انجلترا رأس الافعى وقائدة محور الشر فى التاريخ الحديث

28 Jun 2016

انجلترا رأس الافعى وقائدة محور الشر فى التاريخ الحديث

———————————————————

بعد نشر مقالاتنا عن الخروج الكبير للانجليز من الاتحاد الاوروبى … لاحظنا ان كثير من اصدقائنا بيبنوا افكارهم باعتبار ان انجلترا هى مجرد تابع لأميريكا بالرغم من ان العكس هو الصحيح تماما …. ولو تسمحولنا نوضح النقطة دى فى تاكيد لكتير من الكلام اللى ذكرناه قبل كدة سواء من خلال مقالات .. او فى ردود على تعليقات .. او اجابة على تساؤلات وردت لنا على الخاص .. وعلشان كدة اعتبروا اللى احنا هانقوله النهاردة عبارة عن ….. خواطر …. ع الطاير 

انجلترا هي رأس الافعي و هي قائده محور الشر في التاريخ الحديث.

قامت انجلترا باحتلال اقدم مناطق العالم حضاريا لتتحكم فيها و في ثرواتها …. و لم تتركها الا بعد التأكد من انها سوف تواصل التحكم فيها …. عن طريقين الاول هو  زرع الفرقه الدينيه و تشويه الحضارات الموجوده باستخدام افيون الشعوب و هو الدين و الثاني استهداف المرأه.

فلم تخرج من المنطقه الا بعد زرع كيانات مشوهه داخل الشرق الاوسط ليبقي اهله في دائره مفرغه من الصراعات و النزاعات …. فزرعت اسرائيل كدوله يهوديه عنصريه …. وزرعت الاخوان لتشويه الاسلام السني …. و زرعت الخوميني في طهران لاستحضار تاريخ الفتنه الشيعي ….. و زرعت شيوخ الفتنه في الجزيره العربيه لتأكيد الاسرائيليات في التراث الاسلامي و اللى كان من نتائجه تشويه الفكر الاصلاحي اللى بدأ ينتشر هناك و نشر فتاوى القتل و التكفير اللى بتستند اليه داعش الان.

و بعد خروجها من المنطقه بعد الحرب العالميه الثانيه سلمتها للبلطجي الجديد و هي امريكا …. فعلاقتها بأمريكا …. انا المخ و انتي العضلات …. و لازم ناخد في الاعتبار انه فى خلال الحرب العالمية ومابعدها بفترة كانت المخابرات الانجليزية هى الحاضنة لكل عمليات المخابرات الاميريكية … وضباط ال MI5 .. و ال MI6 هم اللى كانوا بيشرفوا على معظم عمليات ال CIA وبيدربوا رجال الجهاز الوليد وبينقلوا لهم خبراتهم التراكمية اللى بيتميزوا بيها نتيجة صراعات الحروب العالمية الاولى والثانية واللى خلتهم على اعلى درجة من الكفائة العملية .. ولحد النهاردة التنسيق بين جهازى المخابرات الانجليزى والاميريكى على اعلى مستوى.

و ده كان عشان تلتفت انجلترا الى اوروبا لتتحكم في شعوبها اقتصاديا و سياسيا و تكبيل شعوبها باتفاقيات اقتصاديه و عمله موحده ارهقت الشعوب الاوروبيه اقتصاديا و اجتماعيا ليصبح المواطن الاوروبي اسيرا لدى البنوك و فوائدها الشهريه.

في نفس الوقت فتحت ابواب عاصمتها لاستضافه و حمايه رموز و زعماء ارهابيين العالم و فتحت بنوكها لحمايه اقتصادهم و تمويلهم …. فتجد فيها شخصيات ارهابيه عليهم احكام بالمؤبد و الاعدام ببلادهم …. و لكن يتحركون اعلاميا و اقتصاديا فيها بكل حريه و يتم غسيل اموالهم في بنوكها بكل حريه .

امريكا كان دورها هي تأجيج الصراعات و اشغال حكومات و شعوب المنطقه في حروب و صراعات دائمه باستثمار بذره العنف الطائفي الشيطانيه اللى زرعتها المعلمه بتاعتها. و خلق و حوش و كلاب سعرانه افتراضيه تنهش في جسد شعوب المنطقه كلها.

فمثلا مع مجىء جورج بوش … جاب معاه مشروعه اللى هو طالبان … و طوال ٨ سنوات …. امريكا بتحارب طالبان …. مشى جورج بوش … اختفت طالبان.

جه جورج بوش الابن و جاب معاه مشروعه اللى هو القاعده …. و اللى اسمها متسمي كده عشان كل افرادها عباره عن عملاء في قاعده بيانات المخابرات البريطانيه و الامريكيه …. و لما مشي حضرته …. اخد معاه مشروعه و اختفت القاعده.

جه بعديه اوباما …. و جاب معاه مشروعه في المنطقه و سماه داعش …. و اديه حيمشي و ادينا بنشوف بعنينا بدايه اختفاء داعش.

القصه كانت حتمشي بنفس الشكل الى مالا نهايه …. لان العنصر المشترك ما بينهم هي البذره اللى صنعتها انجلترا و هي كانت الحاضن الرئيسي لكل الكيانات المشوهه دي و هي الفكر التكفيرى اللى كان الاخوان الارهابيين هم الرحم اللى بيتم فيه فرز العناصر و احتضانهم و تصعيدهم الى المستوى الاعلي في العنف سواء قاعده او داعش او اي مسمي آخر.

