27 May 2017
فعل .. أم رد فعل .. !!
———————
للأسف .. بدل ما المصريين بكافة طوائفهم يحتفلوا بمجئ شهر رمضان .. بنتكلم من إمبارح عن الدماء والشهداء ووجيعة الوطن … وجيش بياخد بثأر أبنائه .. وحرب بتشعلها مصر فى دولة مجاورة ..
وبعد ما هدينا .. وعلشان بس نربط الصورة ببعضها .. ونقلا عن الصفحة الرسمية لوزارة الخارجية المصرية:
صرح المستشار احمد أبو زيد المتحدث الرسمي باسم وزارة الخارجية بانه بناء على تكليف من السيد سامح شكري وزير الخارجية، طلبت بعثة مصر الدائمة لدى الأمم المتحدة من كل من مجلس الأمن والجمعية العامة للأمم المتحدة توزيع خطاب الرئيس السيسي أمام القمة العربية / الإسلامية / الأمريكية كوثيقة رسمية من وثائق كل من مجلس الأمن والجمعية العامة للأمم المتحدة.
وأضاف، أنه بناء على ذلك فقد قام مجلس الأمن فى 25 مايو الجاري بتوزيع الخطاب على أعضاء مجلس الأمن باعتباره وثيقة رسمية من وثائق المجلس، وهو الأمر الذي يعكس أهمية خطاب السيد الرئيس ويوثق ما تضمنه من رؤية مصرية شاملة في مجال مكافحة الإرهاب.
هذا، ومن المنتظر أن تتخذ الجمعية العامة للأمم المتحدة نفس الإجراء بتوزيع البيان على جميع أعضاء الأمم المتحدة، في خطوة هامة أتخذتها وزارة الخارجية للترويج للرؤية مصر وتوثيق الخطاب التاريخي للسيد الرئيس في مستندات الأمم المتحدة.
اللى حصل ده .. يعتبر سابقة لأول مرة تحصل في تاريخ مجلس الأمن منذ نشأته ، إنه يعتبر خطاب رئيس دولة فى قمة دولية ، بمثابة وثيقة رسمية للأمم المتحدة .. و لو دققنا فى معنى الخطاب وكلامه .. هــ نلاقيه هجوم صريح وواضح على أطراف و دول بعينها ، ومش ناقص غير ذكر الإسماء .. وبالتالى كان لازم يكون فيه رد إنتقامى على اللى حصل ده .. !!
ماهو اصل مش ممكن أطراف المؤامرة يشوفوا مصر وهى بتستعيد أهميتها ، و بتتحول لقوة دولية لها قوتها وسطوتها السياسية ، وأصبحت بــ تتحرك بسهولة ويسر على كافة الأصعدة .. ويسكتوا .. لازم يكون فيه رد إنتقامى .. حتى ولو كان على حساب الأبرياء .. وبالمرة نضرب كام عصفور بحجر واحد .. أهمها إننا نثبت للى مشغليننا ما فشلناش ولا حاجة .. ولسة نقدر نساهم فى إنجاح المؤالمرة .. وكمان نسرّح شوية كلاب ضالة تتكلم عن القصور الأمنى وفشل العسكر والطقطوقة إياها بتاعة كل مرة .. وشوية تانيين ينفخوا فى النار ويحولوها لفتنة طائفية .. وبيساعدهم على كدة شوية مغيبين ، أو متطرفين فكرياً مسلمين ومسيحيين علشان يشعلوا معارك كلامية على السوشيال ميديا ويقطعو فى بعض وفى البلد …. ده غير توجيه رسالة للحكومات إننا ممكن نقلبها على دماغكم ونقلب شعوبكم عليكم لما فيه ناس أبرياء تموت … وبكدة نبقى حققنا اهدافنا .. ورسخنا مبدأ شمشون .. عليا وعلى أعدائى ..
واللينك ده فيه الخلاصة على لسان نائب وزير الخارجية الروسى .. وعلشان كدة هم بيضربونا .. أو بيحاولو يضربونا بشدة ..
الموضوع مش محتاج حد من علماء المنطق علشان يخلينا نربط الأحداث ببعضها .. لأن الأحداث مربوطة ببعضها خلقة .. ومش محتاجة ذكاء خارق للوصول للربط ده …. واللى رافض الكلام ده أو مش مقتنع بيه .. ومُصرّ يمشى فى السكة اللى الأخرين عايزينه يمشى فيها .. فــ له مطلق الحرية فى كدة …. لكن إحنا لأ ..
وياريت الناس بتاعة “مافيش مؤامرة” ، ينقطونا بسكاتهم .. لأن المؤامرة اصبحت ماثلة أمام الجميع .. واللى كنا بنقوله من سنتين .. بيحصل دلوقتى بالفعل على الأرض .. والإرهاب بــ يطول كل حتة فى العالم .. والخيوط اصبحت بتشير لأصحابها بمنتهى الوضوح .. من أول الصبيان اللى بتنفذ .. لغاية الخواجة اللى قاعد هناك بيخطط وبيرسم وبيكتب كل سيناريوهات الأحداث فى العالم ..
يعنى من الأخر كدة .. إللى حصل من يومين هو رد فعل .. وليس فعل .. و ده فى حد ذاته تغيير كبير فى إستراتيجية المعركة إنك تتحول من مفعول به إلى فاعل بتتلقى ردود أفعال الأخرين ..
والرئيس السيسى طلع إمبارح وأعلنها بصراحة .. إن مصر فى مواجهة مباشرة مع الإرهاب الدولى بكل تنظيماته وفصائله .. يعنى التحدى بقى على عينك يا تاجر
مصر مكملة .. وإحنا قدها وقدود