01 Apr 2015
بين الخوف والشك والألم .. فى لوغاريتم عاصفة الحزم .. !!(الجزء الثانى)
———————————————————————
فى يوم من ذات الأيام القريبة جداً .. خرج علينا البنتاجون الأميريكى بتصريح رسمى بيقول فيه إنه تم فقد شحنة أسلحة أميريكية مش عارف بكم مليار قبالة السواحل اليمنية !! 🙂 .. يعنى واحد أميريكانى كان معدى راكب ميكروباص قام إتنشل من جيبه شحنة أسلحة بمليارات ….. ياسلااااااام =D =D =D …. والموضوع طبعا مش محتاج أى ذكاء علشان نستنتج الأسلحة دى راحت لمين !!؟ 🙂 .. زى بالضبط الأسلحة اللى كانت بتنزل على داعش بالخطأ فى العراق !!!
لو ربطنا التصريح ده ، بالدعم الأميريكى لإيران مؤخراً بشكل علنى وصريح ، واللى وصل لحد التهديد بإستخدام حق الفيتو للتصويت ضد أى مشروع قرار لتمديد العقوبات على إيران .. وكمان ما يسمى بالخلافات الأميريكية الإسرائيلية فيما يخص الشأن الإيرانى .. هــ نفهم إن اللعبة أكبر بكتير من مجرد مجموعة إسمها الحوثيين بتسعى للسيطرة على الحكم فى اليمن 🙂
نيجى بقى لإجابات الأسئلة اللى إحنا طرحناها إمبارح .. واللى هــ نحاول من خلالها وضع تصور للموقف بأكبر قدر من التبسيط ، لأن الموضوع متشعب والمصالح عند كل الأطراف متشابكة بدرجة غير مسبوقة ..
الحوثيين بيلعبوا بقالهم كتير جداً فى اليمن الشمالى الملاصق والمهدد بشكل مباشر للحدود السعودية ، لكن السعودية ما إتحركتش غير لما التهديد وصل لجنوب اليمن .. وخصوصاً إن ده حصل بشكل عنيف ومفاجئ .. و ده معناه حاجتين مهمين جداً:
الحاجة الأولى .. إن التهديد لمضيق باب المندب أصبح أمر واقع .. ومصر زى ما قلنا فى مقال صفحتنا من كام يوم ، عملت حركة إلتفاف ووصلت لأثيوبيا وعملت تقارب بشكل كبير مع الحكومة الأثيوبية وبالتالى إصبحت مصر نظرياً على بعد خطوتين من مضيق باب المندب ، و ده يقلق أطراف كتيرة قوى .. ولو أضفنا إن مصر هى الدولة الرئيسية المعنية بشكل مباشر فى حالة تهديد المضيق بسبب وضعية ممر قناة السويس .. مع الوضع فى الإعتبار إن إفتتاح قناة السويس الجديدة هــ يكون بعد أقل من 4 شهور .. واللى يعتبر فى حد ذاته نصر كبير لمصر ، وهــ يكون من أكبر العوامل الداعمة لدولة 3 يوليو سواءً إقتصادياً أو سياسياً …. فــ كدة مصر ماعندهاش حل تانى غير إنها تتحرك عسكرياً .. وعلشان تعمل ده ، .. كان لازم يبقى التحرك من خلال إطار إقليمى وغطاء قوى علشان يصعّب المهمة على أى جهة من الجهات اللى إحنا عارفينها ، إنها تستخدم شعارات القانون الدولى ، والشرعية الدولية ، والتحرك من خلال توافق أممى دولى ، وكل الكلام اللى إحنا عارفينه ده ، .. وإستغلاله للهجوم على مصر 🙂 .. وعلشان كدة جاء التحرك والتنسيق العربى .. وعلشان كدة برضوا كانت القيادة سعودية 🙂 🙂
الحاجة الثانية .. التمدد أو التوغل الفارسي (ومش هــ أقول الشيعى) فى الشمال السعودى ، سواء بتواجد عناصر من الحرس الثورى الإيرانى فى العراق .. أو الحكومة العراقية الموالية لإيران .. أو تواجد حزب الله فى لبنان .. بالإضافة لنظام بشار الأسد ، واللى الداعم الرسمى والمباشر له هى إيران .. وماننساش كمان إن فيه تقارب قطرى إيرانى على إستحياء ، بــ يستغله النظام القطرى علشان يلاعب بيه السعودية كل شوية 🙂 … ولما نضيف كمان لكل ده ، تصاعد سيطرة الحوثيين على اليمن بدعم إيرانى “وش كدة” .. 🙂 .. هــ نلاقى إن السعودية أصبحت فعلياً بين شقى الرحى ، .. وبالتالى كان لازم تتحرك بشكل سريع وحاسم .. وخصوصاً إن تهديد مضيق باب المندب أو أغلاقه ، هــ يأثر برضوا على حركة الملاحة فى ميناء جدة ، أكبر ميناء فى المملكة العربية السعودية !!
