03 Apr 2015
بين الخوف والشك والألم .. فى لوغاريتم عاصفة الحزم .. !!(الجزء الثالث)
———————————————————————–
إتكلمنا فى المقال اللى فات فى الأجابة عن السؤال الأول والثانى اللى طرحناهم قبل كدة ، عن طبيعة الوضع اليمنى وتأثيره ، وسبب عاصفة الحزم ، والتوقيت بتاعها .. وتيجى التمثيلية الإيرانية الأميريكية اللى حصلت فى اليومين اللى فاتوا علشان تجاوب بالنيابة عننا عن السؤالين الثالث والرابع =D =D .. وتجاوب كمان على تساؤلات كثير من أصدقائنا 🙂
قبل ما نكمل إسترسالنا بخصوص عاصفة الحزم ، خلينى بس أقول لكم حاجة مهمة جداً .. إن اللى بيحصل مع إيران دلوقتى هو مجرد محاولة لقلب الطرابيزة ، وتعويض فشل مؤامرة “الربيع العبري” ، عن طريق تنشيط الملف الإيرانى .. لأن الهدف كان و لازال هو تدمير أو تحجيم القوة المصرية لأقصى درجة ممكنة .. وفى نفس الوقت تدمير المنطقة وتفتيتها بأى شكل من الأشكال … وأعتقد إن ده أصبح واضح دلوقتى لأن اللعب أصبح على المكشوف ، واللى مايشوفش من الغربال يبقى مش أعمى وبس .. لكن يبقى ما عندهوش عقل من الأساس 🙂
تعالو بقى نجاوب على السؤالين الثالث والرابع مع بعض لأنهم يعتبروا شروة واحدة =D .. والأسئلة كانت .. إييه هو موقف إيران من اللى بيحصل واللى لغاية دلوقتى غامض ويبدو مرتبك أو متحفظ .. أو أى مسمى إنتم عايزين تسموه ، ولييه الموقف السعودى عنيف كدة فيما يخص الشأن السورى !؟ .. وليه الموقف الأميريكى الغريب والداعم لعملية عاصفة الحزم ، والمغاير للموقف الروسى والأوروبى على عكس كل التصورات عند الجميع ، وخصوصاً بعد الربط بين العلاقات الروسية المصرية ، والمشاركة المصرية بقوة فى العملية !!؟
زى ما قلنا فى المقال السابق إن القوات الضخمة المشاركة فى العمليات العسكرية الهدف منها هو إيصال رسالة للى وراء الحوثيين واللى وراء اللى وراء الحوثيين .. إن قوتنا لا يستهان بها .. وإننا على إستعداد لتجاهل كل القوى الدولية ، و الضرب بشدة فى حالة تهديد الأمن القوى العربى والخليجى . وهو ده اللى عمل حالة الإرتباك عند إيران الفارسية ، واللى بينها وبين السعودية “ما صنع الحداد” .. و كانت بــ تسعى فعلياً لتطويق السعودية من جميع الجهات .. وما كانتش متوقعة إن التحالف العربى يرد بالقوة والسرعة والحزم ده .. ومن هنا جائت تسمية العمليات العسكرية بــ “عاصفة الحزم” .. 🙂 🙂 .. وعلشان كدة إيران لم تسعى للتورط فى صدام مباشر ضد قوات التحالف العربى .. أولا لأنها لم تتوقع هذا التحالف من الأصل إنه يكون بالشكل ده .. وثانيا لأنها مشغولة فى الإعداد للتمثيلية الهزلية مع أميريكا علشان تتحول بقدرة قادر من إحدى دول محور الشر .. إلى شريك إقليمى فى منطقة الشرق الأوسط .. شوفوا المسخرة 🙂 🙂 🙂
