19 Dec 2015
من حسن البنا إلى ديفيد كاميرون
…. وسنوات من العمالة !!!
—————————–
من كام يوم نشرت الحكومة البريطانية فى بيانها خلاصة المراجعة التي تمت بشأن جماعة الاخوان في بريطانيا ومدى اتساق أفكارها ونشاطها بالقانون البريطاني أو تهديده للأمن في البلاد ووقوعه تحت طائلة استراتيجية مكافحة الإرهاب البريطانية.
الحكومة البريطانية قالت في وثيقة نشرتها على موقع البرلمان _وكأنها اكتشفت الكلام ده فجأة_ إن فريق المراجعة أظهر فى تقريره اتهامات بأعمال عنف ارتكبتها الجماعة .. وقال التقرير إن بعض “قطاعات الأخوان المسلمين لها علاقة مشبوهة بالتطرف والعنف” ، سواء من حيث الاتفاق الإيديولوجي أو كون الجماعة “معبر” للعناصر اللي بتلتحق بالارهاب .. و أن الأفراد المرتبطون بالإخوان في بريطانيا أيدوا العمليات الانتحارية التي بترتكبها جماعات ارهابية زى حماس مثلا.
لكن الاجمل واللى يعتبر صفعة على وجه الجماعة ان الحكومة قالت فى تقريرها إنه على الرغم من نفي إخوان مصر لجوئهم للعنف إلا أن مؤيديهم انخرطوا في عمليات عنف ضد القوى الأمنية وغيرها من الجماعات .. وأن تحقيقات المراجعة وصلت لنتيجة أن الانتماء لجماعة الإخوان أو الارتباط بها أو التأثر بها يعتبر مؤشرا محتملا للتطرف !! .. وفى النهاية ف تقارير المراجعة بتشوف أن بعض افكار الجماعة ومعتقداتها تتناقض مع القيم البريطانية زى الديمقراطية وحكم القانون والحريات الشخصية والمساواة والاحترام المتبادل والقبول للمعتقدات والديانات الاخرى .. شوووووف إزاااااى !! 😃
وبناء على التقرير ده أعلنت الحكومة عن مجموعة من الإجراءات وهي .. رفض تأشيرات الدخول لأعضاء الإخوان أو المرتبطين بهم ممن لهم تصريحات تؤيد أو تحبذ العنف والتطرف ….. والتأكد من أن المنظمات الخيرية المرتبطة بالإخوان لا تستخدم في تمويل الجماعة وإنما تقوم بعمل خيري فقط …. والتنسيق مع الشركاء الدوليين (اكيد من بينهم مصر طبعا) لضمان عدم استخدام الجمعيات الخيرية لتمويل الإخوان ….. وفرض تجميد الأصول المعمول به أوروبيا على حركة حماس …. واستمرار متابعة وتدقيق إذا كانت آراء ونشاطات الإخوان تتسق مع القانون البريطاني …
وبالتبعية سيتم تشديد الإجراءات الامنية ومتابعة الإخوان والأفراد والجماعات المرتبطة بهم (سواء في بريطانيا او خارجها) …. أحلى كلام !!
التقرير ده كان عمره ما هايظهر بالشكل ده وخصوصا ان إنجلترا هى الحاضنة الرئيسية للجماعة بكل انشطتهم .. لولا عدة مؤثرات .. منها تطور الاوضاع الدولية ووصول العمليات الارهابية لأوروبا .. والضغوط المادية الخليجية وبالذات من الإمارات اللى هددت بسحب استثمارات والغاء صفقات سلاح بأكثر من مليار جنيه إسترليني .. والاهم من ده كله ان مصر اصبحت هى رئيس لجنة مكافحة الارهاب فى الامم المتحدة واللى هتحط سياسات المواجهة العالمية و هتكون مسئولة عن اصدار التقارير الدولية بالتنسيق مع الدول الاعضاء عن كل الدول الداعمة للارهاب 😉😊
يعنى التقرير البريطاني عن علاقة الاخوان بالعنف والكلام الكبير عن تاريخ التنظيم منذ نشأته قال يعنى هم اتفاجأو بالتنظيم وعلاقته بالعنف والارهاب .. مش هايضحكوا بيه علينا لأن الكلام بالصورة دى يعتبر تسخيف لعقولنا والتاريخ كله بيحكى من ايام حسن البنا لغاية النهاردة عن علاقة بريطانيا الوثيقة بالتنظيم سواء من حيث النشأة او التمويل أو فتح اراضى انجلترا لكل المنظمات الاخوانية المشبوهة !!
