05 Nov 2015
مصر .. وزيارة الرئيس للشيطان الأكبر .. !!
——————————————-
من شهور طويلة وإحنا بنتكلم عن التحديات اللى بتخوضها مصر ، والخطوات المنظمة اللى بتسير عليها القيادة المصرية لمواجهة التحديات وإجتياز العوائق ، بأسلوب تصاعدى زى بالضبط كدة لعبة الفيديو جييم اللى بيتحرك فيها اللاعب وبيقوى نفسه وبيزود أسلحته مع كل مرحلة بيعديها .. وكل ما هو بيقوى ، كل ما المخاطر بتزيد قوتها .. وبــ يبقى فيه فى اللعبة مراحل من التحدى بتنتهى بمواجهة بعض الأشرار فى نهاية كل مرحلة ، لغاية لما يوصل للمرحلة النهائية ويقابل الوحش 🙂 .. وهو ده اللى حصل ..
مصر كانت بتخطى خطوة بخطوة .. وبتأمن ظهرها ، وبتصعّد فى مستوى زياراتها بترتيب وبحرفية شديدة ، .. وكان كل ما حد من اصدقاء الصفحة بيسأل ، أومال السيسى هــ يروح إنجلترا إمتى !!؟؟ .. دى أهم زيارة لازم يعملها !؟؟ .. وكان دايما ردنا إن إنجلترا هى المرحلة النهائية ، وناس كتير ماكانتش مقتنعة .. لكن اللى كان بيحصل على الأرض كان بــ يأكد كلامنا 🙂 .. وحتى بعد ما الرئيس السيسى تلقى دعوة رسمية لزيارة إنجلترا ، قام بالرد بشياكة وأجل الزيارة للوقت اللى يتوافق مع الجدول المصرى .. منها شئ من الرخامة والتعزز لإننا مش مدلوقين أوى علشان نجيلكم ، ومنها الإنتهاء من كل الأشرار والإستعداد التام قبل مواجهة الوحش ..
طب ليه إنجلترا هى الشيطان الأكبر مش أميريكا !!؟؟ .. لو نرجع شوية بالتاريخ ، هــ نلاقى إن إنجلترا هى سبب كل المصايب فى الــ 150 سنة اللى فاتوا .. هى اللى زرعت بذرة الفرقة والشتات لما دقت أول مسمار فى نعش التوافق الدينى بزرع الوهابية على إيديين محمد بن عبد الوهاب .. وهى من دعمت النشاط الشيعى والتشيع فى إيران .. وهى من دعمت فكر حسن البنا ، وأيدته ، و دعمته بالمال ويمكن بالسلاح كمان .. وهى اللى لعبت أقذر لعبة فى تاريخ العمليات العسكرية علشان تجبر أميريكا على دخول الحرب العالمية الثانية وتسببت فى مقتل مئات الألاف من البشر .. وهى اللى أعطت وعد بلفور لقيام دولة إسرائيل .. وهى صاحبة إشعال الموقف فى حرب 56 بعد قيادة حملة عالمية ضد تأميم مصر لقناة السويس .. وهى اللى فتحت أبوابها على مصراعيها لتأوى عناصر التنظيم الدولى للإخوان المسلمين .. وكانت عنصر أساسى فى تدعيم البلطجى الأميريكى اللى هى عملته بإيديها فى كل حروبه فى أفغانستان والعراق ، على طريقة إنت المخ وأنا العضلات .. وهى كانت رأس الحية القابع دائماً فى الظل فى قيادة التحالفات السياسية والإقتصادية ضد مصر من بعد 30 يونيو !!
وبدون الدخول فى تفاصيل الزيارة ، لأن دى حاجات لسة هــ نتكلم عنها وهــ تتكلم عنها كل وسائل الإعلام .. لازم نشوف حقارة الإستعداد لزيارة الرئيس المصرى عبد الفتاح السيسى ، علشان بس تعرفوا إننا لما بنقول إن المواجهة على أشدها ومن أخطر مايكون ، وبــ يُستخدم فيها أدوات حروب الجيل الرابع بكل شراسة وفجاجة .. وعلى الوجه إبتسامة ، وفى الإيد وردة وفلة =D =D يبقى معانا حق !! 🙂
أولا .. التصعيد الوقح واللا متناهى على مستوى التصريحات من قيادات وأعضاء التنظيم الدولى اللى عايشين فى إنجلترا ضد مصر وضد السيسى وإعلانهم إنهم مستعدين لإستقبال السيسى وإحراجه ، وإنهم هــ يستقبلوه اسوأ إستقبال ، وهــ يفشلوا زيارته ..
