14 Nov 2015
فرنسا .. والجزء الثانى من عملية الطائرة الروسية !!
—————————————————-
المعركة اصبحت سافرة .. والمواجهة بقت على عينك يا تاجر .. و المعسكر المضاد اصبح ماعندوش وقت يضيعه لأنه من الاخر كدة وبكل المعادلات المنطقية والموضوعية وبحسابات المكسب والخسارة فى معركة الهيمنة على مقدرات الشرق الاوسط وهدم المنطقة بالكامل والاستيلاء على ثرواتها !! .. هو خسران _زى ما بيقولوا كدة_ الجلد والسقط …. و المعلم يأس من الصبيان بتوعه اللى فشلوا طوال الاربع سنوات اللى فاتت و نزل بنفسه و كأنه بيقول … اللى مش حيكمل معانا حنحط السيخ المحمي في صرصور ودنه 🙂 🙂
عايز بس افكركم ان فرنسا دونا عن دول أوروبا اللى حدثت فيها حادثة ارهابية مفجعة من كام شهر وهى حادثة شارلى إيبدو واللى العالم كله تعاطف معاهم حتى لو كان تعاطف صورى ، و أيد نزول الجيش للشوارع علشان 4 ارهابيين فى حين ان نفس الدول دى بتعارض تواجد الجيش فى الشارع المصرى وبتشكك فى حربه ضد آلاف الارهابيين وبيقولوا ان ده قمع للحريات وبيكسر حق التظاهر .. واحنا اتكلمنا فى 3 مقالات عن الحادث ده فى وقته .. وشرحنا فيه الموضوع بالتفصيل .. و حنعيد نشر المقالات دي تاني عشان تربطوا الاحداث مع بعض …. لان اللى حصل بالامس كنا تنبأنا بيه وشرحناه بالتفصيل و قلنا اشمعني فرنسا بالذات …. و كأننا بنتكلم عن الاحداث الحاليه 🙂 🙂
فرنسا وقتها كانت لها مواقف محددة وقولنا ان ده اللى ادى للأحداث دى كلها .. و منها ان فرنسوا اولاند بيتبنى سياسة اصلاحية لمحاربة الفساد الداخلى ، وايضا تبنى فرنسا لسياسة الانفتاح على الدول المحورية والتخلص من الوصاية الصهيونية وسيطرة رأس المال اليهودى .. وكمان اعلنت عن تأيدها التام لقيام دولة فلسطينية .. ومش كدة وبس .. لكن كمان كانت بتنادى الدول الاوروبية بوقف نبرة التهديد ضد روسيا والتقارب السياسى معاها لحل الازمة الاوكرانية .. لكن الاهم بقى واللى يخصنا فى الموضوع هو دعمها لمصر وبناء علاقات استراتيجية سواء كانت اقتصادية او حتى عسكرية بإتمام صفقات سلاح على أعلى مستوى !!
اللى بيحصل النهاردة فى فرنسا هو استكمال لمسلسل الضغط على كل الاطراف اللى لها توجه مؤيد لمصر اولا ، ومناهض لمخطط تدمير الشرق الاوسط ثانيا .. على نفس مبدأ “من ليس معى فهو ضدى” .. ومش كدة وبس لكن كمان لازم يدفع الثمن !! .. ونزود حاجة كمان فى النص وهى الملف السورى .. وبرضوا من على الوش .. انت صاحبى وحبيبى وكفائة وانأ متعاطف معاك وكدزة
لو بصينا على حادثة الطائرة الروسية فى سيناء هانلاقى انه كان فيه حالة شديدة من الاستعداء الغربى وخصوصا من انجلترا ضد مصر ، واستباق لكل نتائج التحقيقات وتفريغ الصندوق الاسود ، وكمان التأكيد على ان اللى حصل هو عمل ارهابى على اعتبار ان جهاز ال MI5 عارف القرد مربى ابنه فين .. برغم ان التحقيقات الامنية لصاحبة المشكلة نفسها وهى روسيا لسة ماقالتش حاجة ، وممكن ماتقولش حاجة خالص ، لأن اللى حصل مع وضع فرضية العمل الارهابى مش ممكن يكون عبارة عن واحد اخذ قرشين وقالوله خد حط اللفة دى فى الطيارة ياكوكو .. لأ طبعا .. واى حد هايتخيل الموضوع كدة يبقى بيهين ذكائه قبل ذكاء الاخرين .. لأن الموضوع ده لو صحت فرضية العمل الارهابى هايكون مخطط مخابراتى صرف بأدوات مخابراتية .. ووارد بشكل كبير انه مايكونش اتعمل اصلا فى شرم الشيخ !!
