إلحق ق ق ق ق … مصر صوّتت للإسرائيل

1 Nov 2015

إلحق ق ق ق ق … مصر صوّتت للإسرائيل !!

——————————————–

على نفس طريقة مصر كسبت مقعد مجلس الأمن بالتزكية .. وكل يوم نطلع لنا بقصة جديدة وموضوع هري جديد ، فــ الهرى إمبارح والنهاردة على إن مصر صوتت لإسرائيل فى الأمم المتحدة !! .. عنوان مقتضب وبس كدة خلاص .. وبعدها يطلع شممام الكلة من دوول يشد نفس جامد ويشرب بيريل ، وهاتك ياهري على الفيسبوك وبين أصحابه وكأنه حامى حمى الديار اللى ما تنطفيله نار ولا يتذل له جار 🙂 .. ويرتدى ثوب الوطنية ويفضل ينظر وكأنه جيفارا 🙂

أنا عيز بس اقول للناس اللى بتمثل قمة النفايات الفكرية ، و تلك الحثالة البشرية من النخبة وبعض الإعلاميين .. وفوق منهم شوية العيال المتثورجة على روحها ، واللى مش فاهمين إنهم بيتحركوا بس بالزمبلك بمجرد ما يتبسبسلهم كدة على الفيسبوك .. إنه ياحبيبى منك له ، مصر لم تصوت لصالح اسرائيل .. لكن مصر صوتت لصالح الامارات ..

طب إزاى !!؟؟

بدون الدخول فى تفاصيل وسرد معلومات كتيرة ، طلعت فى بيانات رسمية وتم تداولها على كتير من المواقع .. وبرضوا ناس كتيرة كذبت التصريحات ورفضتها وسخرت منها بإعتبار إنهم العالمين ببواطن الأمور وحاملى صكوك الوطنية ، فالموضوع ببساطة خالص واللى تحت عنوان لجنة الأمم المتحدة للإستخدامات السلمية للفضاء الخارجي ، .. ده موضوع مصر ملهاش فيه ، و ولا يفرق معاها ببصلة ، و كانت تقدر تمتنع عن التصويت على قائمة الدول الستة بمنتهى البساطة .. لأن التصويت فيها بنظام القائمة

لكن ولأن العلاقات الدولية وإدارة سياسات الدول مش بتتحسب بمنطق الكولجية وجنرالات الفيسبوك .. ولأن دولة الامارات العربية لها مصلحة كبيرة لأنها من المرشحين على عضوية اللجنة الأممية .. ولأن الإمارات طلبت من مصر بشكل رسمى أثناء زيارة الرئيس السيسي الأخيرة ، إن مصر تصوت لصالحها على عضوية اللجنة .. وبما إن مصر لها مصالح كبيرة مع الامارات وشايلة جميل الإمارات على راسها من فوق .. فكان لازم مصر تصوت على القائمة كاملة بناء على النظام الخبيث الموضوع للتصويت لأن التصويت زى ما ذكرنا كان بنظام القائمة مش تصويت فردى .. والإنتخاب بــ يكون بالتوافق المسبق بين المجموعة العربية و بالإتفاق قبل التصويت ، مين يصوت ومين يمتنع !!

مين بقى صوّت ومين ماصوتش ، ومين إمتنع عن التصويت ، .. وكشك سجاير مين عمل إييه .. دى مش قضيتى ولا قضية مصر .. لأن مصر بتتحرك داخل إطار من مواثيق الشرف فى علاقاتها الدولية ، ومش ممكن تتخلى عمّن تربطهم بمصر علاقات توأمة استراتيجية !

زعلان إن مصر صوتت لقائمة تشمل إسرائيل !!؟؟ .. طبعاً من حقك تزعل .. وانا كمان زعلان .. لكن مصر مش هــ تبوّظ مصالحها مع دولة زى الإمارات علشان الفيسبوك هــ يزيط ويهري له كام ساعة ، لأنه فى الأخر الدولة المصرية  مسئولة مسئولية تامة عن الشعب ده .. ومسئولة عن علاقاتها الدولية اللى بتمثل مصلحة الشعب المصرى ..

وخليكوا فاكرين إن مصر تم إتهامها بالعمالة والخروج عن الصف ، والسادات تم وصفه بأبشع التهم ، لما قرر يعمل مباحثات السلام لإستعادة الأرض المصرية والعربية .. وبعدها بسنيييييييين طويلة ، أصبح لكل الدول العربية بإستثناء ((((ســوريـا)))) 🙂 ، علاقات مع الكيان الصهيونى سواء بشكل رسمى أو من تحت الترابيزة .. و جلس كل الرافضين والمهاجمين لمصر وقتها مع الكيان الصهيونى فى مباحثات جنيف ، وطلع القذافى وقال ، ياريتنا كنا سمعنا كلام السادات 🙂 🙂 

اللى عايز يصدق ويقتنع براحته ، واللى مش عايز يقتنع ولسة زعلان هو حر .. لكن دى مقدرات سياسية لدولة .. وإدارتها مش ممكن تتم بنفس اسلوب قعدة الفَسَحة (بفتح الفاء والسين) …

أما بقى شلة النفايات الفكرية والعيال المتثورجة على روحها ، وكل اللى عاملين فيها خبراء سياسيين ومناضلين كبار ، .. فأنا بس عايز اقول لهم .. وإنت زعلان ليه ياكوكو إنت وهو !؟؟ .. مش السيسى عميل وخاين و أمه يهودية .. طب مستغربين ليه بقا !!؟؟ .. يالا يا حبيبى انت وهو ، روح شوفلك شغلانة إشتغلها بدل ما إنت عايش فى العالم الإفتراضى بتاع الفيسبوك وفرحان بنفسك وانت شغال بالزمبلك ، ومستمتع جداً بلعب دور “حمار رغم أنفه” ..

وإذا كان الإتهام الجاهز عندك دايماً إن كل اللى بيخالفك و بيأيّد توجهات الدولة هو مجرد مطبلاتى ، وانت الخبير اللى فاهم كل حاجة .. ماشى ياسيدى .. مطبلاتية ونفتخر =D =D =D

لمتابعة تعليقاتكم