ثانيا .. شن حرب إعلامية بداية من لقاء السيسى على BBC والمحاولات المستميتة لإحراج الرئيس فى اللقاء .. لكن على مين 🙂 .. ولما فشلت المحاولات ، فــ يتم تحريف تصريحاته فى الصحف وجميع الأبواق الإعلامية بصورة مخجلة .. وللأسف منها صحف مصرية .. علشان يتم إحراج الرئيس السيسى داخليا فى مصر ، برغم إنه ماقالش أكتر من اللى قاله فبل كدة فى ألمانيا وفى فرنسا .. ويمكن بنفس الكلمات والتعبيرات !!
ثالثا .. إستغلال حادث الطائرة الروسية للهجوم على مصر وقيام CNN و BBC بشن حملة صحفية إليكترونية .. قااااال إيييييه .. إستناداً لتقارير مخابراتية من المخابرات الإنجليزية MI5 بتقول إن حادث الطائرة كان ناتج عن إنفجار قنبلة داخل الطائرة … قوووم إيييييه !!! .. كل شركات الطيران الخاصة والخطوط البريطانية تقوم بتعليق رحلاتها لشرم الشيخ لمدة أسبوع بأوامر حكومية بناء على المعلومات “الإستخراراتية” 🙂 .. لأ وكمان يتم إرسال لجنة للأمن لقياس مستوى التأمين فى مطار شرم الشيخ .. وبالتبعية وشوف حكمة ربنا يا مؤمن لما تعلن خطوط طيران إيرفرانس و لوفتهانزا عن تعليق طيارانهم لشرم الشيخ ، بالرغم من إنه مافيش طيران لهم بينزل شرم الشيخ أساساً =D =D .. وكل ده حصل فى 48 ساعة ، بدأت من لحظة وصول الرئيس السيسى لإنجلترا !! 🙂
والمتابع عن قرب هــ يوشوش فى ودننا ويقول إن اللجنة اللى تم إرسالها من إنجلترا كانت ردود فعلها مثرة للحيرة والإستغراب من حيث التعنت الغير مبرر والشراسة والتعالى فى التعامل مع الجهات الأمنية المصرية لدرجة إصرارهم على إخلاء الرعايا الإنجليز من شرم الشيخ ، لولا رفض بعض الرعايا للكلام ده .. وكمان الجهود اللى بذلتها أجهزتنا الأمنية لوقف المهزلة دى .. وقيامها بإرسال كتيبة جيش لتأمين المطار !!
لكن الجميل بقى فى كل ده .. إن الرئاسة المصرية والكريميلن ردوا على الكلام ده بتصريحات رسمية وقالوا إن الكلام عن وجود قنبلة هو مجرد تكهنات ولا تستند لأى أسس معلوماتية صحيحة وكل الكلام ده سابق لأوانه !!!
المخابرات الإنجليزية والأميريكية اللى طلعوا إعتذروا عن حرب العراق وقالوا إن ده كان مبنى على معلومات إستخباراتية خاطئة .. و اللى بقالهم شهور مش عارفين يتوصلوا لمعلومات عن داعش وعن الإرهابيين ، ولا عارفين يثبتوا التواصل والتواطؤ بين أعضاء التنظيم الدولى المقيمين فى أنجلترا ، وبين أذرع التنظيم فى مصر ، .. قدروا يتوصلوا لمعلومات إستخباراتية إن اللى حصل فى الطائرة الروسية عملية إرهابية قبل مايطلع تقرير الصندوق الأسود !! 🙂 … شوووووف إزااااااى !! 🙂 ….. ومع فرض إن ده شئ صحيح وحقيقى ، يبقى انتم عارفين مين اللى عملها من الأول ، أو …… أو انكم انتم اللى عملتوها .. وفى الحالتين يكون السؤال اللى يطرح نفسه بصوت الفنان أحمد زكى “عمركم شوفتوا “وس…..ة” أكتر من كدة !!؟؟ 🙂 🙂
وكل ده وتقول لى مافيش مؤامرة !!!؟؟؟ … ياعم روح إغسل رجليك بمية سقعة و خُش نام !!! 🙂
لكن مصر مكملة .. ونتائج زيارة الرئيس لإنجلترا مش هــ نشوفها دلوقتى ، لكن هــ نشوفها بعدين .. و ده اللى هــ نبقى نتكلم عنه بإذن الله
وللحديث بقية