الناس بقى اللى مستغربة من الموقف السعودى العنيف جداً فيما يخص الشأن السورى .. مش قادرين يستوعبوا إن المملكة السعودية تتعامل بأيديولوجية مختلفة مع الملف السورى .. لأنها شايفة إن حزب البعث هو إمتداد مباشر للنظام الإيرانى .. وخصوصاً فى وضعية التهديد الصريحة القائمة دلوقتى من النظام الإيرانى بتصريحاتهم إنهم بــ يسعوا لإعادة أمجاد الإمبراطورية الفارسية .. وكمان التقارب الأميريكى الإيرانى ، و اللى اصبح بــ يمثل ورقة ضغط أميريكية على السعودية 🙂 .. وبالتالى فــ أى حديث عن بقاء نظام بشار الأسد هو مبدأ مرفوض ، وأى دولة تدعم نظام بشار ، زى روسيا مثلا ، هى دولة معادية 🙂 ، وخاصة لو وضعنا فى الإعتبار إن السعودية لسة بــ تنظر للسوفيت بإعتبارهم أصحاب نفس أيديولوجية الستينات ، .. وعلشان كدة كان رد الفعل العنيف من جانب الأمير سعود الفيصل فى مؤتمر القمة العربية .. واللى ماكانش موجه لروسيا فقط .. ولكن لأى حد ممكن يكون بيدعّم الفرس سواء بشكل مباشر ، أو بشكل غير مباشر 🙂
نيجى بقى للموقف الأميريكى الداعم للعمليات العسكرية فى اليمن على عكس المتوقع 🙂 .. و ده كان فيلم من الأفلام الهوليودية الأميريكية ، لأنه فى الوقت اللى الإدارة الأميريكية بــ تعلن فيه للعالم و لدول الخليج سلامة نية الذئب ، كانت بــ تتقدم خطوات فى مفاوضاتها مع إيران و بــ تجهّز الخنجر اللى بــ تغرزه فى ظهر التحالف العربى بشكل عام ، والسعودية بشكل خاص .. وعلشان المسرحية تكمل .. يقوم أوباما يكلم الملك سلمان ويدعوه هو و كل قادة دول الخليج علشان يجتمعوا فى كامب ديفيد .. و يوصّل رسالة مختصرة معناها “سيب ، وأنا أسيب” =D =D =D
الفيلم الأميريكى الإيرانى هو فيلم بجد .. وكارت إرهاب مش أكثر … وتصريحات جون كيرى نفسها بتقول كدة .. لأنه صرّح إنهم عملوا إتفاقية إطارية .. وإن النقاط الخلافية إتحطلها جدول زمنى علشان تتحل بعضها فى خلال 10 سنوات ,, وبعضها فى خلال 25 سنة … يعنى يا من عااااش =D =D ..
اللعبة إحلوت قوى 🙂 .. ورقعة الشطرنج بقت على صفيح ساخن .. ومعركة العقول وصلت لأبعد مدى .. ولو إحنا أخذنا بالنا .. هــ نلاقى إن الوضع فى المنطقة من سنة ونص كان أسوأ من كدة بكتير .. لكن اللى حط القواعد وفرض إرادته على العالم كله بقاله سنة ونص .. هو اللى مكمل عملية فرض الإرادة .. و بيكسب أرض كل يوم ..
وزى ما أكدنا أكثر من مرة قبل كدة ، و مع كل تصاعد لأى ملف من الملفات المشتعلة فى المنطقة ، إن كل ما تلاقوا الدوشة كتيرة ، والتلطيش بــ يزيد .. تعرفوا على طول إن الطرف اللى بــ يلطّش ده بيخسر فعليا على الأرض .. وكلامنا كان بفضل الله بيطلع صح .. و بإذن الله هــ يطلع صح المرة دى كمان 🙂
القلق اللى عندنا كلنا شئ صحى .. ومعناه قمة الوطنية .. لأننا قلقانين على مستقبل بلدنا بجد .. لكن إوعوا تستسلموا للحرب النفسية ، وثقوا فى نفسكم وفى بلدكم ، و فــ أن ربنا مش بيجيب حاجة وحشة أبداً 🙂
و مازال للحديث بقية .. والقادم أهم ..
تابعونا .. 🙂