16 Feb 2017
الزيارة … والتصريح .. !!
————————-
بعد ما خلصنا أو حتى لسة ماخلصناش من الهرى على موضوع الدولار .. كان لازم تطلع الهرية الجديدة بتاعة تصريح المسئول الإسرائيلى عن سيناء ، واللى صدر بالتزامن مع زيارة نتنياهو لأميريكا ولقائه مع الرئيس الأميريكى دونالد ترامب .. وللأسف برضوا لسة ناس بتسقط فى نفس الفخ … فخ الشحن الإعلامى وهرى مواقع التواصل … وبالرغم من إن الكلام ده لا يستحق حتى عناء الرد عليه ، ثقة منا فى وعى اصدقاء صفحتنا .. لكن هــ نتكلم فيه علشان نرد على اللى بيتقال من ترّاهات 🙂
طب إييه الحكاية !؟
الحكاية إن وزير حالي في الحكومة الإسرائيلية إسمه “أيوب قارا” .. كتبت تويتة بتقول “سوف يتبنى ترامب ونتنياهو خطة الرئيس المصري السيسي بإقامة دولة فلسطينية في غزة وسيناء بدلا من الضفة الغربية. وبذلك يُمهد الطريق لسلام شامل مع الائتلاف السني” .. وعنها بقى وقامت الدنيا .. وراحت قناة الحظيرة ناشرة الموضوع ، وكل المغردين أو بالأصح محترفى المأمأة ، بدأوا يقوموا بدورهم على مواقع التواصل ، لحد ما الموضوع تم تضخيمه والتعامل معاه على إنه أمر واقع .. وتانى للأسف الشديد إن فيه ناس صدقته .. أو إرتبكت وكأن على راسهم بطحة !
طبعا الكلام ده كلام قديم تم إثارته وترديده من باحث إسرائيل سنة 2009 … واخدين بالكوا 2009 يعنى قبل ثورات الخراب العربى بسنتين ، وكان الكلام إنه يتم اخذ جزء من أرض سيناء ، ويتم اضافته لغزة ، وإعتبارها وطن قومى للفلسطينيين ، ومصر تاخد مكانها حتة من صحراء النقب …. وأحب أفكركم إن المجحوم بإذن الله قريب ، محمد مرسى وجماعته بدأوا بالفعل فى 2013 فى التجهيز للمشروع ده لما بدأ فى إعطاء الكثير من الغزاوية والحمساوية بطاقات مصرية تمهيدا للتوطين فى سيناء وكان فيه مخطط بيتم التحضير له لتمليك غير المصريين للأراضى فى سيناء بحجة تنشيط السياحة .. وأكيد كلنا مش هــ ننسى موضوع الــ 8 مليار اللى أوباما صرفهم على الجماعة علشان تنفيذ المخطط ده ، وتم إستجوابه بالفعل فى الكونجرس الأميريكى .. واللى وقف المشروع ده كان وزير الدفاع وقتها الفريق عبد الفتاح السيسى ، واصدر فرمان عسكرى بمنع تمليك غير المصريين للأراضى فى سيناء !
وفجأ بقدرة قادر يبقى اللى وقف مشروع التوطين ده و وأده فى مهده ، هو اللى وضع خطة لإقامة دولة فلسطينية فى غزة وسيناء .. والجيش اللى الإرهابيين اطلقوا النفير العام للجهاد ضده ، وبقى بيحارب منتخب العالم للإرهاب ، وبيموت كل يوم علشان يحافظ على سيناء ، وافشل مخطط محكم للسيطرة على الشيخ زويد ، ومحاولة رفع علم القاعدة عليها فى يوليو 2015 وأفشل كل المحاولات بعدها للسيطرة على أى جزء من سيناء ، هو اللى النهاردة بــ يبيعها وبيفرط فيها كدة بالساهل !!!! ….. يا جماعة طب حد عاقل بس نعرف نكلمه 🙂
وبعدين هو لو كان فيه اتفاق فعلا بين مصر واسرائيل على توطين الفلسطينين فى سيناء .. كان إييه اللى يخلى إسرائيل تعلن عن ده ، وتقلب الدنيا على دماغ الراجل الخاين بتاعهم ، وتفضحه قدّام شعبه … على الأقل كانت اسرائيل تلتزم الصمت لحد ما يبدأ التنفيذ ويبقى أمر واقع .. والموضوع كان هــ يبقى سرى وماكانش هــ يبقى متاح لوزير عادى فى الحكومة الإسرائيلية .. لأ وكمان يطلع يقول الكلام ده على تويتر … يا جماعة بجد عايزين حد عاقل بس نعرف نكلمه 🙂
وعلشان الغرض مرض ، فالقنوات والمواقع اللى نشرت الخبر وكبرته وضخمته ، لم تنشر بيان الخارجية اللى بــ ينفى الكلام ده ، ولا تصريحات صائب عريقات عن إن سيناء ارض مصرية ، وإن الفلسطينيين مش ممكن يقبلوا إقامة دولتهم غير على أرض فلسطينية .. وكمان لم يشيروا إلى نفى صفحة رئيس الوزراء الإسرائيلى إن موضوع الدولتين غير مطروح اصلا فى اجندة الحوار مع الرئيس ترامب
لكن علشان مصر النهاردة ماشية بخطى ثابتة ، وبتتغلب على الصعوبات السياسية والتحديات الإقتصادية والإجتماعية والإرهابية .. وأفشلت زى ماقولنا قبل كدة مرارا وتكرارا مخطط إتصرف عليه تريليونات لمصلحة إسرائيل كان لازم يطلع تصريح زى ده .. ويتم بروزته بالشكل ده .. لأنه إذا كان المخطط فشل فى ضرب مصر ، وعجز عن إبعاد السيسى والجيش عن المشهد بعد تنامى الظهير الشعبى بشكل كبير .. فكان لازم تجرى محاولة لضرب العلاقة بين الرئاسة والشعب وتقليب الرأى العام المصرى فى ملف مافيهوش هزار بالنسبة للمصريين
و ده ياخدنا للتغيرات اللى حصلت مؤخرا فى قيادات حركة حماس .. والتقارب الحاصل فى الوقت الحالى بين مصر وبين الجناح العسكرى للحركة و ده طبعا ضد مصلحة إسرائيل اللى كانت بتستخدم حماس لتدمير القضية الفلسطينية .. و ده يخلينا نربط اللى بيحصل ده ، مع حكاية اطلاق الصواريخ من سيناء على إيلات الاسبوع الماضي واللى أعلنت عنه إسرائيل ، و ده معناه ، إنه بــ يتم إستخدام بعض التكفيريين فى سيناء لعرقلة التفاهم المصري مع حماس، كنوع من التأديب .. وبالمرة يتم إطلاق تصريح زى موضوع إقامة دولة فلسطينية فى سيناء لإحداث نوع من البلبلة وخلخلة للرأى العام الداخلى ، ويخدّم عليه طبعا كلاب الداخل والخارج !!
مصر ماشية بخطى ثابتة .. و بــ تتقدم فى كل الملفات ، وبتحسم كل الجولات لصالحها .. وعلشان كدة لازم يطلع حاجات زى كدة كبالونات إختبار ، سواء للإدارة الأميريكية الجديدة أو للقيادة السياسية المصرية ، أوحتى للّعب على الوعى الجمعى للمصريين .. و ده لو كان دليل .. فهو دليل على نجاح مصر
ونرجع تانى ونقول .. هو الهري على إييه النهاردة !!؟؟ =D =D