا حسين بك =D
ولو تفتكروا إننا قولنا قبل كدة إن مهمة ترامب مش هــ تكون سهلة ، لأنه داخل فى مواجة مباشرة مع الدولة العميقة .. وعلشان كدة خرجت “سالى ييتس” القائمة بأعمال وزير العدل والمسئول بالوكالة عن الهجرة والجمارك بتصريحات ترفض فيها قرار الرئيس الأميريكى بحظر استقبال المسافرين من 7 دول إسلامية ، واللى يعتبر من المرات القلائل جداً اللى إختلف فيها مسئولون بوزارة العدل مع البيت الأبيض علناً .. ويمكن اشهرها لما الرئيس الأميريكى ريتشارد نيكسون اجبر وزير العدل عام 1973 على الإستقالة ! ..
وعلشان كدة الأستاذ ترامب ماكذبش خبر .. وراح باعت رسالة للأخت “سالى بيتس” وقال لها خليكى فى البيت 🙂 .. ومش كدة وبس .. لكن كمان نشر بيان يتهمها بالخيانة، قال فيه: “القائمة بأعمال النائب العام “سالى ييتس” قد خانت وزارة العدل من خلال رفضها لفرض نظام قانونى يهدف إلى حماية مواطنى الولايات المتحدة، وقد تمت الموافقة على هذا النظام من حيث الشكل والشرعية من قبل مكتب المستشار القانونى لوزارة العدل”…. وأضاف ترامب إن “السيدة ييتس جزء من إدارة أوباما الضعيفة فى السيطرة على الحدود والهجرة غير الشرعية، لقد حان وقت الحزم لحماية بلدنا وأراضينا، وأن الإصرار على تطبيق الاحتياطات القصوى للوافدين من الدول السبع المذكورة فى القانون ليس من التشدد ولكن لحماية الولايات الأمريكية”…. وبعدها بساعة أقال الرئيس الأميركي دونالد ترامب، المسؤول بالوكالة عن إدارة الهجرة والجمارك دانيال راغسديل، وعين مكانه توماس هومان
وعلشان الصورة تكتمل .. حصلت حاجتين مهمين جداً:
الأولى كانت من الإعلام الأميريكى اللى بدأ يقول إن الــ 7 دول دوول مجرد تمهيد ، وإن القرار ده هــ يستتبع صدور قرار يخص السعودية ومصر وباكستان .. وبالتالى يبقى ترامب عنصرى وبيعادى الإسلام والمسلمين ، وهو ده اللى خلّى العديد من نجوم المجتمع الأميريكى والفنانين والنخبة يهاجموا القرار بشدة .. ويهاجموا ترامب شخصياً .. ناهينا عن إن معظمهم كان من مؤيدى هيلارى فى الإنتخابات الماضية
الحاجة التانية وهى الأهم ، هو إنطلاق مظاهرات فى بريطانيا ضد ترامب والتنديد بالقرارات دى ، وكمان بدأت حملة جمع توقيعات لرفض زيارة الرئيس الأميريكى لبريطانيا .. و طبعا ده شئ منطقى إنه يحصل لأن قلب التنظيم الدولى للإخوان موجود فى بريطانيا .. والأهم إن رئيسة وزراء بريطانيا كانت لسة فى أميريكا فى لقاء مع ترامب ، وكانت أهم الملفات اللى على طاولة المباحثات هو ملف الإخوان بطلب مباش وصريح هو عدم إعلان الإخوان المجرمين كجماعة إرهابية فى أميريكا .. وواضح إنهم لم يتفقوا على النقطة دى ، أو على الأقل تم تأجيلها .. وبالتالى كان لازم يحصل كل ده علشان يورّوا ترامب العين الحمرا ، ويختبروا ردود افعاله إذا كان هــ يتراجع وإلا لأ !!
الشئ اللى لازم ناخد بالنا منه واللى الإعلام الأميريكى المحايد ماتكلمش عنه ، هو إن قرار ترامب مش قرار دائم وللأبد .. لكنه قرار يحظر قبول طلبات الهجرة لمدة ١٢٠ يوماً فقط .. وكمان يحظر دخول حائزى الفيزا والأقامة لمدة ٩٠ يوماً .. و ده معناه إنه ستتم مراجعة كل الطلبات المقدمة وكل تأشيرات الجرين كارد الممنوحة فى زمن إدارة أوباما … وهو ده اللى قالب الدنيا ومجنن الإخوان والسبوبجية ، لأن ملفاتهم سيتم فحصها من جديد ، وعلى أسس ومعايير مختلفة … يعنى اللى كانوا بيقبّلوا أرض المطار ، إحتمال كبير يسافروا تانى من نفس المطار اللى دخلوا منه لأميريكا 😉 …
أما بخصوص تعرض البارجة السعودية “المدينة 711” لهجوم من قبل زوارق يقودها انتحاريون غرب ميناء الحديدة .. واللى كان على متنها 176 ضابط وجندي سعودى .. مما ادى لمقتل 2 من أفراد طاقم السفينة وإصابة 3 آخرين .. فــ لاحظو إن ده كان بعد إعلان الإتفاق بين أميريكا والسعودية على إنشاء وإعمار مناطق أمنة فى سوريا واليمن ، تمهيدا لعودة المهاجرين … يعنى الموضوع مقصود وبيستهدف أميريكا فى المقام الأول .. وخصوصا لما نربط اللى بيحصل ده كله بتصريحات مسئولين الــ CIA اللى معترضين جدا على قرار ترامب بخصوص اللاجئين لان كده هي بتخسر تجنيد عملاء جدد لان امريكا دولة مهجر واعتمادها الاساسي علي اللاجئين والمهاجرين .. أااه والله زمبؤلكم كدة .. هم قالوا كدة فعلا مش هزار =D … عرفنا بقى لييه ترامب عايز يراجع التاشيرات وطلبات الهجرة والجرين كارد !!؟؟ 😉
الفرجة لسة هــ تحلوّ .. والأحداث هــ تتسارع .. وخصوصا بعد تصريحات ترامب ضد الإتحاد الأوروبى واللى قال فيها إنه مع قرار خروج بريطانيا من الإتحاد ، وإنه مايهموش لو الإتحاد ده إتحل !! .. و ده معناه إن القادم أسوأ بالنسبة للإتحاد الأوروبى .. و دونالد ترامب أمامه 6 شهور من تاريخ توليه علشان تبدأ الدنيا تستقر بالنسبة له أو تظهر ملامحها .. وهى دى فترة المخاض للنظام الدولى الجديد
بس ياريت تفكرونى كدة ، هو مين اللى من حبة صغيرين كان بيتكلم وقال إصبروا 6 شهور !!؟؟ 😉
وأكيد للحديث بقية .. وهــ نتكلم كتير عن تداعيات الأحداث الدولية
ويارب الخير لمصر فى 2017