31 Mar 2015
بين الخوف والشك والألم .. فى لوغاريتم عاصفة الحزم .. !! (الجزء الأول)
——————————————————————-
كلام كتير .. ورغى أكثر .. بسبب حرب اليمن 2015 ، و أبعادها ، و أهدافها ، وسر تسميتها بهذا الإسم المشابه لإسم “عاصفة الصحراء” .. وخبراء وفتاوى فى كل مواقع التواصل الإجتماعى وعلى الفضائيات وفى برامج التوك-شو .. !! .. وبالرغم من كل ده ، .. فيه 4 أسئلة كانت بتطرح نفسها ، وللأسف ماحدش حاول يقرب منها أو يجاوب عليها فى حدود علمى .. بالرغم من إن الإجابة على الأسئلة دى ، يحسم الأمر كله من وجهة نظرنا .. 🙂
– السؤال الأول ..
الحوثيين بيلعبوا بقالهم كتير جداً فى اليمن الشمالى الملاصق والمهدد بشكل مباشر للحدود السعودية ، لكن السعودية ماتحركتش غير لما التهديد وصل للجنوب .. طب لييه !!؟
– السؤال الثانى ..
لييه تم إختيار التوقيت ده بالذات لشن حرب على اليمن _أو إن شئنا الدقة_ على الحوثيين ، بكل القوات دى ، بالرغم من إن قوة الحوثيين وتأثيرها على الأرض لا يمكن مقارنته بحجم وكفائة القوات المشاركة فى عاصفة الحزم !؟
– السؤال الثالث ..
إييه هو موقف إيران من اللى بيحصل واللى لغاية دلوقتى غامض ويبدو مرتبك أو متحفظ .. أو أى مسمى إنتم عايزين تسموه ، ولييه الموقف السعودى عنيف كدة فيما يخص الشأن السورى !؟
– السؤال الرابع ..
الموقف الأميريكى الغريب والداعم لعملية عاصفة الحزم ، والمغاير للموقف الروسى والأوروبى على عكس كل التصورات عند الجميع ، وخصوصاً بعد الربط بين العلاقات الروسية المصرية ، والمشاركة المصرية بقوة فى العملية !!؟؟
عايزين بس نؤكد للمرة المليون إن برامج التوك شو والإعلاميين بشكل عام .. مش فى مصر بس ، ولكن فى كل المنظومة الإعلامية فى العالم كله .. شغلتهم هى إنهم يجيبوا فلوس للقنوات عن طريق المعلنين .. وعلشان يعملوا ده ، لازم يملأوا عدد ساعات هواء .. وعلشان ده يحصل ، فــ لازم يحمّسوا ، ويقلقوا ، ويحبطوا ، و يثيروا المتابعين لبرامجهم علشان يحتفظوا بنسبة مشاهدة عالية .. وعلشان يعملوا كدة .. يبقى لازم يستضيفوا ناس .. ويسموهم بأسماء رنانة .. إشي خبير إستراتيجى ، وإشي خبير أمنى ، وإشي خبير إقتصادى .. وإشي داعية دينى .. و ماحدش بيدوّر ورا حد … وكل ده بــ يبقى للعبث بالضمير الجمعى للشعوب ، والتلاعب بعواطفهم ومشاعر القلق جواهم علشان تحقيق إما مكاسب مادية ، وإما تنفيذ أجندة معينة خاصة بالإعلامى نفسه ، أو بسياسة القناة اللى مشغّلاه !! 🙂
الأسئلة الأربعة اللى ذكرناها هى محور القضية كلها .. و أدعوا جميع الأصدقاء للمشاركة بأراءهم والتفاعل معنا بوجهات النظر المختلفة قبل ما نبدأ من بكرة أو بعده بالكثير بمشيئة الله ، فى تفنيد جميع الأراء وإعلان رأى صفحتنا ووجهة نظرنا .. لكن رجائنا الخاص للجميع .. بلاش قلق .. وبلاش تسمعوا كلام اللى بيلعب بأعصاب الجميع .. لأن ده جزء كبير من الحرب النفسية اللى بيتم ممارستها علينا .. !!
نصيحة .. أول ما تلاقوا دوشة كتير حوالين موضوع معين ، وتضارب فى الأقوال .. وكل من هب ودب عمّال بيدلى بدلوه ، .. إعرفوا على طول إن الموضوع فيه فنكوش =D =D =D