1 May 2015
الصقر المصرى يحلق ويفرد أجنحته فوق المتوسط .. !!
—————————————————-
خلّونا نقول إن زيارة الرئيس السيسى لإسبانيا كان المفروض إنها تكون زيارة عادية ، تلبيةً لدعوة ملك إسبانيا اللى تلقّاها الرئيس السيسى أيام المؤتمر الإقتصادى فى شرم الشيخ .. لكن الرئيس السيسى خلّى الزيارة مش عادية 🙂 🙂
أهمية زيارة الرئيس المصرى لإسبانيا ، إنها جائت بعد زيارته لقيرص ، وإجتماع القمة الثلاثى اللى تم للمرة الثانية بين مصر وقبرص واليونان ، .. واللى بيحمل ما يحمل من رسائل لكل القوى الإقليمية والدولية زى تركيا وإسرائيل مثلا .. وخصوصاً فيما يخص مشكلة أبار غاز شرق المتوسط .. واللى إتكلمنا عنها فى مقالين قبل كدة !
الملاحظ والمدقق هــ يلاقى إن الجميل فى التحركات المصرية بعد 30 يونيو إنها حطمت نظام الوصاية على مقدرات مصر وقراراتها السياسية .. و ده عن طريق التعامل مع كل الأطراف ، وتوطيد أركان الدولة المصرية سياسياً بدعم علاقاتها مع كل القوى الدولية من غير ماتترمى فى حجر حد من القوى دى .. !!
بمعنى ..
قطر بتستهبل وبتهرج .. طز .. إحنا علاقاتنا فى منتهى القوة بكل دول مجلس التعاون الخليجى بدعم لا متناهى إقتصاديا وسياسياً .. ومن غير ما نقطع علاقتنا بقطر وبرضوا أصحاب بإبتسامة الثعلب .. وحبيبى حبيبى 🙂
أميريكا هــ تقل بعقلها .. و مالوا .. إحنا معانا روسيا بدعم عسكرى وسياسى ولوجيستى ، وكمان الصين بالتبعية ، و إديها زيارة للصين مع توقيع 26 إتفاقية تبادل تجارى .. بعد 3 لقاءات رئاسية روسية والرابعة جاية الشهر ده بإذن الله .. وبرضوا ما قطعناش علاقتنا بأميريكا .. والمعونة شغالة والغلاسة شغالة وأصحاب بإبتسامة ذئب شرس .. وحبيبى حبيبى 🙂
تركيا هــ تتجنن علينا .. ومالوا .. تعالى ياقبرص و يا يونان نعمل معاكم علاقات ونحل مشاكل ترسيم الحود البحرية ونعمل علاقات إقتصادية ، وكمان توافق سياسى وإستراتيجى ودعم الموقف المصرى فى الإتحاد الأوروبى .. ورسائل كل شوية لأردوغان .. “لمّ نفسك وبطل جعجعة لأن ده آخرك” .. =D =D
عايزين تضربوا مصر فى منابع النيل وفى أفريقيا .. ومالوا .. إحنا بنعمل علاقات مع كل دول القارة السمراء ، وهــ نعمل إستثمارات فيها ، وهــ يدعمونا فى مجلس الأمن ، و بــ ننقذ مايمكن إنقاذه فى أثيوبيا ، وإتفقنا إننا نعوم سوا ، زى ما قال رئيس الوزراء الأثيوبى 🙂
المجتمع الدولى مش عايز يحل مشكلة ليبيا .. ومالوا برضوا .. إحنا نظبط نفسنا مع فرنسا وإيطاليا وقبرص واليونان و وراهم إسبانيا أصحاب المصلحة الرئيسية معانا فى إستقرار ليبيا .. يعنى بالصلاة على النبى كدة بالبلدى ، معانا نص الإتحاد الأوروبى .. وخصوصاً لما الرئيس السيسى يزور ألمانيا 🙂
يعنى إحنا بنشتغل وبنتحرك وبنبعت رسائل طول الوقت ، إن من الأخر كدة .. مصر مش بــ يتلوى ذراعها !!
وأى حد بيتدخل فى السياسة الداخلية لمصر ، الدولة بتعمل اللى فى مصلحتها ومصلحة الأمن القومى ،و بترد فى منهى العنف على اللى بــ يتدخل ، وتقول له بص يابو دم خفيف انت يا بتاع أفشات الأفلام …. إنت تيجى لغاية عندى وتعمل “كط” كدة ، و “ستوب” لحد هنا =D =D =D
أصدقائنا الأعزاء ..
زيارة الرئيس المصرى لأسبانيا كانت لها مدلول ونتائج إقتصادية بتوقيع بروتوكولات تعاون إقتصادى .. زى اللى إتعملت فى مجال النقل ، وكمان عمل مصايد أسماك فى مجرى قناة السويس .. يعنى السيسى بــ يأمن القناة إقتصادياً قبل إفتتاحها وتأمينها سياسياً ودولياً !! …
لكن الأهم من ده كله أو بالتوازى معاه ، إن السيسى بيوطد علاقته بإسبانيا إحدى الدول المتحكمة فى مضيق جبل طارق .. يعنى السيسى بيأمن المضايق البحرية الموصلة _من و إلى_ قناة السويس ، وهمّ مضيق جبل طارق ، ومن قبلها مضيق باب المندب ، واللى مصر على طول حمّرت عنيها أول ما أصبح فيه شبح تهديد للملاحة فيه ..
مصر بتفرد جناحها على المسطحات المائية والبحار المحيطة ، وبتوطد علاقتها بكل الدول المشاركة لها سواء فى البحر الأحمر أو البحر المتوسط علشان تضمن لها ظهير بحرى قائم على علاقات وطيدة .. والنظرة المبدئية بتقول إن الكلام ده له أهمية قصوى فى لعبة توازنات القوى الإقليمية سواء من الناحية العسكرية أو الإقتصادية ، على المستوى القريب و البعيد 🙂
حورس مش بيلعب .. وبإذن الله تكمل على خير 🙂