الإتحاد الأوروبى والطريق إلى المجهول

25 Feb 2017

الإتحاد الأوروبى والطريق إلى المجهول .. !!
——————————————-
.
الفيديو ده فى غاية الأهمية ، والتصريح اللى فيه فى منتهى الخطورة ، لأنه صادر عن رجل الأعمال تيد مالوك، مرشح الرئيس الأمريكى دونالد ترامب لمنصب سفير واشنطن فى الاتحاد الأوروبى، واللى توقع فيه انهيار عملة اليورو، بل وانهيار الاتحاد الأوروبى بالكامل قريبًا .. بل وحدد كمان إن ده هــ يحصل فى خلال من سنة إلى سنة ونصف .. وقال إنه من الأفضل لواشنطن أن بريطانيا تخرج بشكل شامل من التكتل الأوروبى.

تيد مالوك ما كانش بيقول الكلام ده وهو قاعد على قهوة بلدى فى حارة من الحوارى .. لكن قاله فى حوار مع الـ BBC، يوم الأربعاء الماضى … وقال بالحرف: “أعتقد أنه ليس فقط عملة اليورو فى طريقها للزوال، ولكن الاتحاد لديه مشكلة حقيقية وقد ينهار فى خلال السنة أو السنة ونصف القادمة” …
.
وقال كمان إن عقد الصفقات الأميريكية مع بريطانيا سيسبق أية صفقة مع الاتحاد الأوروبى، مضيفًا بشكل واضح وصريح: “أنا شخصيًا لست متأكدًا أنه سيكون هناك اتحاد أوروبى لعقد مفاوضات معه”.
.
و ده غير حاجات تانية قالها كرسائل ، أو خلينا نقول مؤشرات تدل على قرب إنهيار الإتحاد الأوروبى ، بغض النظر عن الفترة الزمنية التقريبية اللى هو حددها فى كلامه وهى سنة ونصف …. لكن الشئ اللى يهمنا (بشكل مبدئى) ، ولحد ما ننشر مقال تفصيلى عن الموضوع ده .. هو ياريت حد من أصدقاء صفحة كلام فى الصميم يقول لمستر تيد مالوك إن الصفحة قالت الكلام ده من أكثر من 7 شهور مع خروج إنجلترا من الإتحاد الأوروبى ، واللى إعتبره البعض من قبيل المبالغة .. فياريت تعيدوا قراءة المقال الخروج الكبير للإنجليز من الإتحاد الأوروبى

البعض زى ماقولنا إعتبر إن كلامنا من قبيل المبالغة .. والنهاردة أصبح الإقتصاديين العالميين بيتكلموا عن الموضوع ده بإعتباره واقع ملموس شايفينه بيتحقق أو فى سبيله للتحقق 🙂
.
ومش كدة وبس .. لكننا فى المقال ده توقعنا التقارب الكبير بين إنجلترا ودول الخليج ، واللى كثير كانوا مستغربين منه جداً .. بالرغم من إننا إتكلمنا إن ده هــ يحصل من 7 شهور فاتت 😉
.
طبعاً مش هــ نعيد نفس الكلام تانى ، ولا هــ نتكلم عن إن ترامب نفسه صرح قبل كدة إنه بيدعم خروج إنجلترا من الاتحاد الأوروبى ، وتنبأ بخروج المزيد من الدول الأوروبية منه .. وعلى فكرة .. هو ما كانش بيتكلم بصفته السياسية ، ولكن كان بيتكلم بصفته رجل إقتصاد ، عارف وشايف كويس إييه اللى هــ يحصل .. وطبعا مش محتاجين ننوه إن النهاردة الجمعة هــ تكون فيه محادثات بين تريزا ماى ودونالد ترامب فى واشنطن.
.
ولغاية ما ننشر قريّب مقال ، نشرح فيه اللى حصل واللى هــ يحصل ونتكلم عن الخروج والتقارب .. واللى أصدقاء كتير بعتولنا رسائل يطلبوا مننا تفسير له ، وإحنا كنا مستنيين اللحظة المناسبة للحديث عنه ، فياريت تشاهدوا الفيديو ده .. والأهم إنكم تعيدوا قراءة المقال اللى فى اللينك فوق .. لأن ده هــ يكون محور كلامنا القادم فى الموضوع ده .. واللى هــ ننشره قريب .. و ….. وفى الوقت المناسب
.
وشكرا لكل اصدقائنا اللى بــ يعطونا ثقتهم فى كلامنا .. ويارب نكون دايما عن حسن ظنكم جميعاً .. ونكون دايما مصدر للمعلومة الصحيحة بقدر الإمكان

لمتابعة تعليقاتكم