احنا مش عيال هاتضحكوا علينا بتقرير .. لان القصة ومافيها انكم بقيتوا متأكدين ان التنظيم ده فقد تأثيره و دوره انتهى وتحول لكارت محروق .. واستمرار دعمه عبارة عن اهدار لمجهود وفلوس ونفخ فى قربة مقطوعة .. بعد ما اوراق اللعبة اصبحت مكشوفة عالميا وآليات اللعبة كلها اتغيرت .. واصبح دعم التنظيمات الارهابية تهمة كبيييييرة مهما كانت المبررات .. 😃
ايوة … بريطانيا واميريكا .. ويمكن اوروبا كلها ماكانوش مش فاهمين وفهموا فجأة 😊 .. أو انهم كانوا شاربين حاجة أصفرة ومضحوك عليهم مثلا .. لكن طالما اوراق اللعب بتتغير ، و التوجه العالمى دلوقتى رايح فى سكة ادانة تنظيمات التأسلم السياسى .. يبقى نسمى كدة بإسم الله و ندبح خروف الاخوان .. وخصوصا بعد ما اصبح الموضوع داخل فى سكة فضايح .. وفيه دول وانظمة بيتصور لها بالصوت والصورة تعاملاتها مع التنظيمات الارهابية .. واحنا مش عايزين فضايح امام البرلمانات والشعوب بتوعنا وخلى الطابق مستور .. وخاصة كمان ان الزمام خلاص هايبتدى يهرب من ايديهم والتنظيمات المتأسلمة دى واحدة واحدة بدأت تخرج عن السياق المرسوم 😃😃
وبناء على كل الكلام ده بدأت قيادات الجماعة تشعر بالخطر .. وبدأ ناس كتيرة منهم يستعدوا لمغادرة انجلترا قبل ما يتقال لهم باي باي .. او ممكن يتقبض عليهم .. زى مثلا أنس التكريتى .. رئيس مؤسسة قرطبة و القيادى بالتنظيم الدولى لجماعة الإخوان .. ومحمد سودان رئيس مكتب العلاقات الخارجية لحزب الحرية والعدالة المنحل، والقيادى الإخوانى .. وعبدالله القزاز .. عضو اللجنة الإعلامية لمكتب الإخوان فى لندن ….. وبدأت القيادات دى تتباكى على الانتر نت وعلى الصفحات الرسمية بتاعتهم على الفيسبوك … زى ما اعترف محمد سودان، القيادى الإخوانى المتواجد فى لندن، بأن الجماعة فى أزمة كبيرة بعد نتائج التحقيقات البريطانية حول نشاط التنظيم فى لندن
مش كدة وبس .. لكن كمان لندن بدأت تفعل الاجراءات دى وعملت اجراءات تحضيرية قبل نشر التقرير الرسمى بإنها منعت تواجد قيادات كثيرة من الإخوان داخل أراضيها كان أبرزهم يوسف القرضاوى رئيس الاتحاد العالمى لعلماء المسلمين، وهو ممنوع من دخول الأراضى البريطانية .. بالاضافة لأن فيه قيادات إخوانية من اللى تم طردهم من قطر خلال الفترة الى فاتت حاولت بشتى الطرق انها تلجأ للندن لكنها فشلت تماما .. و ده اللى خلاها فى النهاية تلجأ للصدر الحنين تركيا 😉😊
وطبعا علشان احنا بننسى .. ياريت نرجع كدة بالذاكرة ليوم 3 يوليو 2013 ونشوف العالم كله بقيادة بريطانيا كان موقفهم اييه وكانوا بيعملو اييه .. وازاى مصر تحدت العالم وماتراجعتش خطوة واحدة .. بل بالعكس كملت طريقها والعالم كله بدأ ينصاع للارادة المصرية .. والكلمتين دوول للبهوات اللى ذاكرتهم زى ذاكرة السمك وبيقولوا مصر دولة فاشلة !! .. لا ياحبيبى .. مصر بتفرض ارادتها علي العالم و مكملة و بتقود سياسة المنطقة بالكامل و بترسم مستقبل المنطقة حسب ارادتها رغم عن انف القوى الكبرى
الجماعة خلاص بتحتضر .. وهايتم التضحية بيها عند اقرب ملف … و هيعاد استخدامها بشكل جديد
زيها زي القاعدة و زي داعش .. بس يا تري هيكون وضع النظام الاخواني التركي ايه ؟؟؟ … لكن اللى يهمنا فى الموضوع اننا نعرف ونتأكد إن بداية النهاية كانت في مصر .. شاء ذلك من شاء ، وأبى من أبى .. والتاريخ لضربة بداية النهاية كان 30 يونيو ، برغم كل محاولات انعاش الميت اللى قامت بها كل القوى العالمية الداعمة للتنظيم .. واللى عايز يصدق يصدق واللى مش عايز يصدق هو حر .. بس القطنة مابتكذبش … وماعنديش حاجة اقولها لمصر وجيش مصر وشعب مصر غير الكلمة اللى بتجنن ناس كتير اوى:
كلمة (((((( تسلم الأيادي ))))))