17 Nov 2015
القصة ومافيها .. !!
انت …
أيوة انت …
إصحى كدة وفوق .. وماتسمحش لحد انه يسيطر على تفكيرك او يجيبلك احباط او يلعب على الوتر النفسى ، ويحسسك انك على راسك بطحة !!
ماتسمحش لحد انه يخليك تعمل فى نفسك بنفسك اللى هو بيعمل المستحيل علشان يوصلك له !! .. أيوة بوتين طلع وقال ان السبب فى تفجير الطائرة كان قنبلة .. و ده كان شئ زى ماقولنا على صفحتنا انه كان متوقع بنسبة 90% .. و ده معناه عمل ارهابى من الطراز الأول .. واى دولة فى العالم مش محصنة من الارهاب ، فما بالكو بدولة زى مصر اللى داخلة فى مواجهة مع الارهاب بشكل واضح ومباشر ، و بتحدى علنى وصريح على وسائل الميديا العالمية ومواقع الانترنت سواء من طرف مصر او من طرف التنظيمات الارهابية ..
بوتين قال ان اللى حصل كان تفجير ارهابى .. و أدان الارهاب وتوعد انه هايعزز عملياته العسكرية فى سوريا .. لكن الاهم واللى ماحدش اخد باله منه علشان احنا دايما بنتوه فى الدوشة ، ان بوتين لم يدن مصر .. وما وجهش اى اتهام للأجهزة الامنية المصرية .. بل بالعكس .. ده اللى حصل وخصوصا بعد احداث تفجيرات باريس هايؤدى لتوحيد الجهود للأجهزة الامنية الروسية والفرنسية والمصرية من خلال العمل بشكل متكامل للتعامل مع الارهاب .. و ده شىء بيصب فى مصلحة مصر !
اوعى تنسى ابدا انك انت المستهدف … لأن اللعب كله على الحالة النفسية للشعوب .. والدليل على كلامى هو الشائعة السخيفة اللى طلعت بالقبض على اتنين موظفين فى مطار شرم الشيخ على خلفية تفجير الطائرة الروسية واللى نفتها وزارة الداخلية جملة وتفصيلا فى بيان رسمى .. لأن الهدف هو وضعك ووضع مصر فى خانة المذنب !! .. وعلشان كدة فالتركيز فى الفترة اللى جاية وبشكل كبير هايكون على الشائعات .. فياريت نخلى بالنا واوعى تسمح لحد انه يلخبطك .. 😊
ولازم نكون عارفين ، ان اللى حصل فى فرنسا ، برغم قسوته وبشاعته وتعاطفنا الكبير مع الابرياء اللى ماتوا .. بيصب بشكل كبير فى مصلحة مصر لأنه قطع الطريق على كل المطبلاتية وشمامين الكلة واصحاب الصورة السوداء والعازفين على نغمة الفشل وكل ثعابين الميديا العالمية ، .. انهم يدينوا مصر بحجة التقصير الامنى .. لأن فرنسا بجلالة قدرها كانت على موعد مع عملية إرهابية وتفجيرات قتلت العشرات وكانت على مقربة من الرئيس الفرنسى نفسه !!
التقرير اللى بيثبت ان اللى حصل كان عملية ارهابية .. بيعزز موقف مصر أمنيا وسياسيا ، بالتزامن مع احداث فرنسا ، فى ان مصر بتواجه ارهاب دولى ، بدعم اجهزة مخابرات تابعة لدول كبيرة .. وهو ده اللى قاله بوتن فى مؤتمر قمة الدول ال 20 لما قال انه فيه 40 دولة بتدعم الارهاب منهم دول مشاركة فى القمة .. و لما يطلع تصريح من رئيس روسيا فى مناسبة زى دى ، .. ده معناه انه بيقول “انا عندى معلومات كاملة و .. موثقة” .. يعنى مش مجرد اتهامات عشوائية وخلاص !!
طب ازاى .. !!؟؟
بوتين لما قال 40 دولة ده مش مجرد تصريح عبثى .. لأن ده معناه ان ماحدش يعرف القنبلة دى اتحطت فى انهى مطار .. وخصوصا ان الطياره وقفت ترانزيت في اسطنبول قبل ما توصل شرم الشيخ ..
ولو وضعنا فى الاعتبار ، ان القنبلة دى وزنها كيلوجرام واحد بس ، والتقرير التقنى بيقول انها فصلت الذيل تماما عن الطيارة ، و نزل الذيل بعيد عن الطياره ب ١٣ كيلو .. ف ده معناه ان القنبلة مش محطوطة فى شنطة في بطن الطيارة .. لكن متركبة فى المكان الصح اللى يفصل الذيل .. يعنى مكان القنبلة الصغيرة دي مختار بعناية واحترافية و محطوط بواسطة خبراء .. يعني شغل مخابرات مش اى كلام 😉😊
مرة تانية ..
بلاش تمشى وراء نغمة الاحباط اللى عايزين يصدروهالك .. وسيبك من كلام ان روسيا باعت مصر وان بوتين اتخلى عن السيسى ، وعمل حظر سياحى ومنع تبادل الطيران بين مصر وروسيا .. وافتكر ان روسيا عملت كدة مع فرنسا برضوا .. يعنى الموضوع مالوش علاقة بمصر ، قد ما له علاقة بوضع أمنى ومنع مخطط استهداف مواطنين ابرياء !!
ارفع راسك و مد ايدك واكسر اى صباع اتهام موجه لك لانك مش مدان أصلا .. وخليك على ثقة ان بلدك فى إيديين أمينة .. وكون متأكد ان اجهزة بلدك الامنية اللى واجهت الاف الإرهابيين وتجاوزت كل التحديات الداخلية والخارجية وبتبنى دولة من لا شىء ، وبتحقق مكاسب اقتصادية وامنية وسياسية وعسكرية ، اكيد اقوى بكتير من الاجهزة الامنية للدولة اللى 12 ارهابى خلوها تنام من المغرب ، وخللى قيادتها السياسية تتخذ كل مايمكن ان يتخيله اى شخص من اجراءات تتعارض مع كل اشكال الديموقراطية وحقوق الانسان من أجل حماية الامن القومى 😊