اللى قلب ليهم موازين مخططاتهم تماما هو الزلزال النووى اللى اتعمل بتحرك حضرتك في ٣٠ يونيو …. لان لاول مره يتم تحرك اقدم شعوب المنطقه ضد البذره اللى زرعتها انجلترا منذ عشرات السنين … و اللى بسببه و لاول مره يفقد رحم الارهاب في المنطقه جذوره و ارتباطه و تأثيره و تعاطف الشارع الاسلامي معه … بل وصل الامر الى اخذ خطوات فاعله لهدم هذا الكيان و هدم فكره و مواجهته سواء في مصر ضد الاخوان الارهابيين او السعوديه بمواجهه التطرف المنسوب كذبا الى الوهابيه . …. و مع احتضار جماعه الاخوان في مصر …. و بالتالي في المنطقه كلها …. اتحركت امريكا لانقاذ ما يمكن انقاذه …. لتقوم بتطمين كيان الملالي في طهران بالتفاقيه النوويه و دعم اردوغان في دعمه لداعش اقتصاديا و لوجيستيا و عسكريا …. و اللى اتفضح لما دخلت روسيا على الخط

و لان الفيلم الهوليودى بتاع امريكا انكشف …. و لا بقي ينفع معانا افلام جديده زي طالبان و القاعده و داعش …. بدأ النفوذ الامريكي يضمحل في المنطقه …. لما بقي يتقلها على مين !!! ما خلاص كل شيجن انكشفن و بان …. و مبقتوش تخوفوا زي الاول لان الشعوب فاقت خلاص و فهمت حقيقه الدقون العيره اللى كنتم بتوردوهم لينا و اخرهم ظابط المخابرات الاسرائيلي الملقب بأبو بكر البغدادي.

انجلترا بعد ما شافت ان شقي عمرها راح ….. و فشل كل الخطط و الخطط البديله لتركيع الشعب اللى اجهض كل خططها و دمر شقي عمرها بالمنطقه سواء بالضغط بدعم كلابهم السعرانه عسكريا او الحصار السياسي ثم الاقتصادى ….. فكان لازم يتم تغيير التخطيط تماما …. و ده سبب ان كان الدور لازم يتهد و يتبني من جديد …. فالمعلم انجلترا كان لازم تنزل بنفسها بشكل جديد بعد تهزئ البلطجي بتاعها في المنطقه و بقي هلهوله و ملهوش قيمه ….

و بالذات بعد هدم ترسيخ منظومه القوه العظمى الواحده بواسطه زلزال ٣٠ يونيو …. و بدايه ترسيخ نظام عالمى جديد يرتكز على تعدد القوى سواء شرقيا او غربيا ….

كده كان لازم الدور يرجع تاني لعام ١٩٤٥ …. دول حتتقسم و دول حتختفي و دول حتضع رجلها مع الكبار ….. و حيتم تقسيم مناطق النفوذ في العالم من اول و جديد.

انجلترا طلعت من الاتحاد الاوروبي …. عشان يكون ليها نصيب منفرد …. و قردغان اخر امل للاخوان ككيان سياسي …. لقي نفسه بيموت و بيتباع بعد ما بدأت مقوله ” حشيله من فوق وش الارض ” تتحقق على ارض الواقع و بقي وجوده و وجود تنظيمه مسأله وقت ….. فجاب المرشدير العظيم و خلع القناع و بان على حقيقته و اعلن تحالفه مع اسرائيل و راح يعتذر و يبوس الرجلين و الايدين لروسيا و يقولها ابوس اديكم سامحوني بس سيبوني اعيش.

و لان دلوقتي بقي كل واحد متعلق من عرقوبه و بيدور علي دور ليه في النظام الجديد و بدأ يبني تحالفاته و يلعب على المضمون فمصر بيتم اعدادها عشان يكون ليها نصيب اقليمي كبيييير جدا و يمكن اكبر من الاقليمي.

ليه التركيز كان كبيييير جدا على تركيع مصر الفتره اللى فاتت.

طب حضرتك عرفت قيمه اللى حضرتك عملته في ٣٠ يونيو و انك غيرت العالم كله … و ان بسببك دول كتيير وثقت في اقدم شعوب الارض و وجدت خلاصها في دعمه و وقوفها معاه.

عرفتوا ليه فرنسا و روسيا و الصين و الخليج بيدعموا مصر بكل ما اوتوا من قوه سياسيا و اقتصاديا و فتحوا ترساناتهم العسكريه على مصراعيها.

عرفتوا سبب التسليح الكبير اللى وصل مصر و اللى ما لم يعلن عنه اكبر بكثير مما اعلن.

عرفتوا ليه بقالنا سنتين بنبعت ليكم رسايل و بنقول ان ٢٠١٦ هو عام الحسم و اللى ظهر ليكم ان حيتم فيه هدم الدور تماما و بدايه دور جديد بلاعبين جداد و بقوانين جديده …. و مناطق نفوذ و عناصر قوه جديده.

طب فاكرين البوست ده اللى كان في ٢٠١٤

طب فاكرين ليه كنا بنكرر كتييييير في كل مقالاتنا طوال العامين الماضيين ان ٢٠١٦ عام تحولات قاسيه لكن حيكون عام الحسم.

طب اتأكدتوا ان الموضوع ملهوش علاقه بالديموكراسي و لا حكوك الانسان و لا بالزولم و الكمع و الاختفاء الكاسرى .

طب عرفت ليه حرقان النوشتاء ذاد جدا دلوقتي و هما بيشوفوا نفسهم فاشلين و ان يمكن السبوبه بتاعتهم تروح بعد احتمال ان مايكونش ليهم دور في و لا قيمه في النظام اللى بيتكون جديد.

دايما سيبك من التفاصيل و الدوشه …. و حاول تبص على الامور من فوق و حتعرف قيمتك و وزنك.

تحياتنا

لمتابعة تعليقاتكم