اليمن .. والتحركات الإقليمية والدولية .. !!مصر فى القلب

19 Apr 2015

اليمن .. والتحركات الإقليمية والدولية .. !!مصر فى القلب …

————————————————————

تحركات القوى الدولية بتزيد  ، والتكتلات العالمية بدأت تظهر لها ملامح ، وبــ ينضم لها لاعبين جداد 🙂 

وزير الدفاع الروسي سيرغي شويغو ، أعلن يوم الأربعاء اللى فات عن ترحيب روسيا بــ سعي إسلام آباد إلى توسيع علاقاتها مع موسكو، بما فيها في مجال الدفاع والعلاقات العسكرية بين البلدين … وفى المقابل قال خوجه محمد آصف وزير الدفاع الباكستانى بعد لقائه مع شويغو، إن روسيا وباكستان اتفقوا على توسيع التعاون العسكري في الشهور القادمة، سواء في قطاع الصناعة الدفاعية وفي مجال تعليم العسكريين، و تبادل الوفود العسكرية.

وبعدها على طول يعلن وزير الدفاع الإندونيسي رياميزارد رياكودو، بعد لقائه بوزير الدفاع الروسى في موسكو ، إنه فيه خطط لدى موسكو وجاكرتا لإجراء مناورات عسكرية مشتركة .. ومش كدة وبس .. لكن وزير الدفاع الأندونيسى لفت النظر لإن روسيا وأندونيسيا عملوا مناورات مشتركة السنة اللى فاتت وقال إنها كانت فى نطاق القوات البحرية ، وإن المناورات اللى جاية هاتدخل فيها القوات الجوية والبرية كمان !!

الكلام ده معناه رسالة للقوى التقليدية العالمية اللى هى بــ تتلخص فى أميريكا و أوروبا .. إن روسيا بــ تتحرك على مستوى الشرق الأقصى كله ، مش الصين وكوريا بس .. لأ .. وكمان بــ يتم التنسيق مع قوى نووية إسلامية زى باكستان ، .. ولو وضعنا فى إعتبارنا سوء العلاقات الأميريكية الباكستانية ، .. هــ نلاقى نفسنا أمام رسالة لها مغزى .. ومغزى كبير كمان 🙂

طب لييه إحنا بنقول كدة .. !!؟؟ .. لأن كل التصريحات والتفاهمات دى كانت على هامش مؤتمر الأمن الدولى اللى نظمته وزارة الدفاع الروسية فى موسكو الشهر ده .. واللى زادت روسيا فيه من حدة لهجتها مع الغرب وإتهمت أميريكا وكل المواليين لها بتأجيج الصراعات فى العالم ونشر الإرهاب .. وخصوصاً إن المؤتمر كان بحضور وزراء دفاع و رؤساء أركان دول كثيرة ، منها باكستان والهند وأندونيسيا وإيران، ودول الرابطة المستقلة ومجموعة «بريكس» ، وكل ده فى غياب الدول الغربية .. !! 🙂

لكن التصريحات الأهم هى اللى كانت بتقول «إن واشنطن وحلفاءها تجاوزوا كل الخطوط الحمراء، وفشلوا في التغلب على خطر الإرهاب ، وإن النظام المستقر اللى تم بنائه بعد الحرب العالمية الثانية بدأ يتفكك» .. 🙂 🙂 .. ودى كانت رسالة واضحة معناها إن خلاص دوركم إنتهى ، وإن فيه نظام عالمى جديد بــ يتشكل بالفعل 🙂

لكن الحاجة المهمة إن بعد إنتهاء المؤتمر .. يقوم  ييجى “محمد علم ختك” سكرتير عام وزارة الدفاع الباكستانية على رأس وفد رفيع المستوى علشان يزور مصر ويعقد إجتماعات مع الفريق “محمود حجازى”، رئيس أركان حرب القوات المسلحة المصرية .. وده مالوش أى معنى غير إن مصر ماسكة الدفة كويس ، ورجعت تانى لدورها الدولى والإقليمى كرمانة ميزان المنطقة .. وإن أى توازنات أو تحالفات دولية ، مش هــ تكون بعيدة عن مصر 🙂

الشئ الأخير اللى من اللازم إننا نلفت النظر إليه .. وخصوصاً إنه تسبب فى نوع من القلق وإهتزاز الرؤية عن كثير من أصدقائنا ، وهو الموقف الروسى تجاه عاصفة الحزم

وعلشان كدة إحنا لازم نوضح حاجتين مهمين جداً:

أولا .. الضجة اللى إتعملت على صفقة إس300 مع إيران كان الهدف منها إحداث بلبلة فى المنطقة العربية .. والمستهدف هو رجل الشارع اليسيط ، لأن إس300 دى صواريخ لتطوير المنظومة الدفاعية مش الهجومية !! 🙂 .. وكل الإعلاميين اللى قلبوا الدنيا وقالوا إن الصواريخ دى هــ يتم إستخدامها ، لإسقاط طائرات التحالف فى اليمن ، فاتهم حاجة مهم جداً .. وهى إزاى منظومة دفاعية زى دى هــ تدخل اليمن ومنصاتها تتركب ويتم إستخدامها كمان ، فى ظل الحصار البحرى والبرى والجوى اللى عاملاه قوات التحالف العربية على اليمن ، وفى ظل القصف الجوى المركز للميليشيات اليمنية وجماعات الحوثى !!؟؟ 🙂

ثانياً .. اللى إتكلموا عن دعم روسيا لإيران ، وإن ده ضد السياسة المصرية وبــ يهدد الأمن القومى المصرى فى باب المندب ، ما أخدوش بالهم إن العلاقات الروسية الإيرانية علاقات قوية ومتينة من سنين .. يعنى مش حاجة جديدة 🙂 .. وما أخدوش بالهم كمان  إنه بالرغم من العلاقات القوية دى ، إلا إن روسيا لم تستخدم حق الفيتو فى إجهاض المشروع اللى تقدم به التحالف العربى فيما يخص الوضع اليمنى .. و ده معناه إن وجود مصر فى التحالف كان له تأثير .. وتأثير كبير كمان =D =D

الموضوع زى ما قلنا قبل كدة أكثر من مرة إنه متشابك لأقصى درجة ، وإننا مش شايفيين غير قمة جبل الثلج بس .. وإفتكروا مقالنا اللى نزّلناه من أسبوع بعنوان “أرنبنا فى منور أنور” .. =D

وفيه شئ كمان لازم نكون متأكدين منه .. وهو إن بعض الإعلاميين و وسائل الإعلام سواء كانت مغرضة ، أو لأ .. بــ يكون دائما كل هدفهم إحداث ضجة ، و وضع فلفل وشطة على الأخبار علشان ضمان الإنتشار ، و إرتفاع نسبة المشاهدة .. لكن دورنا إحنا إننا نسمع ، ونفكر ، ونعمل عقولنا فى كل اللى بــ يتقال .. لأنه فى أحيان كثيرة بــ يكون الهدف هو تصدير صورة معينة للناس علشان تحصل بلبلة مش أكثر 🙂

أما بقى موضوع روسيا وإيران .. وأسباب صفقة الصواريخ .. والتصريحات العدائية من واشنطن وإسرائيل .. فــ لهذا حديث أخر 🙂

 حفظ الله مصر

لمتابعة تعليقاتكم