23 Jul 2015
تحالفات المعسكر الشرقى – معركة المصير المشترك ( الجزء الاول)
—————————————————————-
اصدقاؤنا اصدقاء صفحة كلام في الصميم
زي ما اتكلمنا كتير قبل كده في مقالات سابقه و من شهور طويله و اثبتت الايام صحة رؤيتنا ….الاحداث تتسارع حولنا بسرعه كبيره ….. و كره الجليد اتحركت و لا يوجد مخلوق يقدر يوقفها …. و كل ما نراه حولنا و الناس للاسف بتنشغل بيه هو عباره عن محاولات مضنيه لاحتواؤها او حتي لتوجيها لكن بلا فائد ….. و للاسف مع اننا شايفين ان اللعب بقي على المكشوف و الامور بقت واضحه بشكل كبير …. لكن للاسف لاحظنا حالة من التخبط بين الناس او استسلامهم للاشاعات الساذجه و الغير منطقيه بتاعة حروب الجيل الرابع مع اننا حذرنا منها كتير جدا و كنا مركزين كتير على الموضوع ده….. لكننا شوفنا اننا محتاجين مقاله لضبط الامور و اعادة ترتيب افكارنا مره تانيه.
و زي ما اتعودنا على تأصيل الامور …. و اننا نتكلم بعقلانيه و بهدوء بعيد عن المؤثرات الاعلاميه و الفيسبوكيه … فخلونا نتكلم عن رؤيتنا في بعض الاحداث المترابطه جدا ببعض و نفك تاني طلاسمها ليكم ….. زي موضوع اليونان و موضوع اتفاقية ايران مع الغرب و موضوع الهوجه الكدابه اللى طالعه اليومين دول على السعوديه و اللى اتكلمنا عليها من يومين و اثبتنا كدبها ….. 🙂 🙂
خلونا الاول نتكلم عن موضوع اليونان لانه محوري و هام جدا و ليه تاثيرات مهمه جدا في رسم الخريطه المستقبليه مش في منطقتنا فقط و لكن على العالم اجمع … ازاي !!!!
شوف يا سيدي ….. منذ بداية احداث الخريف العبري بدات تظهر ملامح رد فعل الدوله المصريه و التحالف الشرقي …. و طلع كلام من اكتر من ٤ سنين محدش صدقه ساعتها ان الرد حيكون في العمق الغربي …. و ان بداية الرد حيكون دحر الهجوم و بداية الرد حيكون بتفكيك الاتحاد الاوروبي ذات نفسه و حتنتهي على المدي البعيد بتحجيم امريكا او تفكيكها.
و اتكلمنا بالتفصيل قبل كده ان مع شرارة زلزال ٣٠ يونيو اللى انقذ روسيا و الشرق كله من المواجهه العسكريه الحتميه مع الغرب و ازاي امريكا بدات تفقد نفوذها السياسي و العسكري في المنطقه …. و ان اوروبا نفسها حتتخلى عن امريكا لما تسقط هي في بحر المشاكل السياسيه و الاقتصاديه المنتظره ليها.
و اتكلمنا برده على تحرك روسيا و قتل مؤامره امريكا في اوكرانيا و حماية امنها القومي بضم اقليم القرم و القضاء نهائيا على حلم امريكا و اوروبا بمد خط الغاز اللى حيتسرق بيه غاز الجزيره العربيه و شرق البحر المتوسط و نقله الى اوروبا عبر سوريا و تركيا مرورا باقليم القرم ….. و ازاي المعسكر الشرقي شغال بخطوات ثابته و بتناغم تام و بتبادل ادوار هايل و في هدوء في تفتيت التحالفات الغربيه …… زي روسيا لما فرملت تركيا باتفاقية استراتيجيه طويلة المدي للطاقه بمد خط غاز السيل الجنوبي الى بلاد جنوب اوروبا الفقير عبر تركيا و اللى تم بيها احتواء تركيا الدوله مستقبليا و ليس تركيا النظام لان سقوط الاخوان هناك مسالة وقت مش اكتر…..
و لان الدنيا و التحركات السياسيه مش بتعتمد على الصدف …. اتكلمنا بالتفصيل برده عن الدوله المصريه اللى كانت لابده في الدره في شرق البحر المتوسط 🙂 🙂 بتشتغل من سنين بتنسيق و تناغم مع الشرق بتبادل ادوار هايل ما بينهم لحماية نفوذها و حماية مصالحها المشتركه مع التحالف الشرقي بترتيباتها و تحالفاتها السياسيه و العسكريه و الاقتصاديه مع اليونان و قبرص و دعم ايطالي لترتيب النفوذ البحري على كنوز غاز البحر المتوسط ضد الاطماع الاسرائيليه التركيه اللى كانوا حاطين في بطنهم بطيخه صيفي بالاستيلاء عليها بعد تفكيك مصر .