كل ده وأميريكا عاملة نفسها مش من هنا … بتراقب .. و تتفرج .. وتعلن قلقها مرة .. وتلتزم الصمت مرة ، ومستنية تشوف اللى هــ يحصل .. وأكيد برضوا جاهزة بشوية سيناريوهات لردود الأفعال !!!
و ده يأخذنا من إيدينا بمنتهى السلاسة ، لإجابة السؤال الثانى عن توقيت إنطلاق عاصفة الحزم بكل القوات دى ، بالرغم من إن قوة الحوثيين وتأثيرها على الأرض لا يمكن مقارنته بحجم وكفائة القوات المشاركة فى العمليات العسكرية !؟ .. والإجابة ببساطة جداً هو صراع ثعالب ، و لعبة توقيتات ، أرفع لها القبعة تحيةً وتقديراً .. ويسلم عقل اللى فكر فيها .. و اللى خطط لها .. و اللى أشار بيها .. و اللى نفذها 🙂 🙂
تعالو بقى نشوف اللعبة إتلعبت إزاى …
الرئيس السيسى يرجع من أثيوبيا يوم 25 مارس .. بعدها يتم إصدار بيان خليجى رسمى بالإعلان عن بداية عاصفة الحزم فى فجر يوم 26 مارس .. وعلى الفور يقوم السفير السعودى فى واشنطن عادل الجبير بعمل مؤتمر صحفى للإعلان عن بدأ العمليات العسكرية … ((الإعلان عن بدأ .. مش لسة هــ نبتدى)) .. وبعدها بأقل من 48 ساعة تنعقد القمة العربية علشان تعلن بكل قوة تأييدها التام للعمليات العسكرية !!!
هوة ده اللى ممكن نسميه اللعب على تقيل .. وتقيل قوى كمان .. 🙂 🙂 .. لييه !!؟؟
أولا .. الإعلان جاء وكل رؤساء الدول المعنية فى داخل حدود بلادهم .. يعنى فى غرفة العمليات ومركز صنع القرار.
ثانيا .. التنسيق التام بين جميع الدول .. والإعلان عن حجم القوات المشاركة .. والتناغم بين القوات ، واللى وضح منها إن كله عارف دوره .. بــ يوضح إن قرار الحرب والتنسيق لها ، ماكنش قرار عفوى بين يوم وليلة .. لكن كان شغل وإعداد وتخطيط وتوافق وتبادل معلومات من فترة كبيرة ، و شغل مخابراتى على أعلى مستوى .. بدليل إن العالم كله إتفاجئ بالحرب ..
ثالثاً .. كون إن السفير السعودى فى واشنطن هو اللى يعمل مؤتمر صحفى علشان يتكلم عن بدأ العمليات العسكرية .. فــ ده معناه إما تحدى للإدارة الأميريكية فى عقر دارها .. أو إيصال رسالة للعالم إننا كتحالف عربى هــ نعمل اللى إحنا عايزينه بدون فرض وصاية من أى حد ، حتى ولو كانت أميريكا .. 🙂
رابعاً .. بدأ العمليات قبل أقل من يومين فقط من إنعقاد القمة العربية ، يفشل أى مساعى أو إتصالات لإيقاف الحرب دى.
خامساً .. القوات الضخمة المشاركة فى العمليات العسكرية الهدف منها هو نفسى بأكثر من كونه عسكرى .. لأن الهدف مش الحوثيين ، ولكن إيصال رسالة للى وراء الحوثيين واللى وراء اللى وراء الحوثيين .. إن قوتنا لا يستهان بها .. وإننا على إستعداد لتجاهل كل القوى الدولية ، و الضرب بشدة فى حالة تهديد الأمن القوى العربى والخليجى .. !
سادساً بقى وهو الأهم .. إن إنعقاد القمة وتأييدها للى بيحصل ، بعد وقت قصيّر جداً من بدأ العمليات .. بــ يضفى شرعية إقليمية بتحالف دولى إقليمى ، يمنع الأمم المتحدة بقيادة أميريكا من القيام بأى رد فعل معاكس أو مناهض للقرار 🙂
شوفتوا بقى ليه اللعب كان على تقيل =D =D =D
الموضوع زى ما قلنا معقد ومتشابك .. وصعب إنه يتحط فى مقال واحد .. و علشان كدة .. هــ يبقى للحديث بقية