و اذا كان رد الفعل الروسى بعد الحادث بيقول انه “خلف الاكمة ما خلفها” .. حتة عربى أهى 🙂 🙂 فـ رد الفعل الروسى النهاردة بعد اللى حصل فى فرنسا إمبارح بتعليق تبادل رحلات الطيران بين باريس وموسكو .. بيقول ان الصراع المخابراتى وصل للذروة ، والمواجهة اصبحت مباشرة وعلى عينك يا تاجر .. ولما نربط كل ده بكلام الرئيس السيسى وهو واقف زى الاسد فى شرم الشيخ وبيقول “ان مصر مش هاتركع ، واييه يعنى لو نجوع بس برضوا هانبنى مصر” .. تعرف ان المخطط كبير أوى واصعب من ان يستوعبه العوام .. وخصوصا المغيبين بتوع الإينكيلاب ، ودولة الزولم والكمع ويسكت حكم الحثكر !!
وعلشان الصورة تكمل فلازم نجيب رجل سوريا فى الموضوع ونطلع نقول ان منفذى تفجيرات فرنسا فيهم سوريين .. لأ وبالصدفة البحتة وشوف حكمة ربنا يا مؤمن .. لما نلاقى جواز سفر سورى ملقى بجوار جثة واحد من اللى قاموا بالعملية .. علشان فرنسا تتحمق وتقوم داخلة تهبد سوريا .. وبوتين والجيش السورى مايفتحوش بقهم لأن فرنسا كدة بتدافع عن نفسها والغرب كله هايأيدها طبعا !!
.
لكن قيام موسكو النهاردة بتعليق رحلات الطيران بين فرنسا وروسيا .. و إمبارح نفس الشئ بالنسبة لمصر ، بيقول ان فيه مخطط كبير تم رصده واللى بيحصل ده مجرد بدايات …. وفى نفس الوقت رسالة لكل الغرب انه اوعوا تفتكروا انكم نجحتم انكم تدقوا اسفين بين مصر و روسيا .. لأ .. ابثلوتلى .. انا اهو زى ما عملت مع مصر عملت مع فرنسا كمان .. وأدينا بنلعب والملعب مفتوح !!
اللعبة هدفها تفكيك التحالفات بأسلوب فرق تسد .. ندق اسفين بين مصر وروسيا ونبوظ العلاقات .. ومصر تغرق فى مشاكل اقتصادية وبوتين يتحرج امام شعبه اللى بيدفع الثمن بسبب تأييد روسيا لمصر .. وفرنسا تتلهى فى مشاكلها وتغرق فى مكافحة الارهاب فى الوقت اللى فيه فرنسا اصلا بتعانى من مشاكل اقتصادية .. ورسالة تقول لفرنسا عندنا من ده كتير لو ما وقفتيش دعم مصر .. وما وقفتيش التعاطف مع روسيا اللى فرمت الارهابيين فى سوريا فهربوا وراحوا ينتقموا من التعاطف الفرنسى الروسى .. ده باعتبار ان دى الصورة اللى بيتم رسمها يعنى
ولسة المفاجأت جاية كتيييييير
المخطط واضح لكل واحد عايز يشغل عقله .. لكن انا بس عايز اختم الكلام بسؤال لكل الحثالة البشرية اللى بيقولوا على نفسهم نشطاء ، ومعاهم شوية العيال المتثورجة على روحها .. ومن خلفهم اعلاميو العار فى الاعلام المصرى الخاص ، بتاع رجال الاعمال واصحاب المصالح .. ياترى ما رأيكم دام نهيقكم !!؟؟ ..
-ياترى لييه ماحدش طلع فى فرنسا يطالب بإقالة اللواء مجدى عبد الغفار الفرنساوى!! ؟؟
ياترى لييه ماحدش طلع اتكلم وقال ان فرنسا دولة فاشلة ومخترقة ، ولازم نجيب عم مش عارف مين بتاع العصير يعمل اعادة صياغة وهيكلة لمؤسسات الدولة !!؟؟
– ياترى ليه ماسمعناش حد بينتقد قرار الحكومة الفرنسية بإغلاق الحدود وفرض قانون الطوارئ ، زى ما طلع شوية الصيع اللى عندنا ينتقدوا قرار مصر بغلق الحدود مع غزة!! ؟؟
– ياترى فيه حد فتح بقه او اعترض على قرار الحكومة الفرنسية بتعليق حق التظاهر لأجل غير مسمى ، وشرب بيريل وحمر عينه وقال “يسكت الزوووولم” !!؟؟
علشان بس تعرفوا انكم شوية بغبغانات مغيبين ماشيين بالزمبلك ، و بترددوا شعارات انتم مش فاهمين اصلا معناها ، ولا عارفين امتى يتم استخدامها وفى اييه ، وامتى لأ .. لأنكم بغبائكم بتسمحوا لأعداء بلدنا انهم يستغلوكم علشان تدمروا بلادكم بإيديكم !! .. وأهى ليبيا وسوريا امثلة تشهد عليكم .. يمكن تتعظوا … وحتى لو لم تتعظوا ، فخلاص ماعادش حد هايسمح لكم بكدة لأن الشعب المصرى صاحى وواعى وفاهم المؤامرة كويس وانقذ بلده منكم ومن أمثالكم
وبإذن الله مصر هاتبقى قد الدنيا طول ما المصريين متماسكين وكلهم مع جيشهم إيد واحدة