01 Jun 2016
زيارة وفد المجر … مجرد زيارة .. أم خروج عن النهج .. !!
———————————————————-
النهاردة بيزور مصر السيد فيكتور أوربان، رئيس وزراء المجر ولمدة 3 أيام على رأس وفد يضم حوالى 70 شركة مجرية لتوقيع عقود تجارية ومذكرات تفاهم بين البلدين تصل لحوالى 15 اتفاقية ومذكرة تفاهم حكومية وعقود تجارية في مجالات السكك الحديدية والطيران المدني والإذاعة والتليفزيون إلى جانب عقود تجارية بين عدد من الشركات المصرية الكبرى والشركات المجرية ..
طبعاً ولازم وأكيد هــ يطلع حد يتفلحس ويقول إييه دولة المجر دى اللى انتم فرحانين بيها وعاملين عليها كل الهُلّيلة دى !!؟؟ .. والإجابة المثلى طبعاً هو عدم الإجابة على الناس دى لأنهم خلاص اصبحوا شخصيات فاقدين الأهلية والرشد والقدرة على التفكير .. لكننا هــ نتكلم مع اصدقاء صفحة كلام فى الصميم .. وإعتبروا اللى إحنا بنقوله ده مجرد دردشة ، او حكاوى القهاوى … وبإذن الله هــ نتقابل قريب لما اللى إحنا بنقوله ده يتحقق على ارض الواقع زى ما عودناكم فى كل مقالاتنا الإستراتيجية والسياسية 🙂 ..
أولا .. مصر فى مرحلة ، مافيش بالنسبة لها دولة مش مهمة .. أيوة … كل الدول مهمة بالنسبة لنا ، لأن مصر بتعمل إنتشار سياسى وإقتصادى مع كل السياسات والإقتصاديات الدولية .. وبتنتشر بشكل أفقى ورأسى .. بمعنى إنها بتتوسع فى رقعة العلاقات الدولية .. وبتتوغل رأسيا داخل هذه العلاقات وبتغرز جزورها فى العمق علشان يبقى الفصل مع الوقت مستحيل .. وإوعوا تفتكروا إن ده مش شيئ مقلق بالنسبة لأعداء مصر 😉 🙂
ثانياً .. المجر تعتبر دولة من الدول المهمة فى داخل الإتحاد الإوروبى .. ولازم ماننساش إنها واحدة من الدول اللى وقفت أمام التوجه الأوروبى لحصار روسيا إقتصادياً .. وقالت بمنتهى القوة إن أوروبا ماينفعش تعيش من غير روسيا .. يعنى من الأخر كدة لو رجعنا لنقطة كلامنا عن النطام العالمى الجديد والتكتلات الدولية ، هــ نلاقى إن مصر عارفة كويس أوى هى بتعمل إييه ومع مين 🙂
ثالثاً .. السيناريوا المكرر هو إن الأخرين هم اللى بيسعو إليك .. ولما يجيلك وفد برئاسة رئيس وزراء المجر ، ومعاه وزير الخارجية ووزير الدفاع .. ومعاهم وفد تجارى مكون من 70 رئيس شركة مجرية ، وجايين يقعدوا هنا 3 أيام ، يبقى أكيد الناس دى مش بتهزر ولا جاية تتفسح وتزور الهرم وتمشى .. دى ناس عارفة كويس أوى هى بتعمل إييه … ووجود وزير الدفاع المجرى ضمن الوفد ، يخلى الزيارة دى لها معانى تانية خالص … ده بس للى عايز يفهم ويشوف بعقله .. لأن العلاقات الدولية دايما بتبقى مبنية على المصالح والتواؤمات السياسية !!