و كان اخرها مناورة حورس ١ بين القوات الجويه المصريه و اليونانيه …. و للى ميعرفش القيمة الاستراتيجيه للمناوره دي و معناها …. احب اقول ان على مستوي العالم كله بيعتبر الطيارين اليونانيين من صفوة الصفوه …. و بيعتبروا من اقوي سلاح جوي على مستوي العالم كله في مستوى الطياريين الغير طبيعي من خبراتهم المتراكمه …. و العالم كله بيحفى ورا اليونان عشان يعمل مناورات معاهم عشان يستفاد من كفاءه و خبرات الطيارين بتوعهم …. و ان مفيش دوله في العالم باحدث طياراتها و امهر طياريها الا و الطيارين اليونانيين معلمين عليهم و جايبين مناخيرهم في الارض في المناورات المشتركه او حتي في المناوشات اللى بتحصل بين تركيا و اليونان بشكل شبه يومي.
الطيارين اليونانيين حافظين عن ظهر قلب التكتيكات الاسرائيليه و الغربيه و التركيه تماما …. و لما اتعملت المناورات دي بين مصر و اليونان …. اليونان بعتت امهر و اقوي سرب مقاتلات عندها ….. و تمت المناورات دي بتشكيلات مشتركه مش منفصله 🙂 🙂 …. يعني طيارتين من عندنا و اتنين من عندهم ضد اتنين من عندنا و اتنين من عندهم لدمج الخبرات و التدريب على العمليات المشتركه المستقبليه اذا لزم الامر ….. و دي كانت اقوي رساله سياسيه و عسكريه للي يفكر يقرب من حقول الغاز اللى العركه اللى شايفنها بقالنا اربع سنين دي عليها و اللى بسببها دول بتتفتت و بتدمر .
يعني من الاخر كده فرد عضلات في شرق البحر المتوسط …. ده غير المناورات البحريه السنويه المشتركه …. و المناورات البحريه المصريه الروسيه و الاخبار عن انشاء قاعده بحريه روسيه او على الاقل تسهيلات مفتوحه على الاراضي القبرصيه للبحريه الروسيه ….. و استلام مصر اول دفعات الاسلحه الهجوميه الحديثه سواء في مقاتلات الرافال او القطع البحريه من فرقاطه و كورفيتات و غواصات ده غير كنز السلاح الروسي اللى محدش يعرف عنه حاجه اللى جاي في السكه او وصل و محدش يعرف عنه حاجه …. فمصر بتفرد انجحة قوتها العسكريه و السياسيه لتغطي مجالها الحيوي لامنها القومي سواء بقوة سياستها و تحالفاتها او بالقوه العسكريه القادره اذا لزم الامر.
المهم بقي نيجي نتكلم عن اللى حصل في اليونان …. فباختصار كده ممكن نديله عنوان انه بداية نهاية الاتحاد الاوروبي تماما …. ازاي. !!!!
فمنتهي البساطه و من غير تفاصيل اقتصاديه معقده ….. اليونان مديونه باكتر من 280 مليار يورو للاتحاد الاوروبي …. و المفاوضات كان فيها الصلف و التعنت الغربي المعهود …. باختصار كانت الطلبات الاوروبيه زي بالظبط ما كانوا بيعملوا معانا زمان ايام الاحتلال …. لما كانوا بيعينوا مندوب سامي تبعهم يحكم و يؤمر و ينهي و مفيش مليم يتصرف على الشعب الا بموافقه المندوب السامي ده.التابع رسميا للبنك الدولي و الاتحاد الاوروبي.
اليونان صبرت حتي اللحظه المناسبه بعد ما أمنت ضهرها تماما مع التحالف الشرقي و تعاملت بنفس الاسلوب المصري و كأن اللى راسم الخطه و تبادل الادوار شخص واحد او غرفة عمليات مشتركه بقياده واحده ….. ازاي !!!!!
اليونان سابت الغرف المغلقه و ضربت كرسي في الكلوب و قامت منزله الموضوع للشارع ( نفس اللى حصل في التفويض الشعبي 🙂 🙂 ) و عملت استفتاء على رفض الشروط الغربيه … فالغرب طبعا مصدقش و قال حنقطع المعونه …. طب اقطعها ….. طب مش حنديكم فلوس ….. مش عايزين …. يعني بالبلدي كده ملكمش عندي حاجه و اللى عايز حاجه ياخدها من الشعب …. و بالديمقراطيه بتاعتكم ارفض شروطكم …. و ده معناه حاجه واحده …. اليونان طلعت لسانها للغرب 🙂 🙂 و قالتلهم مش حلعب معاكم تاني يا وحشين 🙂 🙂 و لبستهم في الحيط و حترجع تاني للعمله المحليه …. للدراخمه ….. و حتسيب اليورو اللى قطم ضهر الشعب اليوناني ….. و ده معناه خروج اليونان من عباءه الاتحاد الاوروبي و سيطرته الاقتصاديه عليها….. و حتتجه الى المعسكر الشرقي اللى جاهزياخدها بالاحضان 🙂 🙂 .
