18 Jun 2015
الإنقلاب الذى يترنّح .. !!
———————
إنتم مش واخدين بالكم من حاجة مهمة وواضحة لا تخطئها العين ولا يمكن أن يتجاهلها المحللون !! .. إنه من ساعة ماحصلت 30 يونيو ، وبدأ الإينكيلاب يترنح ، ومصر رجعت تانى عزيزة أوي .. وكل القوى الدولية هى اللى بتسعى لمصر مش العكس !!
المفروض دولة فيها إنقلاب عسكرى _على حد وصفهم_ و دول الغرب كلها بتدعم النظام المعزول وجماعته ، والعالم كله علاقته بمصر تقريبا صفر .. والمفروض إن مصر هى اللى تجرى وراء دول العالم كلها وتقبل الأيادى وتشرح وتبرر ، .. لكن لأ .. دى مصر مش اى حد تانى !!
تعالوا نرجع بالذاكرة كدة شوية للوراء ونتكلم عن بعض الملامح بدون تفاصيل ..
– السعودية ودول الخليج بالكامل ، بإستثناء الكشك اللى على الخليج العربى اللى إسمه قطر ، يدعموا مصر بالكامل دعماً إقتصادياً وسياسياً ..
– الملك عبدالله ، ملك السعودية وحكيم العرب _رحمة الله عليه_ يقوم بزيارة مصر فى طريق عودته من رحلته العلاجية ، ورغم مرضه الشديد وعدم قدرته على إجراء أى نشاط ، إلا إنه يصر على المجئ لمصر حتى ولو لدقائق معدودة ، ومن غير ما يغادر الطائرة دعما لمصر !!
– الدب الروسى ثانى أقوى قوة فى العالم يوجه الدعوة للرئيس المصرى لزيارة روسيا ، واللى يسافر ، ويتم إستقباله إستقبال الفاتحين الأبطال .. وبعدين يقوم الرئيس الروسى برد الزيارة مع تطبيع توأمة شراكة سياسية عسكرية إقتصادية بدعم لوجيستى هائل ..
– اليونان وقبرص ييجوا لحد عندنا هنا فى مصر .. وإحنا طبعا إتكلمنا عن موضوع اليونان وقبرص ده وقتلناه بحث عن مدى أهميته ، وبعدين يقوموا بدعوة الرئيس السيسى لزيارتهم مع وعد بدعم موقف مصر فى الإتحاد الأوروبى
– إيطاليا هى اللى وجهت الدعوة للرئيس المصرى لزيارة إيطاليا
– الرئيس الصينى هو اللى وجه الدعوة للرئيس المصرى لزيارة الصين الشعبية
– عدد كبير من رؤساء دول العالم ، ووفود على أعلى مستوى كانت حاضرة فى المؤتمر الإقتصادى بــ شرم الشيخ
– الدول العربية هى من أصرت على أن يكون إجتماع القمة العربية الأخير فى مصر !
– زيارة الرئيس المصرى لفرنسا كانت بناء على دعوة رسمية من الرئيس الفرنسى فرانسوا أولاند !
– ملك إسبانيا هو من وجه الدعوة للرئيس عبد الفتاح السيسى لزيارة إسبانيا
– الزيارة التاريخية المصرية لألمانيا واللى بتعتبر واحدة من أشرس الجبهات على الإطلاق ، لم تتم إلّا بعد 3 دعوات رسمية متتالية .. ومصر هى اللى حددت توقيت الزيارة وبرنامجها !
– الكونجرس الأميريكى يصوت على إستئناف المعونات لمصر ، بعد ما مصر قالت مش عايزينها و بلّوها وإشربوا ميّتها ، ومش هــ نسمح إنها تكون أداة ضغط علينا !!
– ودلوقتى يقوم رئيس الوزراء البريطانى “ديفيد كاميرون” بــ إيفاد مستشاره لشئون الأمن القومي ، لدعوة الرئيس عبد الفتاح السيسى لزيارة بريطانيا .. وطبعا كلنا عارفين يعنى إييه بريطانيا ، وإييه علاقتها بملف الإخوان ، ومدى تأثيرها فى منطقة الشرق الأوسط .. !! 🙂
– وبإذن الله ، العالم كله جاى يتشقلب مع الإينكيلاب فى إفتتاح قناة السويس فى شهر أغسطس القادم .. طب فاضل إييه بقى يامصريين !!؟؟ 🙂 🙂
مرة أخرى
مصر بــ تخطى بمنتهى القوة والثبات ، وبــ تتخطى كل العقبات .. والعالم هو اللى بــ يلهث وراها مش العكس .. والرئيس السيسى بــ يقتحم كل الحصون المنيعة ، ومعاه كروت فى حقيبته ، ماحدش يعرف عنها حاجة !! .. وقريب جداً زى ما وقف الرئيس المصرى على منصة الأمم المتحدة وهتف “تحيا مصر” ، هــ يقف فى قلب البيت الأبيض ويهتف برضوا “تحيا مصر” ..
ولا عزاء لــ ….. وإلّا بلاش … رمضان كريم 🙂