رابعاً .. مصر كدة بتعمل أرضية قوية جداً داخل الإتحاد الأوروبى ، اللى بدأت بعض الدول فيه تخرج عن السياق والنهج والسياسات الأنجلوأميريكية ، وبدأوا يلقوا بثقلهم خلف مصر فى المجال العسكرى والإقتصادى (وماحدش يسأل ليه !!) .. زى فرنسا وإيطاليا واليونان وقبرص وأدى المجر دخلت اللعبة .. وألمانيا جاية فى السكة قريّب بشكل واضح بعد ما إبتدت تلعبها بأسلوب غير مباشر عن طريق الشركات الألمانية زى سيمنز مثلا …. و ده طبعا له اسبابة اللى كلنا عارفينها …
خامساً .. لما تيجى زيارة الوفد المجرى بعد زيارة رئيس البنك الأوروبى لمصر .. نفهم من كدة على طول إنه فيه توافق أوروبى على دعم مصر إقتصادياً وتحضير الدولة المصرية الجديدة للعب دور مهم جداً فى الفترة القادمة .. و ده يمكن يفسرلنا البروتوكلات العسكرية وصفقات التسليح الغير مسبوقة اللى بــ تتم مع مصر بتسهيلات غير طبيعية !!!
نيجى بقى للزيارة بتاعة الوفد المجرى .. هــ نلاقى إن الدكتورة سحر نصر، وزيرة التعاون الدولى وقعت مع المجر، مذكرة تفاهم في التعاون الاقتصادى ، مع وزير الخارجية والتجارة المجرى، بيتر زيجارتو … ووقعت الدكتورة الوزيرة وكل من عمرو الجارحى، وزير المالية، والدكتور جلال السعيد، وزير النقل، مع الجانب المجرى، خطاب نوايا لإطار التعاون لتمويل شراء 700 عربة قطار .. ووقع عن الجانب المجرى ، زولتان اربان، رئيس بنك إكسيم المجرى
وصرحت الدكتورة سحر نصر، بإنه فى اطار مذكرة التفاهم الموقعة مع الجانب المجرى للتعاون الاقتصادى والدولى سيتم التعاون فى عدد من المجالات أبرزها الصرف الصحى والصوب الزراعية ومحطات معالجة المياه … وأشارت إن الجانب المجرى سيتولى تمويل وتوريد عدد 700 عربة قطار، لصالح هيئة سكك حديد مصر ويبلغ إجمالى الاتفاق مليار يورو، تنقسم إلى 900 مليون يورو، لتمويل شراء عربات القطار، بالاضافة إلى منحة تقدر بــ 100 مليون يورو، يتم من خلالها توفير 80 عربة قطار “هدية” و300 فرصة تدريب، بالاضافة إلى برامج دعم فنى، وكل ده بسعر فائدة 1.26% ويتم سداد التمويل على 12 سنة وفترة سماح 5 سنوات … يعنى تقريبا وبلغة الأرقام ، يعتبر التمويل بدون أى فائدة تذكر …. طب لييه كل ده !؟ .. هو السيسى بيسحرلهم وإلا إييه !!؟؟ =D =D
ومش كدة وبس … ده كمان فى اطار عمل اللجنة المشتركة بين البلدين، تم توقيع اتفاق للتعاون بين اتحاد الاذاعة والتليفزيون وصندوق الخدمة الاعلامية وإدارة الأصول المجرى ومجموعة “دونا” الاعلامية المجرية !!! … إييييه .. يا سنة سووووخة …. إعلاااام !!؟؟ … دى مصر عندها خطة بقى للنهوض بالتليفزيون المصرى … وإفتكروا إحنا قولنا لكم إييه من زمان فيما يخص الإعلام … وكل حاجة هــ تستوى على نار هادية 🙂 🙂
مصر مكملة فى طريقها … وبــ تعود لدورها الريادى بخطى واثقة حثيثة … بس المهم إننا كشعب نكون واثقين فى الخطوات دى ، ومانسيبش مساحة لبتوع الإحباط والطاقة السلبية إنهم يتسللوا لنفوسنا واللعب على عقولنا ببعض السلبيات اللى موجودة ، لإن مصر فعلا مكملة مهما كانت العقبات والتحديات .. وبتبذل كل المحاولات لتلافى السلبيات الموجودة قدر المستطاع .. علشان بلدنا تبقى بجد قد الدنيا زى ما إحنا عايزينها !!
وإوعى تنسى إن دورك مهم … وأهم بكتير مما تتخيل 🙂