و ده ليه تاثير مدمر و سريع على الاتحاد الاوروبي لان لو ده حصل رسميا …. فرنسا و اسبانيا و ايطاليا هم اول دول حتطلع من الاتحاد الاوروبي و ترجع تاني الى عملاتها مره اخري بعد ما ارهق اقتصادهم تماما طوال السنوات الماضيه بالتعامل باليورو.
و اللى حيدفع الفاتوره و حيشيل تكلفة اعباء انفصال الدول دي هي المانيا قاطرة الاقتصاد الاوروبي و اللى لسه بتعاني لغاية دلوقتي من تكلفة ضم المانيا الشرقيه لالمانيا الموحده يعني خراب ديار مستعجل .
ده غير ان التنين الصيني كان جاهز في تناغم و تبادل للادوار محسوب …. و اعلنت الصين انها داخله بتقلها في اليونان تدعمها و تشيل الليله اقتصاديا …. يعني ترسيخ النفوذ الصيني الروسي داخل الشرق الاوسط و في جنوب اروروبا و اللى …. و للي ميعرفش … فالصين هي اكبر مستثمر في اليونان و خاصة في مجال النقل البحري و المواني.
يا ريت بقي الناس تسيبها من التفاصيل و اوهام الاخبار المضروبه المنتشره كتير …. طب بصوا …. اقولكم على حاجه …… دائما و ابدا تلاقوا كل اسبوعين تلاته تصريح رسمي و في خلال الاسبوعين تلاته دول ….. بتطلع اخبار كتييييييير جدا كل خمس دقائق تلغوش عليك و تنسيك اللى سمعته ….. لو شيلت بقي من قدامك الاخبار الكتير دي و الفتاوي و الضباب المتعمد ده حتشوف الصوره كامله
بصوا كده خلال الاربع سنين اللى فاتوا …. هــ تلاقو كلام وهري كتير إن مصر كانت هــ تتفتت و إن تنظيم داعش جاي و تنظيم دامل في ليبيا و الاخوان في الحكم و احداث غيرها كتيييييييير ….. لكن فى حقيقة الأمر الدنيا كانت ماشية بخطوات ثابتة ….. وشوية وتلاقوا كلام عن إن سوريا خلاص حتتفكك و روسيا اقتصادها حينهار و الامريكان بوارجهم داخله السويس و اليونان هــ تفلس ….. و السعوديه تخلت عن مصر و حتتحالف مع الاخوان ضدها ….. لكن في الحقيقه …. الدنيا برضوا لسة ماشية في ثبات …. 🙂 🙂 .. بل بالعكس .. دى داعش بتندحر و امريكا نفوذها بيتقلص و المعسكر الشرقي بيثبت اقدامه اقتصادياً و عسكرياً و مصر بتثبّت اقدامها كقوة اقليمية اقتصادية و سياسية و عسكرية في المنطقة وفى أفريقيا كمان…
الاسلوب الشرقي مش زي اسلوب الكاو بوي الغربي …. ده اسلوب معلمين … هادي و راسي …. بطىء لكن خطواته ثابته و مركزه ونتايجه باااااهره 🙂 🙂
سيبكوا من التفاصيل و خليكم على النتايج و الخطوات الرسميه ….. معلش اعذروني طولت عليكم .. 🙂 🙂 ..
الجزء التاني من المقال حنتكلم فيه ان شاء الله على حوسة امريكا السوده في المنطقه بعد ما نفوذها السياسي بيضمحل و حتي العفريت اللى كان بيخوفوا بيه الناس و بعد ما كان بيصول و يجول و هو بيغني صليل الصوارم بقي اضحوكه العالم و بيغني صريخ العوالم و بقي كول تون …. و المعسكر الشرقي بيثبت اقدامه في المنطقه يوم بعد يوم و بدأ يتسلل الى اوروبا ….. لجأ الى اخر اوراقه و حليفه الاصلي في المنطقه و هي ايران …. و ايه معني الاتفاقيه النوويه و دور السعوديه و الاخوان و الاشاعات اللى طالعه كتير في القصه دى.
تحياتنا ليكم